പാകിസ്ഥാൻ, ഈജിപ്ത്, തുർക്കി എന്നീ രാജ്യങ്ങളുടെ മധ്യസ്ഥതയിലാണ് ഈ നയതന്ത്ര നീക്കങ്ങള്‍ നടക്കുന്നത്. അമേരിക്കൻ പ്രതിനിധി സ്റ്റീവ് വിറ്റ്‌കോഫും ഇറാൻ വിദേശകാര്യ മന്ത്രി അബ്ബാസ് അരഗ്ചിയും തമ്മിലുള്ള രഹസ്യ ആശയവിനിമയങ്ങള്‍ ഇതിന് കരുത്തുപകരുന്നതായി ആക്സിയോസ് റിപ്പോർട്ട് ചെയ്തു. അടുത്ത 48 മണിക്കൂറിനുള്ളില്‍ ഒരു കരാറിലെത്താൻ സാധ്യത കുറവാണെങ്കിലും, യുദ്ധം കൂടുതല്‍ രൂക്ഷമാകുന്നത് തടയാനുള്ള അവസാനവട്ട ശ്രമമായാണ് നയതന്ത്രലോകം ഇതിനെ വിലയിരുത്തുന്നത്.

അതേസമയം, ഹോർമുസ് കടലിടുക്ക് വീണ്ടും തുറക്കുന്നതിനായി ഇറാൻ ഭരണകൂടത്തിന് നല്‍കിയിരുന്ന സമയപരിധി അമേരിക്കൻ പ്രസിഡന്റ് ഡോണള്‍ഡ് ട്രംപ് 24 മണിക്കൂർ കൂടി നീട്ടി നല്‍കിയിട്ടുണ്ട്. ചൊവ്വാഴ്ച കിഴക്കൻ സമയം രാത്രി 8 മണി വരെയാണ് പുതിയ അന്ത്യശാസനം. തന്റെ ട്രൂത്ത് സോഷ്യല്‍ പ്ലാറ്റ്‌ഫോമിലൂടെ നടത്തിയ നിഗൂഢമായ പോസ്റ്റില്‍, ഇറാൻ വഴങ്ങിയില്ലെങ്കില്‍ രാജ്യത്തെ പവർ പ്ലാന്റുകളും പാലങ്ങളും ഉള്‍പ്പെടെയുള്ള അടിസ്ഥാന സൗകര്യങ്ങള്‍ തകർക്കുമെന്ന കടുത്ത ഭീഷണിയാണ് ട്രംപ് ഉയർത്തിയത്. “ഫക്കിംഗ് സ്ട്രെയിറ്റ് തുറക്കൂ, അല്ലെങ്കില്‍ നിങ്ങള്‍ നരകത്തില്‍ ജീവിക്കേണ്ടി വരും” എന്നായിരുന്നു ട്രംപിന്റെ മുന്നറിയിപ്പ്.

ഫെബ്രുവരി 28-ന് അമേരിക്ക-ഇസ്രയേല്‍ ബോംബാക്രമണം ആരംഭിച്ചതിനെത്തുടർന്ന് ലോകത്തെ ഏറ്റവും പ്രധാനപ്പെട്ട എണ്ണക്കടത്ത് പാതയായ ഹോർമുസ് കടലിടുക്ക് ഇറാൻ ഉപരോധിച്ചിരിക്കുകയാണ്. ഇത് ആഗോളതലത്തില്‍ വലിയ ഇന്ധന പ്രതിസന്ധിക്കും എണ്ണവില വർധനവിനും കാരണമായിട്ടുണ്ട്. അമേരിക്കയിലെ തിരഞ്ഞെടുപ്പ് വർഷത്തില്‍ ഈ സാമ്പത്തിക ആഘാതം ട്രംപിന് മേല്‍ വലിയ രാഷ്ട്രീയ സമ്മർദ്ദം ചെലുത്തുന്നുണ്ട്. ട്രംപിന്റെ ഭീഷണി യുദ്ധക്കുറ്റമാണെന്ന് ഇറാൻ വിശേഷിപ്പിക്കുമ്പോള്‍, സമാധാന ചർച്ചകളിലൂടെ വലിയൊരു ദുരന്തം ഒഴിവാക്കാനാകുമെന്ന പ്രതീക്ഷയിലാണ് ലോകരാജ്യങ്ങള്‍. ചൊവ്വാഴ്ച രാത്രിയോടെ ഈ നയതന്ത്ര പോരാട്ടത്തില്‍ ഒരു വ്യക്തത വരുമെന്നാണ് കരുതപ്പെടുന്നത്.

NB: ഈ വാർത്തയില്‍ ഉപയോഗിച്ചിരിക്കുന്ന ചിത്രം പ്രതീകാത്മകമാണ്. (Generated by AI)