കൊച്ചി കുന്നുംപുറത്തുള്ള നോർത്ത് ഇടപ്പള്ളി ജി.എച്ച്‌.എസ്.എസ് വിദ്യാലയത്തില്‍ പ്ലസ് ടു കൊമേഴ്സ് വിദ്യാർത്ഥിയായ ഈ കൗമാരക്കാരൻ, പഠനത്തോടൊപ്പം ഒരു എ.ഐ കമ്പനിയും വിജയകരമായി നടത്തിവരുന്നു. "ഇന്ത്യയുടെ എ.ഐ കിഡ്" എന്ന് ജനപ്രിയമായി അറിയപ്പെടുന്ന റൗള്‍, എ.ഐ ടൂളുകള്‍ വികസിപ്പിച്ചും ആളുകള്‍ക്ക് സാങ്കേതികവിദ്യയില്‍ പരിശീലനം നല്‍കിയുമാണ് ഈ രംഗത്ത് തന്റേതായ ഇടം കണ്ടെത്തിയത്.

ഭൂരിഭാഗം കൗമാരക്കാരും പോക്കറ്റ് മണിക്കും ചെലവുകള്‍ക്കുമായി മാതാപിതാക്കളെ ആശ്രയിക്കുന്ന പ്രായത്തില്‍, സ്വന്തം പിതാവിനെ കമ്പനിയില്‍ ജീവനക്കാരനാക്കി മാസം 2 ലക്ഷം രൂപ ശമ്പളം നല്‍കുന്നു എന്നതാണ് റൗളിന്റെ വിജയഗാഥയിലെ ഏറ്റവും രസകരമായ കാര്യം.

ഡെക്കാൻ ക്രോണിക്കിള്‍ റിപ്പോർട്ട് അനുസരിച്ച്‌, ഒൻപതാം വയസ്സില്‍ സ്വയം എ.ഐ സാങ്കേതികവിദ്യ പഠിച്ചു തുടങ്ങിയതാണ് ഇയാളുടെ തുടക്കം. ഇന്ന് 15 ജീവനക്കാരുള്ള ഒരു സ്റ്റാർട്ടപ്പിന്റെ സ്ഥാപകനായ റൗള്‍, ലോകമെമ്പാടുമുള്ള അഞ്ച് ലക്ഷത്തോളം വിദ്യാർത്ഥികള്‍ക്ക് ഇതിനോടകം പരിശീലനം നല്‍കിക്കഴിഞ്ഞു.

വീഡിയോ എഡിറ്റിംഗിലൂടെയാണ് താൻ സാങ്കേതിക ലോകത്തേക്ക് കടന്നതെന്ന് റൗള്‍ മുൻപ് വ്യക്തമാക്കിയിരുന്നു. പിതാവിന് അഡോബ് (Adobe) കമ്പനിയില്‍ ജോലി ലഭിച്ചതോടെ പ്രീമിയം ടൂളുകള്‍ ഉപയോഗിക്കാൻ അവസരം ലഭിക്കുകയും അത് എ.ഐ പഠിക്കാൻ സഹായിക്കുകയുമായിരുന്നു. സ്കൂളിലെ സയൻസ് പ്രോജക്റ്റിനായി 'മീബോട്ട്' (MeBot) എന്ന റോബോട്ടിനെ നിർമ്മിച്ചാണ് തുടക്കം കുറിച്ചത്. പിതാവിനെ ജോലിക്ക് എടുത്തതിനെക്കുറിച്ച്‌ ചോദിച്ചപ്പോള്‍, ഫോണിലൂടെ എത്ര വേണമെങ്കിലും വിജ്ഞാനം നേടാമെങ്കിലും പിതാവിന്റെ അനുഭവസമ്പത്ത് തനിക്കില്ലെന്നും, ആമസോണ്‍, അഡോബ്, വിപ്രോ, ഐ.ബി.എം തുടങ്ങിയ പ്രമുഖ കമ്പനികളില്‍ ജോലി ചെയ്ത അദ്ദേഹത്തിന്റെ അനുഭവം കമ്പനിക്ക് ഏറെ ഗുണം ചെയ്യുമെന്നും റൗള്‍ പറഞ്ഞു.

റൗളിന്റെ 'എ.ഐ ടെക്നോളജീസ്' എന്ന സ്റ്റാർട്ടപ്പിന് കീഴിലുള്ള 'തിങ്ക് ക്രാഫ്റ്റ് അക്കാദമി' വഴി ഐ.ഐ.ടി, ഐ.ഐ.എം വിദ്യാർത്ഥികള്‍ക്കും പ്രമുഖ കോർപ്പറേറ്റ് സ്ഥാപനങ്ങളിലെ ജീവനക്കാർക്കും എ.ഐ പരിശീലനം നല്‍കിവരുന്നു. റെസ്ക്യൂ എ.ഐ (RESQ AI), മീബോട്ട്, സാപ് ഗാപ് (ZapGap), ഇൻവെസ്റ്റോ എ.ഐ, ഫീഡ്ഫൈ (FeedFye) തുടങ്ങി പ്രായോഗികമായ പ്രശ്നങ്ങള്‍ പരിഹരിക്കാൻ സഹായിക്കുന്ന 15 എ.ഐ ടൂളുകള്‍ റൗള്‍ വികസിപ്പിച്ചിട്ടുണ്ട്. ലോകത്തിന്റെ വിവിധ ഭാഗങ്ങളില്‍ നിന്നുള്ള ജീവനക്കാരുമായി അന്താരാഷ്ട്ര തലത്തിലാണ് ഈ കമ്പനി പ്രവർത്തിക്കുന്നത്.