ജീവിതത്തിന്റെ ഏത് ഘട്ടത്തിലും പുതിയൊരു കാര്യം തുടങ്ങുന്നത് ഒരിക്കലും മോശം ആശയമല്ല. നല്ല ഉദ്ദേശ്യവും കഠിനാധ്വാനവും ആത്മാർത്ഥതയുമുള്ള ഒരു ചെറിയ ആശയത്തിന് നിങ്ങളെ എവിടെ വരെ എത്തിക്കാൻ സാധിക്കുമെന്ന് പറയാനാകില്ല.
വളരെ ചെറിയ രീതിയില് തുടങ്ങി വലിയ വിജയങ്ങള് കെട്ടിപ്പടുത്ത ധാരാളം ആളുകളുടെ കഥകള് നമ്മള് കേട്ടിട്ടുണ്ട്. സ്വപ്നം കാണുന്നതിനോ പുതിയൊരു തുടക്കത്തിനോ പ്രായമോ സമയമോ ഒരു തടസ്സമല്ലെന്ന് ഇത്തരം അനുഭവങ്ങള് നമ്മെ ഓർമ്മിപ്പിക്കുന്നു.
പട്നയില് നിന്നുള്ള ഒരു 65-കാരിയുടെ ജീവിതകഥ ഇതിനൊരു മികച്ച ഉദാഹരണമാണ്. വിശ്രമജീവിതം നയിക്കേണ്ട പ്രായത്തില്, വെറും 20 രൂപയ്ക്ക് വീട്ടിലുണ്ടാക്കുന്ന ലളിതമായ ഭക്ഷണ വിഭവങ്ങള് വിറ്റുകൊണ്ടാണ് അവർ സ്വന്തമായി ഒരു സംരംഭം ആരംഭിച്ചത്. ദേവ്നി ദേവി എന്ന ഈ വയോധികയുടെ വീട്ടിലുണ്ടാക്കിയ സ്വാദിഷ്ടമായ ഭക്ഷണത്തിന് പെട്ടെന്നുതന്നെ ആവശ്യക്കാരേറി. വിദ്യാർത്ഥികളും തൊഴിലാളികളും കുടുംബങ്ങളും ഒരുപോലെ അവരുടെ ടിഫിൻ സർവീസിനെ നെഞ്ചിലേറ്റി. ബന്ധുക്കളില് നിന്നും മറ്റും എതിർപ്പുകളും വിമർശനങ്ങളും നേരിടേണ്ടി വന്നിട്ടും, ഗുണനിലവാരത്തിലും മിതമായ വിലയിലും ശ്രദ്ധ കേന്ദ്രീകരിച്ച് അവർ മുന്നോട്ട് പോയി.
പിന്നീട് കേറ്ററിംഗ് സർവീസിലേക്കും സ്വന്തമായി ഒരു റസ്റ്റോറന്റിലേക്കും വളർന്ന ഈ ചെറിയ ആശയം, ഇന്ന് ഏകദേശം 2.5 കോടി രൂപ മൂല്യമുള്ള വലിയൊരു ഭക്ഷണ ബിസിനസായി മാറിയിരിക്കുകയാണ്. 'സ്റ്റാർട്ടപ്പ് യൂണിവേഴ്സ്' എന്ന ഇൻസ്റ്റാഗ്രാം പേജിലൂടെയാണ് ഇവരുടെ പ്രചോദനാത്മകമായ ഈ കഥ പുറംലോകമറിഞ്ഞത്. ധൈര്യവും ക്ഷമയും കഠിനാധ്വാനവുമുണ്ടെങ്കില് 20 രൂപയുടെ ഒരു ഊണിനുപോലും വലിയൊരു വിജയഗാഥയുടെ തുടക്കമാകാൻ സാധിക്കുമെന്ന് ദേവ്നി ദേവിയുടെ ജീവിതം തെളിയിക്കുന്നു.