മൈത്രി മൂവി മേക്കേഴ്സ് നിർമ്മിക്കുന്ന ഈ ചിത്രത്തിന്റെ ഷൂട്ടിംഗ് പൂർത്തിയായ വിവരം അണിയറപ്രവർത്തകർ സോഷ്യല്‍ മീഡിയയിലൂടെയാണ് പങ്കുവെച്ചത്.

റായലസീമയിലെ ലൊക്കേഷനുകളില്‍ താരങ്ങള്‍ക്ക് ലഭിച്ച ആവേശോജ്ജ്വലമായ സ്വീകരണത്തിന്റെ ദൃശ്യങ്ങള്‍ ഇതിനോടകം തന്നെ ഇന്റർനെറ്റില്‍ തരംഗമായിട്ടുണ്ട്. രാഹുല്‍ സങ്കൃത്യൻ സംവിധാനം ചെയ്യുന്ന ചിത്രം സെപ്റ്റംബർ 11-ന് ലോകമെമ്പാടുമുള്ള തിയേറ്ററുകളില്‍ പ്രദർശനത്തിനെത്തും.

പത്തൊൻപതാം നൂറ്റാണ്ടിലെ ബ്രിട്ടീഷ് ഭരണകാലത്ത് ഇന്ത്യയില്‍ നടന്ന, ചരിത്രപുസ്തകങ്ങളില്‍ അധികം രേഖപ്പെടുത്താത്ത ക്രൂരതകളെയും വംശഹത്യകളെയും ആസ്പദമാക്കിയാണ് ചിത്രം ഒരുങ്ങുന്നത്. സർ റിച്ചാർഡ് ടെമ്പിളിനെപ്പോലുള്ള ഉദ്യോഗസ്ഥരുടെ ഭരണത്തിന് കീഴില്‍ ഇന്ത്യ നേരിട്ട സാമ്പത്തിക ചൂഷണവും വരള്‍ച്ചയും ചിത്രം ഗൗരവകരമായി ചർച്ച ചെയ്യുന്നുണ്ട്.

ഹോളിവുഡ് താരം അർനോള്‍ഡ് വോസ്ലൂ വില്ലൻ വേഷത്തിലെത്തുന്ന ചിത്രത്തില്‍ 'രണബാലി' എന്ന പോരാളിയായി വിജയ് ദേവരകൊണ്ടയും 'ജയമ്മ'യായി രശ്മിക മന്ദാനയും എത്തുമ്പോള്‍ ആരാധകർ വലിയ പ്രതീക്ഷയിലാണ്.

ഇതൊരു ബയോപിക് അല്ലെന്നും മറച്ചുവെക്കപ്പെട്ട ചരിത്രരേഖകളുടെയും വാമൊഴികളുടെയും സിനിമാറ്റിക് പുനരാവിഷ്കാരമാണെന്നും നിർമ്മാതാക്കളായ നവീൻ യെർനേനിയും വൈ. രവിശങ്കറും വ്യക്തമാക്കിയിട്ടുണ്ട്.

അജയ്-അതുല്‍ സംഗീതം നിർവ്വഹിക്കുന്ന ചിത്രത്തിന് നീരവ് ഷായാണ് ക്യാമറ ചലിപ്പിക്കുന്നത്. പാൻ-ഇന്ത്യൻ തലത്തില്‍ വമ്പൻ റിലീസിനൊരുങ്ങുന്ന 'രണബാലി'യുടെ പോസ്റ്റ് പ്രൊഡക്ഷൻ ജോലികള്‍ ഇപ്പോള്‍ പുരോഗമിക്കുകയാണ്.

ടി-സീരീസിന്റെ സഹകരണത്തോടെ പുറത്തിറങ്ങുന്ന ഈ ചിത്രം ഇന്ത്യൻ സിനിമയിലെ തന്നെ ഈ വർഷത്തെ ഏറ്റവും വലിയ പ്രോജക്റ്റുകളില്‍ ഒന്നായാണ് വിലയിരുത്തപ്പെടുന്നത്.

Vijay Deverakonda - Rashmika's film 'Ranabali' is gearing up for release