റിപ്പോർട്ടുകള്‍ പ്രകാരം ഏപ്രില്‍ 12-ഓടെ ഫലം പുറത്തുവരാനാണ് സാധ്യത. ഒന്ന്, രണ്ട് വർഷങ്ങളിലായി പരീക്ഷ എഴുതിയ 9.97 ലക്ഷം വിദ്യാർത്ഥികള്‍ ബോർഡിന്റെ ഔദ്യോഗിക വെബ്‌സൈറ്റ് വഴി ഫലം പരിശോധിക്കാൻ തയ്യാറെടുക്കുകയാണ്.

ഫെബ്രുവരി 25 മുതല്‍ മാർച്ച്‌ 18 വരെ നടന്ന പരീക്ഷകളുടെ മൂല്യനിർണ്ണയ നടപടികള്‍ അവസാന ഘട്ടത്തിലാണ്. വിദ്യാർത്ഥികള്‍ക്ക് അവരുടെ ഹാള്‍ ടിക്കറ്റ് നമ്പറുകള്‍ ഉപയോഗിച്ച്‌ ഓണ്‍ലൈനായും എസ്.എം.എസ് വഴിയും ഡിജിലോക്കർ വഴിയും ഫലം അറിയാൻ സാധിക്കും. ജനറല്‍, വൊക്കേഷണല്‍ വിഭാഗങ്ങളുടെ ഫലം ഒരേസമയം പ്രസിദ്ധീകരിക്കും. ഓരോ വിഷയത്തിലും കുറഞ്ഞത് 35 ശതമാനം മാർക്ക് നേടുന്നവർക്കാണ് ഉപരിപഠനത്തിന് അർഹതയുണ്ടാവുക.

ഫലത്തില്‍ തൃപ്തരല്ലാത്തവർക്ക് പുനർമൂല്യനിർണ്ണയത്തിന് അപേക്ഷിക്കാനും സൗകര്യമുണ്ടാകും. ഒന്നോ രണ്ടോ വിഷയങ്ങളില്‍ പരാജയപ്പെട്ടവർക്കായി ജൂണ്‍ അല്ലെങ്കില്‍ ജൂലൈ മാസങ്ങളില്‍ സപ്ലിമെന്ററി പരീക്ഷകള്‍ നടത്തുന്നതാണ്. കഴിഞ്ഞ വർഷം 71.37 ശതമാനമായിരുന്നു വിജയം.