മുൻ വർഷത്തെ 1622.17 കോടി രൂപയില്‍ നിന്ന് 1774.28 കോടി രൂപയായാണ് വിറ്റുവരവ് ഉയർന്നത്. പാലും പാല്‍ ഉത്പന്നങ്ങളും വിപണിയില്‍ മികച്ച സ്വീകാര്യത നേടിയതാണ് ഈ നേട്ടത്തിന് പിന്നില്‍. പാല്‍ വില്‍പനയില്‍ 5.1 ശതമാനം വർധനവുണ്ടായപ്പോള്‍ മൂല്യവർധിത ഉത്പന്നങ്ങള്‍ വിപണി കീഴടക്കി. മുൻ വർഷത്തെ അപേക്ഷിച്ച്‌ ഉത്പന്ന വിപണിയില്‍ 18.7 ശതമാനം വർധനവോടെ 516 കോടി രൂപയുടെ വിറ്റുവരവാണുണ്ടായത്. നെയ്യ് (21.8%),ഐസ്‌ക്രീം (19.6%),തൈര് (3.6%) എന്നീ പ്രധാന ഉത്പന്നങ്ങള്‍ക്കും വർധനവ് ഉണ്ടായി.

യൂണിയന്റെ 57 വ്യത്യസ്ത ഉത്പന്നങ്ങള്‍ നിലവില്‍ വിപണിയിലുണ്ട്. നെയ്യ്, പാലട, പനീർ, ഡെയറി വൈറ്റ്‌നർ എന്നിവയ്ക്ക് വിദേശ വിപണിയിലും ആവശ്യക്കാർ ഏറി. 11% വില്‍പന വർധനവാണ് വിദേശ വിപണിയില്‍ മാത്രം ഉണ്ടായത്. പാല്‍ സംഭരണത്തിലും വലിയ മുന്നേറ്റം ദൃശ്യമായി. മുൻ വർഷം പ്രതിദിനം ശരാശരി 6,13,437 ലിറ്റർ പാല്‍ സംഭരിച്ചിടത്ത് 2025-26 സാമ്പത്തിക വർഷം ഇത് 6,85,075 ലിറ്ററായി ഉയർന്നു (11.7% വർധന). ക്ഷീരകർഷകർക്കും സംഘങ്ങള്‍ക്കുമായി ആകെ 1240 കോടി രൂപയാണ് മലബാർ മില്‍മ നല്‍കിയത്. ഇതില്‍ 1165 കോടി രൂപ പാല്‍വിലയായും 75 കോടിയോളം രൂപ അധിക പാല്‍വിലയും മറ്റ് ആനുകൂല്യങ്ങളുമാണ്. കൂടാതെ, കർഷകർക്ക് വർഷം മുഴുവൻ കാലിത്തീറ്റ സബ്‌സിഡിയും യൂണിയൻ അനുവദിച്ചിരുന്നു.