ജാവ, യെസ്ഡി , ബിഎസ്‌എ എന്നീ പ്രമുഖ ബ്രാൻഡുകളുടെ ഉടമസ്ഥരായ കമ്പനി, വർദ്ധിച്ചുവരുന്ന റെട്രോ-ലൈഫ്‌സ്റ്റൈല്‍ മോട്ടോർസൈക്കിളുകളുടെ ആവശ്യം പരിഗണിച്ചാണ് ഈ വിപുലീകരണത്തിന് പദ്ധതിയിടുന്നത്.

വാഹൻ ഡാറ്റ പ്രകാരം, ഇന്ത്യയിലെ മികച്ച 10 ഇരുചക്ര വാഹന നിർമ്മാതാക്കളുടെ പട്ടികയില്‍ ക്ലാസിക് ലെജൻഡ്‌സ് അടുത്തിടെ ഇടംപിടിച്ചിരുന്നു. ഓണ്‍-റോഡ് യാത്രകള്‍ക്കും ലഘുവായ ഓഫ്-റോഡ് സാഹസികതകള്‍ക്കും ഒരുപോലെ അനുയോജ്യമായ ‘സ്‌ക്രാംബ്ലർ’ വിഭാഗത്തിലാണ് കമ്പനി ഇനി കൂടുതല്‍ ശ്രദ്ധ കേന്ദ്രീകരിക്കുകയെന്ന് പിടിഐ റിപ്പോർട്ട് ചെയ്യുന്നു. 2026 സാമ്പത്തിക വർഷത്തില്‍ വോളിയം വില്‍പ്പനയില്‍ 39 ശതമാനം വാർഷിക വളർച്ച കൈവരിച്ച കമ്പനി, 45,000-ത്തിലധികം യൂണിറ്റുകളുടെ രജിസ്‌ട്രേഷൻ പൂർത്തിയാക്കി മികച്ച മുന്നേറ്റമാണ് നടത്തിയത്.

വരാനിരിക്കുന്ന പുതിയ മോഡലുകളെക്കുറിച്ചുള്ള കൂടുതല്‍ വിവരങ്ങള്‍ കമ്പനി ഇപ്പോള്‍ വെളിപ്പെടുത്തിയിട്ടില്ലെങ്കിലും, നിലവിലുള്ള പോർട്ട്‌ഫോളിയോ കൂടുതല്‍ കരുത്തുറ്റതാക്കാനാണ് തങ്ങള്‍ ലക്ഷ്യമിടുന്നതെന്ന് ക്ലാസിക് ലെജൻഡ്‌സ് സഹസ്ഥാപകൻ അനുപം തരേജ പറഞ്ഞു. ബിഎസ്‌എ, യെസ്ഡി തുടങ്ങിയ ബ്രാൻഡുകള്‍ക്ക് സ്‌ക്രാംബ്ലർ വിഭാഗത്തില്‍ വലിയ ചരിത്രപരമായ പാരമ്പര്യമുണ്ട്. മിക്സഡ്-ടെറൈൻ റൈഡിംഗിന് അനുയോജ്യമായ രീതിയില്‍ മോട്ടോർസൈക്കിളുകള്‍ രൂപപ്പെടുത്തിയ ആദ്യകാല ബ്രാൻഡുകളിലൊന്നാണിവ.

പ്രീമിയം മോട്ടോർസൈക്കിള്‍ മേഖലയില്‍ മത്സരം കടുക്കുന്ന സാഹചര്യത്തില്‍, തങ്ങളുടെ വളർച്ചാ നിരക്ക് നിലനിർത്താനും പുതിയ ഉപഭോക്താക്കളെ ആകർഷിക്കാനും ഈ വിപുലീകരണം കമ്പനിയെ സഹായിക്കുമെന്നാണ് വിലയിരുത്തപ്പെടുന്നത്. വരും വർഷങ്ങളില്‍ കൂടുതല്‍ നൂതനമായ മോഡലുകള്‍ ക്ലാസിക് ലെജൻഡ്‌സില്‍ നിന്ന് പ്രതീക്ഷിക്കാം.