1,000 മാസ്റ്റേഴ്‌സ്, പിഎച്ച്‌ഡി വിദ്യാർത്ഥികള്‍ക്കും പോസ്റ്റ്ഡോക്ടറല്‍ ഗവേഷകർക്കുമാണ് ഈ പദ്ധതിയിലൂടെ ജപ്പാനിലേക്ക് അവസരം ലഭിക്കുക. തിരഞ്ഞടുക്കപ്പെടുന്നവർക്ക് പ്രതിവർഷം 25.6 ലക്ഷം രൂപ വരെ സാമ്പത്തിക സഹായം ലഭിക്കുമെന്നതാണ് പദ്ധതിയുടെ പ്രധാന ആകർഷണം.

‘ലോട്ടസ് ബേസിക്’, ‘ലോട്ടസ് ആസ്പയർ’ എന്നിങ്ങനെ രണ്ട് വിഭാഗങ്ങളിലായാണ് സ്കോളർഷിപ്പ് ക്രമീകരിച്ചിരിക്കുന്നത്. ബേസിക് പ്രോഗ്രാമിന് കീഴില്‍ പ്രതിമാസം 1.4 ലക്ഷം രൂപ വീതം 12 മാസത്തേക്കും, ആസ്പയർ പ്രോഗ്രാമിന് കീഴില്‍ ഇതേ തുക 36 മാസത്തേക്കും ലഭിക്കും. ആസ്പയർ വിഭാഗത്തില്‍ ഗവേഷണ ആവശ്യങ്ങള്‍ക്കായി കൂടുതല്‍ തുക അനുവദിക്കും. AI, ബയോടെക്നോളജി, ക്വാണ്ടം, സെമി കണ്ടക്ടർ തുടങ്ങിയ നൂതന സാങ്കേതിക മേഖലകളിലാണ് ഗവേഷണത്തിന് മുൻഗണന നല്‍കുന്നത്.

താല്‍പ്പര്യമുള്ളവർ ജാപ്പനീസ് സർവകലാശാലയിലോ ഗവേഷണ സ്ഥാപനത്തിലോ ഉള്ള പ്രിൻസിപ്പല്‍ ഇൻവെസ്റ്റിഗേറ്റർ (PI) മുഖേനയാണ് അപേക്ഷ സമർപ്പിക്കേണ്ടത്. നേരിട്ടുള്ള അപേക്ഷകള്‍ സ്വീകരിക്കില്ല. 40 വയസ്സാണ് ഉയർന്ന പ്രായപരിധി. ജൂണ്‍ 9 ആണ് അപേക്ഷകള്‍ സമർപ്പിക്കേണ്ട അവസാന തീയതി.