ന്യൂദല്‍ഹി: എഥനോള്‍ കലര്‍ന്ന ഇ20 പെട്രോള്‍ ഉപയോഗിച്ച്‌ പ്രവര്‍ത്തിച്ചതിന്റെ പേരില്‍ ഏതെങ്കിലും വാഹനത്തിന് കേടുപാടുകള്‍ വന്നതിന്റെ തെളിവുകള്‍ ഹാജരാക്കാന്‍ വെല്ലുവിളിച്ച്‌ കേന്ദ്ര റോഡ് ഗതാഗത, ഹൈവേ മന്ത്രി നിതിൻ ഗഡ്കരി.
എഥനോള്‍ കലര്‍ന്ന ഇ20 പെട്രോള്‍ ഒരു വാഹനത്തിനും കേടുപാടു വരുത്തിയിട്ടില്ലെന്നും നിതിന്‍ ഗാഡ്കരി പറഞ്ഞു.
കഴിഞ്ഞ കുറെനാളുകളായി ഈ ഇ20 പെട്രോളിനെതിരെ സമൂഹമാധ്യമങ്ങളില്‍ വലിയ ദുഷ്പ്രചാരണം നടക്കുകയാണ്. കഴിഞ്ഞ ദിവസം ഒരു സംഘം യുവാക്കള്‍ ഇ20 പെട്രോള്‍ ഉപയോഗിച്ചതുമൂലം തങ്ങളുടെ വാഹനം കേടായി എന്ന് വാദിച്ച്‌ ദല്‍ഹിയില്‍ സമരം നടത്തിയിരുന്നു. ഇതിനെതിരെയാണ് നിതിന്‍ ഗാഡ്കരി ശക്തമായി ബുധനാഴ്ച പ്രതികരിച്ചത്. ഇ20 പെട്രോള്‍ ഉപയോഗിച്ച്‌ കേടുവന്ന വാഹനത്തിന്റെ തെളിവുകള്‍ കാണിക്കാന്‍ വിമര്‍ശകരെ ഗാഡ്കരി വെല്ലുവിളിച്ചു.
അതേസമയം ഇന്ധന ഇറക്കുമതി കുറയ്‌ക്കുക, ശുദ്ധമായ ഇന്ധനങ്ങള്‍ പ്രോത്സാഹിപ്പിക്കുക, കർഷകരുടെ വരുമാനം മെച്ചപ്പെടുത്തുക എന്നിവയാണ് ഈ സംരംഭത്തിന്റെ ലക്ഷ്യമെന്ന് അദ്ദേഹം വാദിച്ചു.
ഇ20 എഥനോള്‍ പെട്രോള്‍ വഴി താന്‍ ലാഭമുണ്ടാക്കി എന്ന ആരോപണം നിഷേധിച്ച്‌ മന്ത്രി
ഇന്ത്യാ ടുഡേ ടിവിക്ക് നല്‍കിയ പ്രത്യേക അഭിമുഖത്തില്‍, എഥനോള്‍ പരിപാടിയില്‍ തനിക്ക് വ്യക്തിപരമായ പങ്കാളിത്തമുണ്ടെന്ന ആരോപണങ്ങള്‍ ഗഡ്കരി തള്ളിക്കളഞ്ഞു, തന്റെ കുടുംബത്തിന്റെ പഞ്ചസാര ബിസിനസ്സ് സർക്കാരിന്റെ എഥനോള്‍ നയത്തിന് മുമ്പുള്ളതാണെന്നും എഥനോള്‍ ഉല്‍പാദനത്തില്‍ തന്റെ പങ്ക് നിസ്സാരമാണെന്നും പറഞ്ഞു.
“സ്വന്തം നേട്ടത്തിനായി ഞാൻ എഥനോള്‍ നയം രൂപപ്പെടുത്തിയെന്ന ആരോപണം പൂർണ്ണമായും അടിസ്ഥാനരഹിതമാണ്. എഥനോള്‍ നയത്തില്‍ നിന്ന് എനിക്ക് ഒന്നും ലഭിക്കുന്നില്ല. എത്തനോള്‍ ഉല്‍പാദനത്തില്‍ എന്റെ പങ്ക് വെറും 0.07 ശതമാനം മാത്രമാണ്. ഇത്രയും ചെറിയ ഓഹരി ഉപയോഗിച്ച്‌, കാര്യമായ സാമ്പത്തിക നേട്ടമുണ്ടാകുമെന്ന് വിമര്‍ശിക്കുന്നതില്‍ അര്‍ത്ഥമില്ല.,” എഥനോള്‍ പരിപാടിയില്‍ നിന്ന് തനിക്ക് സാമ്പത്തിക നേട്ടമുണ്ടാകുമെന്ന ആരോപണങ്ങള്‍ നിരസിച്ചുകൊണ്ട് ഗാഡ്കരി പറഞ്ഞു.
ഏകദേശം 550 എത്തനോള്‍ ഉല്‍പ്പാദിപ്പിക്കുന്ന യൂണിറ്റുകളിലൂടെ ഇന്ത്യ നിലവില്‍ പ്രതിവർഷം 1,500 കോടി ലിറ്റർ എത്തനോള്‍ ഉത്പാദിപ്പിക്കുന്നുണ്ടെന്നും അതില്‍ തന്റെ വിഹിതം 0.07 ശതമാനം മാത്രമാണെന്നും മന്ത്രി പറഞ്ഞു.
കർഷകർക്ക് പ്രയോജനം ചെയ്യുന്നതിനൊപ്പം ഇറക്കുമതി ചെയ്യുന്ന അസംസ്കൃത എണ്ണയെ ആശ്രയിക്കുന്നത് കുറയ്‌ക്കുന്നതിന് ഈ നയം സഹായിക്കുമെന്ന് വാദിച്ചുകൊണ്ട്, എത്തനോള്‍ മാത്രം ഉപയോഗിക്കുന്നതിനുപകരം ബദല്‍ ഇന്ധനങ്ങളെയാണ് താൻ എപ്പോഴും വാദിച്ചിട്ടുള്ളതെന്ന് ഗഡ്കരി പറഞ്ഞു.
“ഞാൻ എത്തനോളിനെക്കുറിച്ച്‌ മാത്രമല്ല സംസാരിക്കുന്നത്. ബദല്‍ ഇന്ധനങ്ങളെക്കുറിച്ചാണ് സംസാരിക്കുന്നത്. എത്തനോള്‍ ഉപയോഗം കർഷകർക്ക് ഗുണം ചെയ്യും,” അദ്ദേഹം പറഞ്ഞു.
നയം കൂട്ടായി രൂപപ്പെടുത്തിയതാണെന്ന് ഊന്നിപ്പറഞ്ഞുകൊണ്ട്, എത്തനോള്‍ മിശ്രിതം താൻ ഒറ്റയ്‌ക്ക് എടുത്ത തീരുമാനമല്ല, മറിച്ച്‌ വിപുലമായ കൂടിയാലോചനയും ശാസ്ത്രീയ വിലയിരുത്തലും ഉള്‍പ്പെട്ട ഒന്നാണെന്ന് ഗഡ്കരി പറഞ്ഞു.
“ഇ20 എഥനോള്‍ പെട്രോള്‍ ഉപയോഗിച്ച്‌ കേടുവന്ന വാഹനം കാണിക്ക്, നഷ്ടപരിഹാരം നല്‍കാം”, വെല്ലുവിളിച്ച്‌ ഗാഡ്കരി
“എഥനോള്‍ കാരണം ആരുടെയെങ്കിലും വാഹനത്തിന് കേടുപാടുകള്‍ സംഭവിച്ചിട്ടുണ്ടെങ്കില്‍, അവർ ഡീലർക്കും എന്റെ മന്ത്രാലയത്തിനും പരാതി നല്‍കണം. ഇതേക്കുറിച്ച്‌ വിശദമായി അന്വേഷിച്ച്‌ ആരോപണം ശരിയെന്ന് തെളിഞ്ഞാല്‍ നഷ്ടപരിഹാരം നല്‍കും,” അദ്ദേഹം പറഞ്ഞു.
“എഥനോള്‍ കാരണം പെട്രോള്‍ വാഹനങ്ങള്‍ക്ക് കേടുപാടുകള്‍ സംഭവിച്ചതായി നിങ്ങള്‍ക്ക് വ്യക്തിപരമായി അറിയാവുന്ന രണ്ട് പേരുടെയെങ്കിലും പേര് പറയാമോ?” അദ്ദേഹം കൂട്ടിച്ചേർത്തു.
മാരുതി സുസുക്കി, ടൊയോട്ട, ടാറ്റ മോട്ടോഴ്‌സ്, മഹീന്ദ്ര തുടങ്ങിയ നിർമ്മാതാക്കള്‍ എത്തനോള്‍ കലർത്തിയ ഇന്ധനത്തെ വാഹന കേടുപാടുകള്‍ക്ക് ബന്ധപ്പെടുത്തുന്ന പരാതികള്‍ റിപ്പോർട്ട് ചെയ്തിട്ടില്ലെന്ന് ഗഡ്കരി പറഞ്ഞു.
ടൊയോട്ട വാഹനവുമായി ബന്ധപ്പെട്ട സമീപകാല കേസിനെക്കുറിച്ച്‌ പരാമർശിക്കുമ്പോള്‍, തകരാറിന് കാരണം എത്തനോളിന് പകരം ജല മലിനീകരണമാണെന്ന് അന്വേഷണത്തില്‍ കണ്ടെത്തിയതായി അദ്ദേഹം പറഞ്ഞു.