67-ാം വയസ്സിലും അദ്ദേഹം നിലനിർത്തുന്ന ഈ ആരോഗ്യം, പെട്ടെന്നുള്ള താല്‍ക്കാലിക വഴികളിലൂടെയല്ല, മറിച്ച്‌ ദശാബ്ദങ്ങളായുള്ള നിരന്തരമായ പരിശ്രമത്തിലൂടെയാണ് ലഭിച്ചതെന്ന് തെളിയിക്കുന്നു. അദ്ദേഹം അത്താഴം ഒഴിവാക്കുന്നു അല്ലെങ്കില്‍ കടുത്ത ഭക്ഷണ നിയന്ത്രണങ്ങള്‍ പാലിക്കുന്നു എന്നൊക്കെയുള്ള പ്രചാരണങ്ങളെ തള്ളി, ദിവസവും വൈകുന്നേരം 7 മണിക്ക് തന്നെ സലാഡ്, ചോറ്, ചിക്കൻ, മീൻ എന്നിവ അടങ്ങിയ ഭക്ഷണം കഴിക്കാറുണ്ടെന്ന് നാഗാർജുന തന്നെ വ്യക്തമാക്കിയിട്ടുണ്ട്. ഇത് വെറുമൊരു താല്‍ക്കാലിക ട്രെൻഡല്ല, മറിച്ച്‌ തന്റെ ജീവിതരീതിയാണെന്നാണ് അദ്ദേഹം പറയുന്നത്.

കഴിഞ്ഞ 35 വർഷമായി മുടങ്ങാതെ വ്യായാമം ചെയ്യുന്നതാണ് അദ്ദേഹത്തിന്റെ പ്രധാന ശീലം. ദിവസവും രാവിലെ 45 മിനിറ്റ് മുതല്‍ ഒരു മണിക്കൂർ വരെ സ്ട്രെങ്ത് ട്രെയിനിംഗ്, കാർഡിയോ, നീന്തല്‍, നടത്തം എന്നിവയ്ക്കായി അദ്ദേഹം മാറ്റിവെക്കുന്നു. പ്രായമാകുമ്പോള്‍ പേശികളുടെ ബലം നിലനിർത്താൻ സ്ട്രെങ്ത് ട്രെയിനിംഗും, ഹൃദയത്തിന്റെയും ശ്വാസകോശത്തിന്റെയും ആരോഗ്യത്തിനായി കാർഡിയോയും നീന്തലും ഏറെ സഹായിക്കും. വണ്ണം കുറയ്ക്കുക എന്നതിനേക്കാള്‍ ശരീരത്തിന്റെ ചലനശേഷിയും സ്വയംപര്യാപ്തതയും നിലനിർത്താനാണ് പ്രായമാകുമ്പോള്‍ പ്രാധാന്യം നല്‍കേണ്ടത്.

കാർബോഹൈഡ്രേറ്റ് പൂർണ്ണമായി ഒഴിവാക്കാതെ ചോറും പച്ചക്കറികളും പ്രോട്ടീൻ അടങ്ങിയ ചിക്കനും മീനും ഉള്‍പ്പെടുത്തിയുള്ള സമീകൃതാഹാരമാണ് അദ്ദേഹം കഴിക്കുന്നത്. വൈകുന്നേരം നേരത്തെ അത്താഴം കഴിക്കുന്നത് ദഹനത്തിനും കൃത്യമായ ജീവിതരീതിക്കും സഹായിക്കും. കഠിനമായ പdiet രീതികള്‍ക്കോ വ്രതങ്ങള്‍ക്കോ പിന്നാലെ പോകാതെ, വ്യായാമവും നല്ല ഭക്ഷണവും ജീവിതത്തിന്റെ ഭാഗമാക്കിയാല്‍ പ്രായമാകുമ്പോഴും ബലത്തോടെയും ആരോഗ്യത്തോടെയും ഇരിക്കാമെന്നാണ് നാഗാർജുനയുടെ ഈ ജീവിതശൈലി നമ്മെ പഠിപ്പിക്കുന്നത്.