എ സി മിലാന് അവരുടെ ഗംഭീര ഫോം തുടരുകയാണ്. അവര് ഇന്ന് ഒരു വിജയം കൂടെ നേടിയതോടെ അവരുടെ അപരാജിത കുതിപ്പ് 22 മത്സരങ്ങളായി. ഇന്ന് യൂറോപ്പ ലീഗ് ഗ്രൂപ്പ് ഘട്ടത്തിലെ രണ്ടാം മത്സരത്തില് സ്പാര്ട പ്രാഹയെ ആണ് എ സി മിലാന് തോല്പ്പിച്ചത്. എതിരില്ലാത്ത മൂന്നു ഗോളുകള്ക്കായിരുന്നു പിയോളിയുടെ ടീം ഇന്ന് വിജയിച്ചത്. സ്ലാട്ടാന് ഇബ്രഹിമോവിച് പെനാള്ട്ടി നഷ്ടപ്പെടുത്തിയിട്ടും ഈ വലിയ വിജയം നേടാന് മിലാനായി.
ഇന്ന് 21കാരനായ ബ്രാഹിം ഡിയസിന്റെ ഗോളിലാണ് മിലാന് ആദ്യം ലീഡ് എടുത്തത്. 24ആം മിനുട്ടില് ഇബ്രഹിമോവിചിന്റെ പാസില് നിന്നായിരുന്നു ബ്രാഹിമിന്റെ ഗോള്. 36ആം മിനുട്ടില് ആയിരുന്നു മിലാന് പെനാള്ട്ടി ലഭിച്ചത്.
പക്ഷെ ഇബ്രയുടെ കിക്ക് ബാറി തട്ടി പുറത്ത് പോയി. രണ്ടാം പകുതിയില് റാഫേല് ലിയോയിലൂടെ മിലാന് ലീഡ് ഇരട്ടിയാക്കി. മാഞ്ചസ്റ്റര് യുണൈറ്റഡില് നിന്ന് ലോണ് അടിസ്ഥാനത്തില് മിലാനില് എത്തിയ ഡാലോട്ട് ആണ് രണ്ടാം ഗോള് ഒരുക്കിയത്. 67ആം മിനുട്ടില് ഗോള് നേടിക്കൊണ്ട് ഡാലോട്ട് തന്റെ അരങ്ങേറ്റം ഗംഭീരമാക്കി മാറ്റി. രണ്ട് വിജയങ്ങളില് 6 പോയിന്റുമായി മിലാന് ഇപ്പോള് ഗ്രൂപ്പില് ഒന്നാമത് നില്ക്കുകയാണ്.