അമിതമായ അളവില്‍ മെർക്കുറി കണ്ടെത്തിയതിനെത്തുടർന്ന് മൂന്ന് ബ്യൂട്ടി ക്രീമുകള്‍ക്ക് മഹാരാഷ്ട്ര ഫുഡ് ആൻഡ് ഡ്രഗ് അഡ്മിനിസ്ട്രേഷൻ (FDA) നിരോധനം ഏർപ്പെടുത്തി. ‘ഫേസ് ഫ്രഷ് ഗോള്‍ഡ്’, ‘ഗോള്‍ഡൻ സ്റ്റാർ ബ്യൂട്ടി ക്രീം’, പാകിസ്താൻ നിർമിതമായ ‘ഗോറി ബ്യൂട്ടി ക്രീം’ എന്നിവയാണ് നിരോധിക്കപ്പെട്ടവ.

സംരംഭകനായ ചിരാഗ് ഭർജാട്യ സമൂഹമാധ്യമത്തിലൂടെ പങ്കുവെച്ച വിവരമാണ് അധികൃതരെ ഈ വിഷയത്തിലേക്ക് എത്തിച്ചത്. നാഗ്പൂരില്‍ നിന്നുള്ള 18 സ്ത്രീകളാണ് കഴിഞ്ഞ രണ്ട് വർഷത്തിനിടെ വൃക്കസംബന്ധമായ രോഗങ്ങളാല്‍ ചികിത്സ തേടിയത്. ഇവർ പതിവായി ‘ഗോറി ബ്യൂട്ടി ക്രീം’ ഉപയോഗിച്ചിരുന്നതായി കണ്ടെത്തി. പരാതികളുടെ അടിസ്ഥാനത്തില്‍ FDA നടത്തിയ ലബോറട്ടറി പരിശോധനയില്‍ ക്രീമില്‍ അനുവദനീയമായതിനേക്കാള്‍ 752 മടങ്ങ് അധികം മെർക്കുറി അടങ്ങിയിട്ടുണ്ടെന്ന് തെളിഞ്ഞു.

ഈ ഉത്പന്നങ്ങള്‍ പലതും എക്സ്പയറി ഡേറ്റ് പോലുമില്ലാതെയാണ് ഇ-കൊമേഴ്സ് പ്ലാറ്റ്‌ഫോമുകള്‍ വഴി വിറ്റഴിക്കുന്നത്. മെർക്കുറി അടങ്ങിയ സൗന്ദര്യവർധക വസ്തുക്കള്‍ ദീർഘകാലം ഉപയോഗിക്കുന്നത് വൃക്ക, നാഡീവ്യൂഹം, മറ്റ് അവയവങ്ങള്‍ എന്നിവയ്ക്ക് സാരമായ തകരാറുകള്‍ വരുത്തുമെന്ന് അധികൃതർ മുന്നറിയിപ്പ് നല്‍കുന്നു. ചർമത്തിലെ മെലാനിൻ ഉത്പാദനം തടയാൻ നിയമവിരുദ്ധമായാണ് മെർക്കുറി ചേർക്കുന്നത്. ഇത് ചർമത്തിലൂടെ ശരീരത്തില്‍ ആഗിരണം ചെയ്യപ്പെടുകയും ക്രമേണ വൃക്കകളുടെ പ്രവർത്തനം താറുമാറാക്കുകയും ചെയ്യുന്നു.

സംസ്ഥാനത്ത് ഈ ക്രീമുകള്‍ വില്‍ക്കുന്നത് ശ്രദ്ധയില്‍പ്പെട്ടാല്‍ ഉടനടി അധികൃതരെ അറിയിക്കണമെന്ന് നിർദ്ദേശമുണ്ട്. സൗന്ദര്യത്തിന് വേണ്ടിയുള്ള ഈ അമിത താല്പര്യം ആരോഗ്യത്തിന് മാരകമായ ഭീഷണി ഉയർത്തുന്നുവെന്നത് ഗൗരവമായി കാണേണ്ട വിഷയമാണ്. അംഗീകൃതമല്ലാത്ത ക്രീമുകള്‍ വാങ്ങി ഉപയോഗിക്കുന്നത് സ്വന്തം ജീവൻ അപകടത്തിലാക്കുന്നതിന് തുല്യമാണെന്ന് തിരിച്ചറിയുക.