മസ്കത്ത്: ( gcc.truevisionnews.com ) ഒമാനിലെ നോർത്ത് അല്‍ ബാത്തിന ഗവർണറേറ്റിലെ ലിവ വിലായത്തില്‍ വൻ പുകയില വേട്ട.

ഉപഭോക്തൃ സംരക്ഷണ അതോറിറ്റിയും (CPA) റോയല്‍ ഒമാൻ പൊലീസും സംയുക്തമായി നടത്തിയ റെയ്ഡില്‍ 800 കിലോയിലധികം പുകരഹിത പുകയില ഉല്‍പന്നങ്ങള്‍ പിടിച്ചെടുത്തു. സംഭവവുമായി ബന്ധപ്പെട്ട് ഒരാളെ അറസ്റ്റ് ചെയ്തു.

ലിവയിലെ ഒരു കൃഷിത്തോട്ടം കേന്ദ്രീകരിച്ചായിരുന്നു പുകയില ഉല്‍പന്നങ്ങളുടെ അനധികൃത നിർമാണവും വിതരണവും നടന്നിരുന്നത്. സംശയാസ്പദമായ നീക്കങ്ങളെക്കുറിച്ച്‌ ലഭിച്ച രഹസ്യ വിവരത്തിന്റെ അടിസ്ഥാനത്തില്‍ നടത്തിയ അന്വേഷണത്തിനൊടുവിലായിരുന്നു റെയ്ഡ്. 800 കിലോയിലധികം 'ഗാലിയൂണ്‍' മരം, വിപണനത്തിന് തയ്യാറാക്കിയ 80 കിലോ പുകയില, 20 കിലോ പൊടിച്ച പുകയില, 43 കിലോ 'ഷമ്മ', 112 കിലോ 'നൗറ' എന്നിവയും പുകയില ഉല്‍പന്നങ്ങള്‍ നിർമിക്കാനും മിക്സ് ചെയ്യാനും ഉപയോഗിച്ചിരുന്ന മൂന്ന് യന്ത്രങ്ങളും പിടിച്ചെടുത്തു.

പിടിച്ചെടുത്ത സാധനങ്ങള്‍ നിയമപരമായ നടപടിക്രമങ്ങള്‍ പാലിച്ചുകൊണ്ട് നശിപ്പിക്കുമെന്ന് ഉപഭോക്തൃ സംരക്ഷണ അതോറിറ്റി അറിയിച്ചു. പിടിയിലായ പ്രതിക്കെതിരെ കൂടുതല്‍ അന്വേഷണം നടത്തി വരികയാണെന്നും തുടർനടപടികള്‍ക്കായി കേസ് ബന്ധപ്പെട്ട അധികൃതർക്ക് കൈമാറുമെന്നും പൊലീസ് വ്യക്തമാക്കി. പുകയില ഉല്‍പന്നങ്ങളുടെ നിയമവിരുദ്ധ വില്‍പനയ്ക്കും നിർമാണത്തിനുമെതിരെ കർശന നടപടി തുടരുമെന്നും അതോറിറ്റി അറിയിച്ചു.