എന്നാല്‍ വലിയ താപനില വ്യത്യാസം ആരോഗ്യത്തിന് ദോഷം ചെയ്യും. അത്താഴം കഴിഞ്ഞയുടൻ നല്ല തണുപ്പുള്ള മുറിയില്‍ ഉറങ്ങുന്നത് ദഹനസംബന്ധമായ അസ്വസ്ഥതകള്‍ക്ക് കാരണമാകും. പ്രത്യേകിച്ച്‌ വയറിന് സെൻസിറ്റിവിറ്റിയുള്ളവർക്കും, അസിഡിറ്റി, വയർ വീർക്കല്‍ (bloating) തുടങ്ങിയ പ്രശ്നങ്ങളുള്ളവർക്കും. ഭക്ഷണം കഴിച്ചതിനുശേഷം ശരീരത്തിന്റെ ആന്തരിക താപനില വർദ്ധിക്കാറുണ്ട്. ഈ സമയത്ത് മുറിയിലെ തണുപ്പും ശരീരത്തിനുള്ളിലെ ചൂടും തമ്മിലുള്ള വലിയ വ്യത്യാസം ശരീരത്തിന് അമിത സമ്മർദ്ദം ഉണ്ടാക്കുമെന്ന് പഠനങ്ങള്‍ വ്യക്തമാക്കുന്നു.

രാത്രി ഭക്ഷണം കഴിഞ്ഞാല്‍ ദഹനവ്യവസ്ഥ ആഹാരം ദഹിപ്പിക്കാനും ഒപ്പം ശരീരത്തെ ഉറക്കത്തിനായി സജ്ജമാക്കാനും തുടങ്ങും. അത്താഴം കഴിഞ്ഞ് കുറഞ്ഞത് രണ്ട് മുതല്‍ മൂന്ന് മണിക്കൂർ കഴിഞ്ഞേ ഉറങ്ങാൻ പാടുള്ളൂ. ഭക്ഷണം കഴിച്ചയുടൻ പെട്ടെന്ന് തണുത്ത അന്തരീക്ഷത്തിലേക്ക് മാറുമ്പോള്‍ ശരീരത്തിന് ഒരു 'താപനില ഷോക്ക്' (temperature shock) ഉണ്ടാകുന്നു. ഇത് ദഹന പ്രക്രിയയെ മന്ദഗതിയിലാക്കും. ശരീര താപനിലയിലുണ്ടാകുന്ന പെട്ടെന്നുള്ള മാറ്റങ്ങള്‍ ദഹനത്തെ സഹായിക്കുന്ന കുടലിലെ നല്ല ബാക്ടീരിയകളെ (gut microbiome) ബാധിക്കാമെന്നും ഇത് ദീർഘകാലാടിസ്ഥാനത്തില്‍ ദഹനാരോഗ്യത്തെ തകർക്കുമെന്നും ഗവേഷണങ്ങള്‍ പറയുന്നു.

അതുപോലെ തന്നെ ഭക്ഷണത്തിന് തൊട്ടുപിന്നാലെ കിടന്നുറങ്ങുന്നത് കൂടുതല്‍ അപകടകരമാണ്. ഇത് കഴിച്ച ഭക്ഷണം മുകളിലേക്ക് തികട്ടി വരാനും അസിഡിറ്റി, നെഞ്ചെരിച്ചില്‍ എന്നിവ ഉണ്ടാകാനും കാരണമാകും. ഇത്തരത്തിലുള്ള അസ്വസ്ഥതകള്‍ ഉറക്കത്തിന്റെ ഗുണനിലവാരത്തെ ബാധിക്കുകയും ഉറക്കം വരാൻ വൈകിപ്പിക്കുകയും ചെയ്യും.

നല്ല തണുപ്പുള്ള മുറിയില്‍ കിടന്നുറങ്ങുന്നത് പലവിധ ആരോഗ്യപ്രശ്നങ്ങളിലേക്ക് നയിക്കാം. പെട്ടെന്നുള്ള താപനില വ്യത്യാസം ദഹനവ്യവസ്ഥയുടെ സുഗമമായ പ്രവർത്തനത്തെ തടസ്സപ്പെടുത്തുന്നതിനാല്‍ കഠിനമായ അസിഡിറ്റിയും നെഞ്ചെരിച്ചിലും ഉണ്ടാകാം. ശരീര താപനിലയില്‍ വരുന്ന മാറ്റങ്ങള്‍ വയർ വീർക്കുന്നതിനും അസ്വസ്ഥതകള്‍ക്കും കാരണമാകും. കൂടാതെ, ഇത് വിശപ്പിനെയും മെറ്റബോളിസത്തെയും പ്രതിരോധശേഷിയെയും വരെ ബാധിക്കാം.

ദഹനപ്രക്രിയ കൃത്യമായി നടന്നില്ലെങ്കില്‍ അത് ഉറക്കത്തെയും ബാധിക്കും. തണുപ്പ് അമിതമാകുമ്പോള്‍ രാത്രിയില്‍ ദഹനസംബന്ധമായ ബുദ്ധിമുട്ടുകള്‍ കൂടുകയും, ഉറക്കത്തിനിടയില്‍ അസ്വസ്ഥതകള്‍ കാരണം ഉണരേണ്ടി വരികയും ചെയ്യും. ഗ്യാസ്ട്രോ ഈസോഫാഗല്‍ റിഫ്ലക്സ് ഡിസീസ് (GERD) ഉള്ള രോഗികള്‍ രാത്രിയില്‍ അമിത തണുപ്പുള്ള മുറിയില്‍ കിടക്കുന്നത് പൂർണ്ണമായും ഒഴിവാക്കണം. ഇവരുടെ ദഹനവ്യവസ്ഥ ദുർബലമായതിനാല്‍ നെഞ്ചെരിച്ചിലും ഉറക്കമില്ലായ്മയും ഉണ്ടാകാനുള്ള സാധ്യത വളരെ കൂടുതലാണ്.

രാത്രിയിലെ ദഹനപ്രശ്നങ്ങള്‍ തടയാൻ പ്രമുഖ ഗ്യാസ്‌ട്രോഎൻട്രോളജിസ്റ്റായ ഡോ. സൗരഭ് സേഥി ചില നിർദ്ദേശങ്ങള്‍ നല്‍കുന്നുണ്ട്. ആഴത്തിലുള്ള ഉറക്കത്തിനായി ഉറങ്ങുന്നതിന് 2-3 മണിക്കൂർ മുമ്പ് അത്താഴം കഴിക്കുക, അമിതമായി ഭക്ഷണം കഴിക്കുന്നത് ഒഴിവാക്കുക, അസിഡിറ്റിയും വയർ വീർക്കലും ഉണ്ടാക്കുന്ന എരിവും കൊഴുപ്പും കൂടിയ ഭക്ഷണങ്ങള്‍ പരിമിതപ്പെടുത്തുക, ഭക്ഷണം കഴിഞ്ഞയുടൻ കിടക്കാതെ അല്‍പ്പസമയം നേരെ ഇരിക്കുകയോ നില്‍ക്കുകയോ ചെയ്യുക എന്നിവയാണവ. മുറി അമിതമായി തണുപ്പിക്കാതെ സുഖകരമായ രീതിയില്‍ മാത്രം തണുപ്പ് നിലനിർത്തുക. കിടക്കുമ്പോള്‍ തല അല്പം ഉയർത്തി വെച്ച്‌ കിടക്കുന്നത് അസിഡിറ്റി തടയാൻ സഹായിക്കും.

എസി മുറിയിലെ ഉറക്കത്തിന് ശേഷം വിട്ടുമാറാത്ത നെഞ്ചെരിച്ചില്‍, കഠിനമായ വയർ വീർക്കല്‍, ഭക്ഷണം ഇറക്കാനുള്ള ബുദ്ധിമുട്ട്, ഉറക്കം കെടുത്തുന്ന രീതിയിലുള്ള അസിഡിറ്റി, പെട്ടെന്ന് ശരീരഭാരം കുറയുക തുടങ്ങിയ ലക്ഷണങ്ങള്‍ കണ്ടാല്‍ ഡോക്ടറുടെ സഹായം തേടണം.

ചില ആളുകള്‍ അമിത തണുപ്പുള്ള അന്തരീക്ഷത്തില്‍ കിടക്കുമ്പോള്‍ കൂടുതല്‍ ശ്രദ്ധിക്കേണ്ടതുണ്ട്. ജി.ഇ.ആർ.ഡി (GERD) ഉള്ളവർ, വിട്ടുമാറാത്ത അസിഡിറ്റി പ്രശ്നമുള്ളവർ, ഐ.ബി.എസ് (Irritable Bowel Syndrome) അഥവാ കുടലിനെ ബാധിക്കുന്ന അസ്വസ്ഥതകള്‍ ഉള്ളവർ എന്നിവർ ശ്രദ്ധിക്കണം; കാരണം തണുപ്പ് കൂടുമ്പോള്‍ ഇവരുടെ രോഗലക്ഷണങ്ങള്‍ കഠിനമായേക്കാം. പ്രായമായവരിലും ദഹനപ്രക്രിയ സാവധാനത്തിലായതിനാല്‍ ഇവർ എസി ഉപയോഗിക്കുമ്പോള്‍ സൂക്ഷിക്കണം. വൈകി ഭക്ഷണം കഴിക്കുന്നവരും കനത്ത ആഹാരം കഴിക്കുന്നവരും അല്പം വൈകി മാത്രം ഉറങ്ങാൻ ശ്രദ്ധിക്കുക.

ഭക്ഷണം കഴിച്ചയുടൻ കിടക്കുന്നത് വയറ്റിലെ ആസിഡും ഭക്ഷണവും മുകളിലേക്ക് വരാൻ കാരണമാകുമെന്ന് ഹാർവാർഡ്, സ്റ്റാൻഫോർഡ് സർവ്വകലാശാലകളില്‍ നിന്ന് പരിശീലനം നേടിയ ഡോ. സൗരഭ് സേഥി വ്യക്തമാക്കുന്നു. അത്താഴവും ഉറക്കവും തമ്മിലുള്ള സമയവ്യത്യാസം കുറയുന്നത് ജി.ഇ.ആർ.ഡി (GERD) സാധ്യത വർദ്ധിപ്പിക്കും.

നല്ല ഉറക്കത്തിനും ദഹനസുഖത്തിനും ഏറ്റവും അനുയോജ്യമായ മുറിയിലെ താപനില 24 ഡിഗ്രി സെല്‍ഷ്യസിനും 26 ഡിഗ്രി സെല്‍ഷ്യസിനും ഇടയിലാണ്. മുറിയില്‍ അമിത തണുപ്പില്ലാതെ നോക്കുന്നതിനൊപ്പം ശരീരത്തില്‍ ആവശ്യത്തിന് ജലാംശം ഉണ്ടെന്ന് ഉറപ്പുവരുത്തുകയും വേണം. മുറിയിലെ ശരിയായ വായുസഞ്ചാരവും ഈർപ്പത്തിന്റെ (humidity) അളവും മികച്ച ഉറക്കത്തിന് അത്യാവശ്യമാണ്.