മണ്‍സൂണ്‍ വൈകുന്നതും എല്‍ നിനോ പ്രതിഭാസത്തിനുള്ള സാധ്യതയും കണക്കിലെടുത്ത്, കാർഷിക മേഖലയിലെ വെല്ലുവിളികള്‍ നേരിടാൻ കേന്ദ്രസർക്കാർ മുൻകരുതല്‍ നടപടികള്‍ ഊർജ്ജിതമാക്കി.
ഖാരിഫ് വിളകളുടെ ഉല്‍പ്പാദനത്തെ ബാധിക്കാതെയും കർഷകരുടെ വരുമാനം സംരക്ഷിച്ചും മുന്നോട്ടുപോകുന്നതിനായി രാജ്യവ്യാപകമായി ജലലഭ്യത, വിത്ത് ശേഖരം, സംസ്ഥാനങ്ങളുടെ തയ്യാറെടുപ്പുകള്‍ എന്നിവ കേന്ദ്ര കൃഷിമന്ത്രി ശിവരാജ് സിംഗ് ചൗഹാൻ അവലോകനം ചെയ്തു. മഴയില്‍ കുറവുണ്ടായാല്‍ നേരിടേണ്ടി വരുന്ന പ്രതിസന്ധികളെ മറികടക്കാൻ കൃത്യമായ ആസൂത്രണം അത്യാവശ്യമാണെന്ന് അദ്ദേഹം നിർദ്ദേശിച്ചു.
ഇന്ത്യൻ കാലാവസ്ഥാ വകുപ്പിന്റെ കണക്കുകള്‍ പ്രകാരം, 2026-ലെ തെക്കുപടിഞ്ഞാറൻ മണ്‍സൂണ്‍ സാധാരണയേക്കാള്‍ കുറവായിരിക്കുമെന്നും സീസണല്‍ മഴ ശരാശരിയുടെ 90 ശതമാനം മാത്രമായിരിക്കുമെന്നുമാണ് സൂചന. പസഫിക് സമുദ്രത്തില്‍ എല്‍ നിനോ സാഹചര്യങ്ങള്‍ ഉടലെടുക്കുന്നത് മണ്‍സൂണിനെ ദുർബലപ്പെടുത്തുമെന്നും, ഇത് നെല്ല്, പയർവർഗ്ഗങ്ങള്‍, എണ്ണക്കുരുക്കള്‍ തുടങ്ങിയ പ്രധാന ഖാരിഫ് വിളകളെ ബാധിച്ചേക്കാമെന്നും ആശങ്കയുണ്ട്. ജലസംരക്ഷണം, വിത്ത് ലഭ്യത, ബദല്‍ കൃഷി രീതികള്‍ എന്നിവയില്‍ ശ്രദ്ധ കേന്ദ്രീകരിക്കാനും, മഴ കുറയാൻ സാധ്യതയുള്ള ജില്ലകളില്‍ പ്രത്യേക നിരീക്ഷണം ഏർപ്പെടുത്താനും ഉദ്യോഗസ്ഥരോട് ആവശ്യപ്പെട്ടിട്ടുണ്ട്.
ഏതെങ്കിലും തരത്തിലുള്ള വിളനാശമോ പ്രതിസന്ധിയോ ഉണ്ടാകാതിരിക്കാൻ സംസ്ഥാനങ്ങളുമായി ചേർന്ന് പ്രവർത്തിക്കാൻ കേന്ദ്രം തീരുമാനിച്ചു. കർഷകർക്ക് കൃത്യസമയത്ത് മൊബൈല്‍ അഡ്വൈസറികളും കാലാവസ്ഥാ മുന്നറിയിപ്പുകളും നല്‍കുന്നതിനൊപ്പം, കീടബാധകളും രോഗങ്ങളും നിയന്ത്രിക്കുന്നതിനായുള്ള മുൻകരുതല്‍ പദ്ധതികള്‍ തയ്യാറാക്കാനും കൃഷി മന്ത്രാലയം നിർദ്ദേശിച്ചിട്ടുണ്ട്. പ്രതിസന്ധികള്‍ക്കിടയിലും കാർഷിക പ്രവർത്തനങ്ങള്‍ തടസ്സമില്ലാതെ തുടരാൻ ആവശ്യമായ എല്ലാ പിന്തുണയും ഉറപ്പാക്കുമെന്ന് സർക്കാർ വ്യക്തമാക്കി.