പതിനേഴാം വയസ്സില് വൈകിയ രാത്രിയില് അയച്ച ഒരു സന്ദേശമാണ് തന്റെ ജീവിതത്തിന്റെ ഗതി മാറ്റിയതെന്ന് ആദിത്യ ബൻസാല് പറയുന്നു.
2021-ല് ജെ.ഇ.ഇ (JEE) പരീക്ഷയ്ക്ക് തയ്യാറെടുക്കുന്ന സമയത്ത് തന്നെ ഓണ്ലൈനിലൂടെ പണം സമ്പാദിക്കാനുള്ള വഴികളും ആദിത്യ തിരയുന്നുണ്ടായിരുന്നു. വർഷങ്ങള്ക്കിപ്പുറം, തന്റെ 22-ാം വയസ്സില് ഒരു കോടി രൂപ വരുമാനമുള്ള ഒരു കരിയർ കെട്ടിപ്പടുക്കാൻ സഹായിച്ചത് അന്നത്തെ ആ ആദ്യത്തെ അവസരമാണെന്ന് അദ്ദേഹം വെളിപ്പെടുത്തുന്നു.
എഞ്ചിനീയറിംഗ് പഠിച്ച് ഒരു ജോലി നേടുക എന്ന സാധാരണ വഴിയേ പോകുന്നതിന് പകരം സംരംഭകത്വത്തിലും ഓണ്ലൈൻ ബിസിനസ്സുകളിലുമായിരുന്നു ആദിത്യക്ക് താല്പര്യം. ഇതിനായി ഗ്രാഫിക് ഡിസൈനിംഗ്, വെബ്സൈറ്റ് വികസനം തുടങ്ങി പല കാര്യങ്ങളും ചെയ്തു നോക്കിയെങ്കിലും അവയെല്ലാം പരാജയപ്പെടുകയായിരുന്നു.
അങ്ങനെയിരിക്കെ ഒരു രാത്രിയില്, പ്രമുഖ സംരംഭകനും പോഡ്കാസ്റ്ററുമായ രാജ് ഷമാനിയുടെ ഒരു വീഡിയോ കണ്ടതിന് ശേഷം അതിലെ ആശയങ്ങള് ഉള്പ്പെടുത്തി ആദിത്യ ട്വിറ്ററില് ഒരു ത്രെഡ് തയ്യാറാക്കി. മണിക്കൂറുകളോളം ഇരുന്ന് എഴുതിയ ആ കുറിപ്പ് രാജ് ഷമാനിക്ക് ഇൻസ്റ്റാഗ്രാമില് നേരിട്ട് സന്ദേശമായി (DM) അയച്ചു. രാത്രി 10:41-ന് അയച്ച സന്ദേശത്തിന് പുലർച്ചെ 3:53-ന് രാജ് ഷമാനി മറുപടി നല്കി. ഈ കുറിപ്പ് പോസ്റ്റ് ചെയ്തു നോക്കാമെന്നും, ജന ശ്രദ്ധ നേടിയാല് ട്വിറ്റർ ത്രെഡുകള് എഴുതാൻ ജോലിക്ക് എടുക്കാമെന്നുമായിരുന്നു മറുപടി.
ആ കുറിപ്പിന് ആയിരത്തിലധികം ലൈക്കുകള് ലഭിച്ചു. ബിരുദമോ മുൻപരിചയമോ ഇല്ലാതിരുന്ന 17 വയസ്സുകാരനായ തന്റെ കഴിവ് തിരിച്ചറിഞ്ഞ് രാജ് ഷമാനി ജോലി നല്കുകയായിരുന്നു. അന്ന് സ്വന്തമായി ബാങ്ക് അക്കൗണ്ട് ഇല്ലാതിരുന്ന ആദിത്യക്ക് ആമസോണ് ഗിഫ്റ്റ് കാർഡുകള് വഴിയാണ് ആദ്യമായി പ്രതിഫലം ലഭിച്ചത്. പണത്തേക്കാളുപരി ഒരു വലിയ പിന്തുണയാണ് രാജ് ഷമാനിയില് നിന്ന് ലഭിച്ചതെന്ന് ആദിത്യ ഓർക്കുന്നു.
പിന്നീട് രാജ് ഷമാനിക്ക് ഫുള്ടൈം ടീമിനെ ആവശ്യമായി വന്നപ്പോള് ഈ കൂട്ടുകെട്ട് അവസാനിച്ചെങ്കിലും, ആദിത്യയുടെ സേവനത്തെ പ്രശംസിച്ചുകൊണ്ട് അദ്ദേഹം നല്കിയ സാക്ഷ്യപത്രം (testimonial) വലിയൊരു വഴിത്തിരിവായി. അത് ഉപയോഗിച്ച് കൂടുതല് ക്ലയന്റുകളെ കണ്ടെത്താൻ ആദിത്യക്ക് സാധിച്ചു. ഇതുവരെ 45-ലധികം സംരംഭകരുമായി ചേർന്ന് പ്രവർത്തിച്ച ആദിത്യ 22-ാം വയസ്സില് ഒരു കോടി രൂപ വരുമാനം നേടി.
'എക്സ്' (ട്വിറ്റർ) പ്ലാറ്റ്ഫോമില് വൈറലായ ഈ കഥ, കൃത്യമായ സമയത്ത് എടുക്കുന്ന ഒരു മുൻകൈയും പരിശ്രമവും എങ്ങനെ ഒരാളുടെ ജീവിതം മാറ്റിമറിക്കാം എന്നതിന്റെ മികച്ച ഉദാഹരണമായി മാറിയിരിക്കുകയാണ്.