ആഗ്ര-ലഖ്‌നൗ, പൂർവാഞ്ചല്‍, ബുന്ദേല്‍ഖണ്ഡ്, ഗോരഖ്പൂർ ലിങ്ക് എന്നീ നാല് പ്രധാന എക്‌സ്‌പ്രസ്‌വേകളിലാണ് ഉത്തർപ്രദേശ് എക്‌സ്‌പ്രസ്‌വേ ഇൻഡസ്ട്രിയല്‍ ഡെവലപ്‌മെന്റ് അതോറിറ്റി നിരക്ക് വർദ്ധനവ് നടപ്പിലാക്കിയത്. 2025-26 സാമ്പത്തിക വർഷത്തെ അപേക്ഷിച്ച്‌ മിക്ക വാഹന വിഭാഗങ്ങളിലും നേരിയ വർദ്ധനവാണ് ഇത്തവണ ഉണ്ടായിരിക്കുന്നത്.

ആഗ്ര-ലഖ്‌നൗ എക്‌സ്‌പ്രസ്‌വേയില്‍ കാറുകള്‍ക്കും ജീപ്പുകള്‍ക്കും നേരത്തെ ഉണ്ടായിരുന്ന 665 രൂപയില്‍ നിന്ന് 675 രൂപയായി നിരക്ക് ഉയർന്നു. ഇതേ പാതയില്‍ ബസുകള്‍ക്കും ട്രക്കുകള്‍ക്കും 2,150 രൂപയാണ് പുതുക്കിയ ടോള്‍. എന്നാല്‍ പൂർവാഞ്ചല്‍, ബുന്ദേല്‍ഖണ്ഡ് എക്‌സ്‌പ്രസ്‌വേകളില്‍ കാറുകള്‍ക്കും മറ്റ് ഭാരം കുറഞ്ഞ വാഹനങ്ങള്‍ക്കും നിലവിലുള്ള നിരക്കില്‍ മാറ്റം വരുത്തിയിട്ടില്ല എന്നത് സാധാരണക്കാരായ യാത്രക്കാർക്ക് ആശ്വാസകരമാണ്. അതേസമയം, ഈ പാതകളില്‍ വലിയ വാണിജ്യ വാഹനങ്ങള്‍ക്കും ബസുകള്‍ക്കും ചെറിയ രീതിയിലുള്ള വർദ്ധനവ് ഏർപ്പെടുത്തിയിട്ടുണ്ട്.

ഭാരമേറിയ വാഹനങ്ങള്‍ക്കും മള്‍ട്ടി-ആക്‌സില്‍ വാഹനങ്ങള്‍ക്കുമാണ് ടോള്‍ പരിഷ്കരണത്തില്‍ വലിയ മാറ്റങ്ങള്‍ പ്രകടമാകുന്നത്. ഏഴോ അതിലധികമോ ആക്‌സിലുകളുള്ള വലിയ വാഹനങ്ങള്‍ക്ക് ആഗ്ര-ലഖ്‌നൗ പാതയില്‍ 4,230 രൂപ വരെ ടോള്‍ നല്‍കേണ്ടി വരും. എക്‌സ്‌പ്രസ്‌വേയുടെ തുടക്കം മുതല്‍ ഒടുക്കം വരെയുള്ള മുഴുവൻ ദൂരവും സഞ്ചരിക്കുന്ന ഒറ്റ യാത്രകള്‍ക്കാണ് ഈ പുതിയ നിരക്കുകള്‍ ബാധകമാകുന്നത്. സംസ്ഥാനത്തെ റോഡ് ശൃംഖലയുടെ അറ്റകുറ്റപ്പണികള്‍ക്കും വികസന പ്രവർത്തനങ്ങള്‍ക്കുമായിട്ടാണ് ഈ സാമ്പത്തിക വർഷത്തില്‍ നിരക്കുകള്‍ പുതുക്കി നിശ്ചയിച്ചതെന്ന് അധികൃതർ വ്യക്തമാക്കി.