കെ.സി.എല്ലില് ശക്തമായൊരു തിരിച്ചുവരവ് ലക്ഷ്യമിട്ട് മൂന്നാം സീസണായി തയ്യാറെടുക്കുകയാണ് ട്രിവാണ്ഡ്രം റോയല്സ്.
കഴിഞ്ഞ സീസണിലെ പിഴവുകളില് നിന്ന് പാഠം ഉള്ക്കൊണ്ട്, കൃത്യമായ തയ്യാറെടുപ്പുകളോടെയാണ് ട്രിവാണ്ഡ്രം റോയല്സ് ഇത്തവണ കളിക്കാനിറങ്ങുന്നത്. ബാറ്റിങ്ങിലും ബൗളിങ്ങിലും ഒരേപോലെ കരുത്തുള്ള സന്തുലിതമായൊരു ടീമാണ് ഇത്തവണ റോയല്സിന്റേത്.
കഴിഞ്ഞ സീസണിലെ ക്യാപ്റ്റനായ കൃഷ്ണപ്രസാദ് തന്നെയാണ് ഇത്തവണയും ടീമിനെ നയിക്കുന്നത്. ഒരു സെഞ്ചുറിയടക്കം 479 റണ്സ് നേടിയ കൃഷ്ണപ്രസാദായിരുന്നു കഴിഞ്ഞ സീസണില് ലീഗിലെ ടോപ് സ്കോറർ. കൃഷ്ണപ്രസാദ് ഒഴികെയുള്ള താരങ്ങള്ക്ക് ബാറ്റിങ്ങില് സ്ഥിരത പുലർത്താൻ കഴിയാതെ പോയതാണ് കഴിഞ്ഞ തവണ ടീമിന്റെ കുതിപ്പിന് തടയിട്ടത്. എന്നാല് ലേലത്തിലൂടെ വെടിക്കെട്ട് ബാറ്റർ വിഷ്ണു വിനോദിനെ ടീമിലെത്തിച്ചതോടെ റോയല്സിന്റെ ബാറ്റിങ് നിരയുടെ ചിത്രം തന്നെ മാറിയിട്ടുണ്ട്. ഐ.പി.എല്ലില് പഞ്ചാബ് കിങ്സിന്റെ താരമായ വിഷ്ണു വിനോദ്, വിജയ് ഹസാരെ ട്രോഫിയിലടക്കം കഴിഞ്ഞ സീസണില് തകർപ്പൻ പ്രകടനമായിരുന്നു കാഴ്ചവെച്ചത്. കഴിഞ്ഞ രണ്ട് സീസണിലും ഏറ്റവും കൂടുതല് റണ്സ് നേടിയ താരങ്ങളിലൊരാള് കൂടിയായ വിഷ്ണുവിന്റെ സാന്നിധ്യം ബാറ്റിങ് നിരയുടെ ആത്മവിശ്വാസം ഉയർത്തിയിട്ടുണ്ട്.
മധ്യനിരയില് അണിനിരക്കുന്നത് സ്ഥിരതയാർന്ന ബാറ്റിങ്ങിലൂടെ ശ്രദ്ധേയരായ ഗോവിന്ദ് ദേവ് പൈയും അക്ഷയ് മനോഹറുമാണ്. അടുത്തിടെ സമാപിച്ച എൻ.എസ്.കെ ട്രോഫിയില് 36 പന്തുകളില് 87 റണ്സ് നേടി ശ്രദ്ധേയനായ സുധീഷ് മോഹനും ഇത്തവണ റോയല്സ് നിരയിലുണ്ട്. ബാറ്റിങ്ങില് തകർപ്പൻ പ്രകടനം പുറത്തെടുക്കുന്നതിനൊപ്പം, വിക്കറ്റിന് പിന്നിലും തിളങ്ങുന്ന വിക്കറ്റ് കീപ്പർ ബാറ്റർമാരായ ഉജ്വല് കൃഷ്ണയും ഭരത് സൂര്യയും കൂടി ചേരുമ്പോള് ആഴവും വൈവിധ്യവുമുള്ളൊരു ബാറ്റിങ് നിരയാണ് ഇത്തവണ റോയല്സിന്റേത്.
അനുഭവസമ്പത്തും യുവത്വവും സമന്വയിക്കുന്ന മികച്ചൊരു ഓള്റൗണ്ട് നിരയാണ് റോയല്സിന്റെ മറ്റൊരു കരുത്ത്. സീനിയർ താരങ്ങളായ സി.വി. വിനോദ് കുമാറിനെയും മുൻ കേരള ക്യാപ്റ്റൻ സിജോമോൻ ജോസഫിനെയും ടീമിലെത്തിക്കാൻ കഴിഞ്ഞത് ബാറ്റിങ്ങിലും ബൗളിങ്ങിലും ടീമിന് മുതല്ക്കൂട്ടാകും. എം. നിഖില്, അഭിഷേക് പി. നായർ തുടങ്ങിയ താരങ്ങളും ഓള്റൗണ്ടർമാരായി ഇത്തവണ ടീമിനൊപ്പമുണ്ട്. ഇത്തവണത്തെ എൻ.എസ്.കെ ട്രോഫിയില് തകർപ്പൻ ഓള്റൗണ്ട് പ്രകടനങ്ങളിലൂടെ നിഖില് ശ്രദ്ധേയനായിരുന്നു.
കഴിഞ്ഞ തവണത്തെ അപേക്ഷിച്ച് ബൗളിങ് നിരയും ഇത്തവണ മൂർച്ചയേറിയതാണ്. ബേസില് എൻ.പിയും രാഹുല് ചന്ദ്രനും നേതൃത്വം നല്കുന്ന പേസ് ബൗളിങ് നിരയില് വിനോദ് കുമാറും ശ്രീഹരി നായരും കൂടിയുണ്ട്. പവർപ്ലേയിലും ഡെത്ത് ഓവറുകളിലും വിക്കറ്റ് വീഴ്ത്താൻ ശേഷിയുള്ള ഈ കൂട്ടുകെട്ടിനൊപ്പം വി. അജിത്തും സിജോമോൻ ജോസഫും കൂടി ചേരുമ്പോള് എതിരാളികള്ക്ക് വെല്ലുവിളി ഉയർത്താൻ പോന്ന മികച്ചൊരു ബൗളിങ് നിരയാണ് റോയല്സിന്റേത്.
അഭിഷേക് മോഹനാണ് ടീമിന്റെ മുഖ്യ പരിശീലകൻ. അസിസ്റ്റന്റ് കോച്ചുമാരായി മദൻ മോഹൻ, അതുല് ഡയമണ്ട് എന്നിവരും ടീമിനൊപ്പമുണ്ട്. വരുണ് എസ്. എസ്. (ഫിസിയോ), അഖില് ചിന്തു (സ്ട്രെങ്ത് & കണ്ടീഷനിങ് കോച്ച്), സൂരജ് നായർ (ടീം മാനേജർ) എന്നിവരാണ് സപ്പോർട്ട് സ്റ്റാഫ് അംഗങ്ങള്. ജോസ് പട്ടാറ, എസ്. പ്രിയദർശൻ, കീർത്തി സുരേഷ്, റിയാസ് ആദം, ഷിബു മാത്തായി, ടോം ജോസഫ്, സലീല് ഗുപ്ത എന്നിവരാണ് ടീമിന്റെ ഉടമകള്.
ടീം അംഗങ്ങള്: കൃഷ്ണപ്രസാദ് (ക്യാപ്റ്റൻ), സിജോമോൻ ജോസഫ് (വൈസ് ക്യാപ്റ്റൻ), വിഷ്ണു വിനോദ്, ഗോവിന്ദ് ദേവ് പൈ, അജിത്ത് വാസുദേവൻ, അഭിഷേക് പി. നായർ, വിനോദ് കുമാർ സി.വി., അക്ഷയ് മനോഹർ, നിഖില് എം., ബേസില് എൻ.പി., രാഹുല് ചന്ദ്രൻ, ശ്രീഹരി നായർ, അജീഷ് കെ., ഭരത് സൂര്യ, സുധീഷ് മോഹൻ, ഉജ്വല് കൃഷ്ണ.