ദുബായ്: (gcc.truevisionnews.com) പുറത്ത് വേനല്‍ച്ചൂട് കനക്കുമ്പോഴും അകത്ത് നിറയുന്നത് ഈന്തപ്പഴത്തിന്റെ മധുരവും പൈതൃകത്തിന്റെ ഗന്ധവുമാണ്. ദുബായ്-അല്‍ഐൻ റോഡിലെ ഖലഅത്ത് അല്‍ റിമാലില്‍ നടന്നുവരുന്ന മൂന്നാം പതിപ്പ് ദുബായ് ഡേറ്റ്സ് ഫെസ്റ്റിവലിലേക്ക് കടുത്ത ചൂടിനെ പോലും അവഗണിച്ച്‌ വലിയ ജനപ്രവാഹമാണ് എത്തുന്നത്.

പ്രത്യേകിച്ച്‌ വാരാന്ത്യങ്ങളില്‍ മേളയില്‍ സന്ദർശകരുടെ തിരക്ക് വൻതോതില്‍ വർധിച്ചു. ഈന്തപ്പന കൃഷിയുടെ പൈതൃകവും യുഎഇയിലെ കർഷകരുടെ കഠിനാധ്വാനവും ആഘോഷമാക്കുന്ന ഈ മേള നാളെയോടെ സമാപിക്കും.

15 വിഭാഗങ്ങളില്‍ മത്സരം

രാജ്യത്തെ മികച്ച ഈന്തപ്പഴം ഉത്പാദിപ്പിക്കുന്ന കർഷകരെ കണ്ടെത്തുന്നതിനായി 15 വിഭാഗങ്ങളിലായാണ് മത്സരം സംഘടിപ്പിച്ചത്. മികച്ച ഈന്തപ്പഴം, മികച്ച പാക്കേജിങ്, മികച്ച കൃഷിരീതികള്‍ എന്നിവയെല്ലാം മത്സരത്തിന്റെ ഭാഗമാണ്.

മൂന്ന് ജനറല്‍ വിഭാഗങ്ങളിലെ വിജയികളെ ഇതിനകം ആദരിച്ചു. രാജ്യത്തെ ഈന്തപ്പഴ കർഷകരുടെ മികവിന് അംഗീകാരം നല്‍കുന്ന പ്രധാന വേദി കൂടിയാണ് ഈ ഫെസ്റ്റിവല്‍.ഇത്തവണത്തെ പ്രത്യേകത 'ഹോം ഡേറ്റ്' മത്സരം കൂടി ഉള്‍പ്പെടുത്തിയതാണ്.

വീടുകളില്‍ ഈന്തപ്പഴം കൃഷി ചെയ്യുന്നവർക്കായി പ്രത്യേകം ഒരുക്കിയ ഈ വിഭാഗത്തില്‍ ഉയർന്ന സ്കോർ നേടുന്നവർക്ക് പ്രത്യേക പുരസ്കാരങ്ങള്‍ നല്‍കും. സാധാരണ കർഷകർക്ക് പുറമെ വീട്ടുതോട്ടം പ്രേമികളെയും ഈ മത്സരം വലിയ രീതിയില്‍ ആകർഷിച്ചു.പൈതൃകവും പഠനവും

ഈന്തപ്പഴത്തിന്റെ കൃഷിരീതികള്‍, വിവിധ ഇനങ്ങള്‍, സംസ്കരണ രീതികള്‍ എന്നിവ അടുത്തറിയാനുള്ള ശില്‍പശാലകളും പഠന സെഷനുകളും മേളയുടെ പ്രധാന ആകർഷണമാണ്. കുട്ടികള്‍ക്കും കുടുംബങ്ങള്‍ക്കും ഒപ്പം കൃഷി വിദഗ്ധർക്കും പ്രയോജനകരമായ നിരവധി പരിപാടികള്‍ ഇവിടെ നടക്കുന്നുണ്ട്.

പാരമ്പര്യ ഭക്ഷണങ്ങളുടെ സ്റ്റാളുകള്‍, ഈന്തപ്പഴം ഉപയോഗിച്ച്‌ തയ്യാറാക്കിയ വിവിധ ഉല്‍പന്നങ്ങളുടെ പ്രദർശനം, സാംസ്കാരിക പരിപാടികള്‍ എന്നിവയും സന്ദർശകർക്ക് ഒരുക്കിയിട്ടുണ്ട്.യുഎഇയുടെ ദേശീയ വൃക്ഷമായ ഈന്തപ്പനയുടെ പ്രാധാന്യം പുതലമുറയ്ക്ക് പരിചയപ്പെടുത്തുക എന്നതും ഈ മേളയുടെ ലക്ഷ്യമാണ്.

വേനല്‍ അവധിക്കാലത്ത് കുടുംബത്തോടൊപ്പം പോകാവുന്ന മികച്ച ഒരു സ്ഥലം കൂടിയാണ് ഖലഅത്ത് അല്‍ റിമാല്‍.നാളെ സമാപിക്കുന്ന മേള കാണാൻ ഇനിയും അവസരമുണ്ട്.

Content Highlight: Dubai Dates Festival 2026 | Al Ain Road Khalat Al Rimal Dates Competition Winners

#Latest News#Dubai Dates Festival#UAE Dates#Dubai Events#Date Palm Farming#UAE Agriculture#Dubai Food Festival