നിർദ്ദിഷ്ട വയനാട് തുരങ്കപാതയുടെ നിർമ്മാണ ക്യാമ്പിലുണ്ടായ മണ്ണിടിച്ചിലില് പെട്ട് മരിച്ച രണ്ട് പേരുടെ മൃതദേഹങ്ങള് കൂടി ഇന്ന് രക്ഷാപ്രവർത്തകർ കണ്ടെടുത്തു.
ഇതോടെ അപകടത്തില് ജീവൻ നഷ്ടപ്പെട്ടവരുടെ ആകെ എണ്ണം അഞ്ചായി ഉയർന്നു. കള്ളാടി മേഖലയില് കനത്ത മഴയെത്തുടർന്നുണ്ടായ ദുരന്തത്തില് കാണാതായ മറ്റ് മൂന്ന് തൊഴിലാളികള്ക്കായി നിലവില് പ്രദേശത്ത് അതീവ ജാഗ്രതയോടെയുള്ള തിരച്ചില് പുരോഗമിക്കുകയാണ്.ദുരന്തത്തിന്റെ വ്യാപ്തി കണക്കിലെടുത്ത് കള്ളാടിയിലെ അപകടസ്ഥലത്തെ നാല് പ്രത്യേക സോണുകളായി തിരിച്ചാണ് ഇപ്പോള് തിരച്ചില് ഏകോപിപ്പിച്ചിരിക്കുന്നത്.
അത്യാധുനിക സംവിധാനങ്ങളുമായി ഫയർഫോഴ്സും പൊലീസും ദുരന്തനിവാരണ സേനയും രംഗത്തുണ്ട്. ഇവർക്കൊപ്പം പ്രദേശവാസികളും സന്നദ്ധപ്രവർത്തകരും ചേർന്നുള്ള സംയുക്ത സംഘമാണ് മണ്ണുമാറ്റല് പ്രക്രിയയ്ക്ക് നേതൃത്വം നല്കുന്നത്. തുടർച്ചയായി പെയ്യുന്ന കനത്ത മഴയും പ്രതികൂല കാലാവസ്ഥയും ചളിനിറഞ്ഞ മണ്ണും രക്ഷാദൗത്യത്തിന് വലിയ വെല്ലുവിളിയാണ് ഉയർത്തുന്നത്. മേഖലയിലെ പ്രമുഖ കരാർ കമ്പനിയായ 'ദിലീപ് ബില്ഡ് കോണി'ലെ ജീവനക്കാരാണ് അപകടത്തില്പ്പെട്ടവരെല്ലാം.
തുരങ്കപാത നിർമ്മാണവുമായി ബന്ധപ്പെട്ട് താല്ക്കാലിക ലയങ്ങളിലും ക്യാമ്പുകളിലും താമസിച്ചിരുന്ന ഇതരസംസ്ഥാന തൊഴിലാളികളാണ് പെട്ടെന്നുണ്ടായ മണ്ണിടിച്ചിലില് അകപ്പെട്ടത്. മരിച്ചവരുടെ ഇൻക്വസ്റ്റ് നടപടികള് പൂർത്തിയാക്കി പോസ്റ്റ്മോർട്ടത്തിനായി ജില്ലാ ആശുപത്രിയിലേക്ക് മാറ്റിയിട്ടുണ്ട്. കാണാതായ മൂന്ന് പേരെയും എത്രയും വേഗം കണ്ടെത്താനാകുമെന്ന പ്രതീക്ഷയിലാണ് അധികൃതർ. കൂടുതല് രക്ഷാപ്രവർത്തകരെ പ്രദേശത്തേക്ക് നിയോഗിച്ചിട്ടുണ്ട്.