ഇതിന്റെ ഭാഗമായി രക്ഷാബന്ധൻ ഉത്സവത്തിന് മുന്നോടിയായി പശുവിൻ ചാണകവും മൂത്രവും ഉപയോഗിച്ച്‌ തയ്യാറാക്കിയ ആയിരക്കണക്കിന് 'വൈദിക രാഖികള്‍' ഇവിടെ നിർമ്മിച്ചുവരുന്നു. ഈ പ്രചാരണത്തില്‍ കൂടുതല്‍ ആളുകളെ പങ്കാളികളാക്കുന്നതിനായി ഈ രാഖികള്‍ സൗജന്യമായി വിതരണം ചെയ്യാനാണ് ഗൗശാല ഉടമകളുടെ തീരുമാനം.

നാടൻ പശുക്കളില്‍ നിന്ന് ശേഖരിക്കുന്ന ഉണങ്ങിയ ചാണകപ്പൊടിയും മൂത്രവും ചേർത്ത മിശ്രിതം ഉപയോഗിച്ചാണ് ഈ രാഖികള്‍ ഉണ്ടാക്കുന്നത്. പശു സംരക്ഷണത്തെക്കുറിച്ചും പരിപാലനത്തെക്കുറിച്ചും ജനങ്ങളില്‍ അവബോധം വളർത്തുന്നതിനായി 'ഗോമാതാ-രാഷ്ട്രമാതാ' എന്നെഴുതിയ സ്റ്റിക്കറുകളും ഈ രാഖികളില്‍ പതിപ്പിച്ചിട്ടുണ്ട്. റക്ഷാബന്ധൻ അടുത്തതോടെ സൂറത്തിലും സമീപ പ്രദേശങ്ങളിലും മറ്റു സംസ്ഥാനങ്ങളിലും ഇത്തരം രാഖികള്‍ക്ക് വലിയ ആവശ്യക്കാരാണുള്ളത്. ഉയർന്ന ആവശ്യകത മുന്നില്‍ കണ്ട് വൻതോതിലാണ് ഗൗശാലകളില്‍ ഇവ നിർമ്മിക്കുന്നത്.

ഈ രാഖികള്‍ കൈകളില്‍ അണിയുമ്പോള്‍ പശുക്കളുടെ സംരക്ഷണത്തിനും പരിപാലനത്തിനും വേണ്ടിയുള്ള ഒരു പ്രതിജ്ഞയായി അത് മാറുമെന്ന് ഇതിന്റെ പ്രവർത്തകർ വിശ്വസിക്കുന്നു. 'ഗോമാതാ ആഹ്വാൻ അഭിയാൻ' എന്ന പ്രചാരണത്തിലേക്ക് കൂടുതല്‍ ആളുകളെ ആകർഷിക്കുകയാണ് ഇതിലൂടെ ലക്ഷ്യമിടുന്നത്. പശുവിന് ഔദ്യോഗികമായി 'രാഷ്ട്രമാതാ' പദവി നല്‍കണമെന്ന് ആവശ്യപ്പെട്ട് മുൻപ് ഇവർ ജില്ലാ കളക്ടർമാർ വഴി സർക്കാരിലേക്ക് നിവേദനങ്ങള്‍ സമർപ്പിച്ചിരുന്നു.

ഇത്തരം വൈദിക രാഖികള്‍ വഴി പൊതുജന പിന്തുണ ഉറപ്പാക്കാനും സർക്കാരിന് മുന്നിലുള്ള തങ്ങളുടെ ആവശ്യം ശക്തമാക്കാനും കഴിയുമെന്നാണ് പ്രചാരണത്തിന് നേതൃത്വം നല്‍കുന്നവർ പറയുന്നത്. വരുന്ന ഓഗസ്റ്റ് 28 വെള്ളിയാഴ്ചയാണ് രാജ്യത്തുടനീളം റക്ഷാബന്ധൻ ആഘോഷിക്കുന്നത്.