മരുന്നുകളൊന്നുമില്ലാതെ ഫാറ്റി ലിവർ (കരളില് കൊഴുപ്പ് അടിഞ്ഞുകൂടുന്ന അവസ്ഥ) പൂർണ്ണമായും മാറ്റിയെടുക്കാൻ സാധിക്കുമോ?
ജീവിതശൈലിയില് വരുത്തുന്ന ചില മാറ്റങ്ങളിലൂടെ ഫാറ്റി ലിവർ സ്വാഭാവികമായി മാറ്റിയെടുക്കാൻ കഴിയുമെന്നാണ് പ്രമുഖ ആരോഗ്യ വിദഗ്ദ്ധനായ ഡോ. നരേന്ദ്ര കെ. ഷെട്ടി വ്യക്തമാക്കുന്നത്. പഞ്ചസാരയുടെ ഉപയോഗം കുറയ്ക്കുക, കൃത്യമായി ഉറങ്ങുക, ദിവസവും നടക്കുക തുടങ്ങിയ ചെറിയ മാറ്റങ്ങള് കരളിന്റെ ആരോഗ്യത്തില് വലിയ പുരോഗതി ഉണ്ടാക്കും.
ഇക്കാലത്ത് അമിതവണ്ണമുള്ളവർക്കിടയിലും വ്യായാമമില്ലാതെ ഇരുന്ന് ജോലി ചെയ്യുന്നവർക്കിടയിലും വളരെ സാധാരണയായി കണ്ടുവരുന്ന ഒരു ആരോഗ്യപ്രശ്നമാണ് ഫാറ്റി ലിവർ. തുടക്കത്തില് യാതൊരുവിധ ലക്ഷണങ്ങളും കാണിക്കാത്തതിനാല്, പലരും മറ്റ് ആവശ്യങ്ങള്ക്കായി നടത്തുന്ന സാധാരണ സ്കാനിംഗിലൂടെയാണ് തങ്ങള്ക്ക് ഫാറ്റി ലിവർ ഉണ്ടെന്ന കാര്യം അവിചാരിതമായി തിരിച്ചറിയുന്നത്.
അള്ട്രാസൗണ്ട് റിപ്പോർട്ടില് ഫാറ്റി ലിവർ എന്ന് കാണുമ്പോള് തന്നെ പലരും പരിഭ്രാന്തരായി മരുന്നുകള് തേടിപ്പോകാറുണ്ട്. എന്നാല് ഇതിന്റെ പ്രാരംഭ ഘട്ടത്തില് ജീവിതശൈലിയിലെ മാറ്റങ്ങളാണ് ഏറ്റവും ഫലപ്രദമായ മരുന്നെന്ന് ക്ഷേമവന നാച്ചുറോപ്പതി ആൻഡ് യോഗ സെന്ററിലെ ചീഫ് വെല്നസ് ഓഫീസറായ ഡോ. നരേന്ദ്ര കെ. ഷെട്ടി പറയുന്നു.
തുടർച്ചയായ ഇരിപ്പ്, സംസ്കരിച്ച ഭക്ഷണങ്ങള് (processed foods), മധുരപാനീയങ്ങള്, രാത്രി വൈകിയുള്ള ഭക്ഷണം കഴിക്കല്, ശാരീരിക അധ്വാനമില്ലായ്മ എന്നിവയാണ് നോണ്-ആല്ക്കഹോളിക് ഫാറ്റി ലിവർ ഡിസീസ് (NAFLD) ഉണ്ടാകാനുള്ള പ്രധാന കാരണങ്ങള്. തുടക്കത്തില് വലിയ മുന്നറിയിപ്പുകളോ വേദനയോ ഇല്ലാതെയാണ് കരള് കോശങ്ങളില് കൊഴുപ്പ് അടിഞ്ഞുകൂടുന്നത്. എന്നാല് നല്ല വാർത്ത എന്തെന്നാല്, കൃത്യമായ ജീവിതശൈലി പിന്തുടർന്നാല് തുടക്കഘട്ടത്തിലുള്ള ഫാറ്റി ലിവർ പൂർണ്ണമായും മാറ്റിയെടുക്കാം.
ഭക്ഷണത്തില് പഞ്ചസാരയുടെ അളവ് കുറയ്ക്കുന്നത് ഇതില് വലിയ പങ്ക് വഹിക്കുന്നുണ്ട്. സോഫ്റ്റ് ഡ്രിങ്കുകള്, പാക്കറ്റ് ജ്യൂസുകള്, ബിസ്ക്കറ്റുകള് എന്നിവയിലൂടെ ശരീരത്തിലെത്തുന്ന അമിത മധുരം കരളില് കൊഴുപ്പായിട്ടാണ് സംഭരിക്കപ്പെടുന്നത്. മധുരത്തിന്റെ ഉപയോഗം കുറയ്ക്കുമ്പോള് തന്നെ കരളിന്റെ ആരോഗ്യത്തില് വലിയ പുരോഗതി ഉണ്ടാകുന്നതായി കാണാം. ഇതിനായി വിലകൂടിയ ഫിറ്റ്നസ് രീതികളുടെ ആവശ്യമില്ല. ആഴ്ചയില് ആറ് ദിവസവും 30 മിനിറ്റ് വീതം വേഗത്തില് നടക്കുന്നത് തന്നെ കരളിന്റെ കൊഴുപ്പ് കുറയ്ക്കാൻ സഹായിക്കും. കൂടാതെ യോഗ, സ്ക്വാറ്റ്സ്, പുഷ്-അപ്പുകള് തുടങ്ങിയ ലളിതമായ വ്യായാമങ്ങള് പേശികളുടെ കരുത്ത് കൂട്ടാനും കരളിലെ സമ്മർദ്ദം കുറയ്ക്കാനും നല്ലതാണ്.
കുറഞ്ഞ ഉറക്കവും വിട്ടുമാറാത്ത മാനസിക സമ്മർദ്ദവും ശരീരത്തിലെ ഹോർമോണ് സന്തുലിതാവസ്ഥയെ ബാധിക്കുകയും അത് കരളില് കൊഴുപ്പ് അടിഞ്ഞുകൂടുന്നതിനും വീക്കത്തിനും കാരണമാവുകയും ചെയ്യും. അതിനാല് ദിവസവും കുറഞ്ഞത് 6 മുതല് 7 മണിക്കൂർ വരെ ഉറങ്ങേണ്ടത് അത്യാവശ്യമാണ്. രാത്രി വൈകി മൊബൈല് ഫോണും ടിവിയും ഉപയോഗിക്കുന്നത് ഒഴിവാക്കുകയും വേണം. ശരീരഭാരം ക്രമമായി കുറയ്ക്കുന്നത് ഫാറ്റി ലിവർ മാറാൻ ഏറെ സഹായിക്കും. ശരീരഭാരത്തിന്റെ 7 മുതല് 10 ശതമാനം വരെ കുറയ്ക്കുന്നത് കരളിലെ കൊഴുപ്പും വീക്കവും ഇല്ലാതാക്കും. എന്നാല് പെട്ടെന്ന് ഭാരം കുറയ്ക്കുന്ന തരം ക്രഷ് ഡയറ്റുകള് കരളിന് കൂടുതല് ദോഷം ചെയ്യും. മദ്യപാനം പൂർണ്ണമായി ഒഴിവാക്കുന്നതും കരളിന്റെ ആരോഗ്യത്തിന് അത്യന്താപേക്ഷിതമാണ്.
എണ്ണയില് വറുത്തതും പാക്കറ്റില് വരുന്നതുമായ ഭക്ഷണങ്ങള് പരമാവധി കുറച്ച് പച്ചക്കറികള്, പഴങ്ങള്, മുട്ട, മീൻ, ധാന്യങ്ങള് എന്നിവ അടങ്ങിയ ലളിതമായ നാടൻ ഭക്ഷണങ്ങള് ശീലമാക്കുക. നിങ്ങളുടെ അടുക്കളയും നടക്കാനുള്ള ഷൂസുമാണ് ഏതൊരു മരുന്നിനേക്കാളും വേഗത്തില് ഫാറ്റി ലിവർ സുഖപ്പെടുത്താൻ സഹായിക്കുന്നത്.
(ശ്രദ്ധിക്കുക: ഈ ലേഖനത്തില് നല്കിയിട്ടുള്ള വിവരങ്ങള് പൊതുവായ അറിവിനായി മാത്രമുള്ളതാണ്. ഇത് ഒരു പ്രൊഫഷണല് മെഡിക്കല് ഉപദേശമായി കണക്കാക്കരുത്. ഭക്ഷണക്രമത്തിലോ വ്യായാമത്തിലോ മാറ്റങ്ങള് വരുത്തുന്നതിന് മുൻപ് എപ്പോഴും ഒരു ഡോക്ടറുടെയോ ഡയറ്റീഷ്യന്റെയോ ഉപദേശം തേടുക).