ഫുട്ബോള്‍ ലോകം ഏറെക്കാലമായി കാത്തിരുന്ന ലിയോണല്‍ മെസി-മുഹമ്മദ് സലാ പോരാട്ടത്തിനാണ് ഇന്നത്തെ മത്സരം വേദിയാകുന്നത്. മത്സരം യുണൈറ്റ്8 സ്പോർട്സ് നെറ്റ്‌വർക്കിലും സീ ഫൈവ് പ്ലാറ്റ്‌ഫോമിലും തത്സമയം കാണാം.

കനത്ത പോരാട്ടങ്ങള്‍ അതിജീവിച്ചാണ് ഇരു ടീമുകളും പ്രീ-ക്വാർട്ടറിലെത്തിയത്. കാബോ വെർദെയെ എക്സ്ട്രാ ടൈമില്‍ 3-2 എന്ന സ്കോറിന് മറികടന്നാണ് അർജന്റീന എത്തിയതെങ്കില്‍, ഓസ്ട്രേലിയയെ പെനാല്‍റ്റി ഷൂട്ടൗട്ടില്‍ വീഴ്ത്തി ചരിത്രത്തിലാദ്യമായാണ് ഈജിപ്ത് പ്രീ-ക്വാർട്ടറിലേക്ക് യോഗ്യത നേടിയത്.

ഏഴ് ഗോളുകളുമായി ടോപ്പ് സ്കോറർ പദവിയിലുള്ള ലിയോണല്‍ മെസിയുടെ ഫോമിലാണ് അർജന്റീനയുടെ പ്രതീക്ഷ. എന്നാല്‍, പ്രതിരോധത്തിലെ വിള്ളലുകള്‍ സ്കലോണിയുടെ സംഘത്തിന് വലിയ വെല്ലുവിളിയാണ്. മെസിക്ക് മാത്രം ടീമിനെ ചുമലിലേറ്റാൻ കഴിയുന്ന അവസ്ഥയാണോ ഉള്ളതെന്ന ചോദ്യത്തിന് ഉത്തരം കണ്ടെത്താൻ അർജന്റീനയ്ക്ക് ഇന്ന് നിർബന്ധിതരാകേണ്ടി വരും.

തങ്ങളുടെ ചരിത്രത്തിലെ ഏറ്റവും വലിയ മത്സരത്തിന് തയ്യാറെടുക്കുന്ന ഈജിപ്ത്, മെസിയെപ്പറ്റി അധികം ആശങ്കപ്പെടുന്നില്ലെന്നാണ് പരിശീലകൻ ഹൊസാം ഹസൻ വ്യക്തമാക്കിയത്. മുഹമ്മദ് സലായുടെ നേതൃത്വത്തിലുള്ള കൗണ്ടർ അറ്റാക്കുകളും, കരുത്തുറ്റ പ്രതിരോധവുമാണ് ഈജിപ്തിന്റെ പ്രധാന ആയുധങ്ങള്‍. ലോകകപ്പ് നോക്കൗട്ട് മത്സരങ്ങളില്‍ പരിചയക്കുറവുണ്ടെങ്കിലും, ആത്മവിശ്വാസത്തോടെയാണ് അവർ ബൂട്ട് കെട്ടുന്നത്. ഈജിപ്ഷ്യൻ പ്രതിരോധം അർജന്റീനയുടെ മുന്നേറ്റങ്ങളെ എങ്ങനെ തടയുമെന്നതിനെ ആശ്രയിച്ചിരിക്കും മത്സരഫലം.