നാലാം ദിനം മഴമൂലം കളി നിർത്തിവെക്കുമ്പോള്‍ ശ്രീലങ്ക രണ്ടാം ഇന്നിംഗ്സില്‍ 6 വിക്കറ്റ് നഷ്ടത്തില്‍ 229 റണ്‍സ് എന്ന നിലയിലാണ്. നിലവില്‍ അവർക്ക് 16 റണ്‍സിന്റെ നേരിയ ലീഡുണ്ട്.

ഒന്നാം ഇന്നിംഗ്സില്‍ സൊനാല്‍ ദിനുഷയുടെ സെഞ്ചുറിയുടെ കരുത്തില്‍ 290 റണ്‍സ് നേടിയ ശ്രീലങ്കയെ ഇന്ത്യ ഫോളോ ഓണ്‍ ചെയ്യിക്കുകയായിരുന്നു. ഇന്ത്യയ്ക്കായി പ്രസിദ്ധ് കൃഷ്ണയും മാനവ് സുതറും മൂന്ന് വിക്കറ്റ് വീതവും അരങ്ങേറ്റക്കാരൻ സാരാംശ് ജെയിൻ രണ്ട് വിക്കറ്റും വീഴ്ത്തി. എന്നാല്‍ രണ്ടാം ഇന്നിംഗ്സില്‍ പാസിന്ദു സൂരിയബണ്ഡാരയുടെയും (92) കാമിന്ദു മെൻഡിസിന്റെയും (55) പോരാട്ടമാണ് ശ്രീലങ്കയ്ക്ക് ലീഡ് സമ്മാനിച്ചത്.

മത്സരത്തില്‍ ഇന്ത്യയ്ക്ക് വ്യക്തമായ മേല്‍ക്കൈ ഉണ്ടെങ്കിലും മഴ വില്ലനാകുന്നത് ഫലത്തെ ബാധിച്ചേക്കാം. നിലവില്‍ വേള്‍ഡ് ടെസ്റ്റ് ചാമ്പ്യൻഷിപ്പ് (WTC) പോയിന്റ് പട്ടികയില്‍ 53.33 പിസിറ്റിയോടെ (PCT) അഞ്ചാം സ്ഥാനത്താണ് ഇന്ത്യ. ഈ മത്സരത്തില്‍ ജയിച്ചാല്‍ ഓസ്‌ട്രേലിയയോട് ബംഗ്ലാദേശ് തോറ്റ പശ്ചാത്തലത്തില്‍ ഇന്ത്യയ്ക്ക് നാലാം സ്ഥാനത്തേക്ക് കയറാം. എന്നാല്‍ മത്സരം സമനിലയിലായാല്‍ ഇന്ത്യ 51.52 പിസിറ്റിയോടെ അഞ്ചാം സ്ഥാനത്ത് തന്നെ തുടരും. ശ്രീലങ്കയ്‌ക്കെതിരായ ഈ ടെസ്റ്റിന് ശേഷം ഇന്ത്യയ്ക്ക് ഏഴ് ടെസ്റ്റ് മത്സരങ്ങള്‍ കൂടി ബാക്കിയുണ്ട്.

ഇതുവരെ കളിച്ച 10 ടെസ്റ്റുകളില്‍ നാലെണ്ണത്തിലും തോറ്റതിനാല്‍, ശുഭ്മാൻ ഗില്ലിന്റെ നേതൃത്വത്തിലുള്ള ഇന്ത്യൻ ടീമിന് ഇനി വരുന്ന ഓരോ മത്സരവും ക്വാർട്ടർ ഫൈനല്‍ പോലെ നിർണ്ണായകമാണ്. ശ്രീലങ്കൻ പരമ്പരയ്ക്ക് ശേഷം ഈ വർഷം നവംബറില്‍ രണ്ട് ടെസ്റ്റുകള്‍ക്കായി ഇന്ത്യ ന്യൂസിലാൻഡിലേക്ക് പര്യടനം നടത്തും. തുടർന്ന് ഐപിഎല്ലിന് മുന്നോടിയായി അടുത്ത വർഷം ഓസ്‌ട്രേലിയയ്‌ക്കെതിരെ നാട്ടില്‍ നടക്കുന്ന അഞ്ച് മത്സരങ്ങളുടെ ടെസ്റ്റ് പരമ്പരയോടെയാവും ഇന്ത്യയുടെ നിലവിലെ ഡബ്ല്യുടിസി ഘട്ടം പൂർത്തിയാകുക.

ഡബ്ല്യുടിസി ഫൈനലില്‍ എത്താൻ ഇന്ത്യയ്ക്ക് ഇനി വരുന്ന മത്സരങ്ങളിലെല്ലാം വിജയം അനിവാര്യമാണ്. ബാക്കിയുള്ള എട്ട് ടെസ്റ്റുകളില്‍ ഏഴെണ്ണത്തില്‍ ജയിച്ചാല്‍ ഇന്ത്യയ്ക്ക് 68.52 പിസിറ്റി നേടാനാകും. എന്നാല്‍ ആറ് ജയവും രണ്ട് തോല്‍വിയുമാണെങ്കില്‍ അത് 62.96 ആയി കുറയും. സ്ലോ ഓവർ റേറ്റ് പോലെയുള്ള പിഴവുകള്‍ക്ക് പോയിന്റുകള്‍ വെട്ടിക്കുറച്ചില്ലെങ്കില്‍ മാത്രമേ ഈ കണക്കുകള്‍ പ്രസക്തമാകൂ. അതിനാല്‍ തന്നെ ഫൈനല്‍ പ്രതീക്ഷകള്‍ നിലനിർത്താൻ ഗില്ലിനും സംഘത്തിനും ഇനി തെറ്റുകള്‍ വരുത്താൻ കഴിയില്ല.