ബനസ്‌കന്ത: ഗുജറാത്തിലെ ബനസ്‌കന്തയില്‍ പ്രധാനമന്ത്രി നരേന്ദ്ര മോദി പങ്കെടുത്ത റാലിയില്‍ ജനക്കൂട്ടം ആവർത്തിച്ച ‘മോദി കഹിൻ നഹി ജായേഗാ’ (മോദി എങ്ങോട്ടും പോകില്ല) എന്ന മുദ്രാവാക്യം ശ്രദ്ധേയമായി.
ഇന്ത്യയെ ആഗോള സമ്പദ്‌വ്യവസ്ഥയിലെ മുൻനിര ശക്തിയാക്കുക, സ്വയംപര്യാപ്തത കൈവരിക്കുക, ലോകത്തിന്റെ ഉല്‍പ്പാദന കേന്ദ്രമാക്കി മാറ്റുക തുടങ്ങിയ ലക്ഷ്യങ്ങള്‍ ഉയർത്തിക്കാട്ടിയായിരുന്നു മുദ്രാവാക്യം.
രാജ്യത്തെ വികസിത രാഷ്‌ട്രമാക്കുന്നതുള്‍പ്പെടെയുള്ള ലക്ഷ്യങ്ങള്‍ ഓരോന്നായി പ്രസംഗകൻ അവതരിപ്പിക്കുമ്പോള്‍, ‘മോദി എങ്ങോട്ടും പോകില്ല’ എന്ന് സദസ്സ് ഏറ്റുചൊല്ലുകയായിരുന്നു. ദാരിദ്ര്യനിർമാർജനം, എല്ലാവർക്കും ഭവനം, ഗ്രാമീണ സ്ത്രീകളുടെ സാമ്പത്തിക ശാക്തീകരണം, വിദൂര പ്രദേശങ്ങളിലേക്കുള്ള വികസനം, കുടുംബാധിപത്യ-പ്രീണന രാഷ്‌ട്രീയങ്ങളുടെ അന്ത്യം തുടങ്ങിയ വിഷയങ്ങളും മുദ്രാവാക്യത്തില്‍ ഉള്‍പ്പെടുത്തി. നിശ്ചയിച്ച വികസന ലക്ഷ്യങ്ങള്‍ കൈവരിക്കുന്നതുവരെ പ്രധാനമന്ത്രിയുടെ നേതൃത്വം തുടരുമെന്ന ആശയമാണ് ഈ പ്രയോഗത്തിലൂടെ മുന്നോട്ടുവച്ചത്.
ഗുജറാത്ത് സന്ദർശനത്തിന്റെ ഭാഗമായി 14,000 കോടിയിലധികം രൂപയുടെ വിവിധ വികസന പദ്ധതികള്‍ക്ക് പ്രധാനമന്ത്രി തുടക്കം കുറിച്ചു. ക്ഷീരവികസനം, കൃഷി, നഗര ഗതാഗതം, റോഡ് അടിസ്ഥാന സൗകര്യം, ഗ്രാമവികസനം തുടങ്ങിയ മേഖലകളിലാണ് പദ്ധതികള്‍. സംസ്ഥാനത്തിന്റെ സാമ്പത്തിക വളർച്ചയും പൊതുസേവനങ്ങളുടെ വികസനവുമാണ് ഇവയുടെ ലക്ഷ്യം.
ക്ഷീരമേഖലയിലെ മാലിന്യസംസ്കരണത്തിനും പുനരുപയോഗത്തിനും പ്രാധാന്യം നല്‍കുന്ന ബനാസ് ഡയറി ബയോ-സിഎൻജി പ്ലാന്റുകളും പദ്ധതികളില്‍ ഉള്‍പ്പെടുന്നു. തരാദില്‍ പ്രതിദിനം 75 മെട്രിക് ടണ്ണും രാധൻപൂരില്‍ 100 മെട്രിക് ടണ്ണും കന്നുകാലി ചാണകം സംസ്കരിക്കാൻ ശേഷിയുള്ള പ്ലാന്റുകള്‍ പ്രധാനമന്ത്രി ഉദ്ഘാടനം ചെയ്തു. ക്ഷീരമേഖലയിലെ അവശിഷ്ടങ്ങളില്‍നിന്ന് ഊർജവും അധിക വരുമാനവും സൃഷ്ടിക്കുകയാണ് പദ്ധതികളുടെ ലക്ഷ്യം.
ബനാസ് ഡയറിയുമായി ബന്ധപ്പെട്ട് സനദാറില്‍ സ്ഥാപിച്ച ഉരുളക്കിഴങ്ങ് സംസ്കരണ പ്ലാന്റും പാലൻപൂരിലെ അള്‍ട്രാ ഹൈ ടെംപറേച്ചർ (യുഎച്ച്‌ടി) ഉല്‍പ്പന്നങ്ങള്‍ സൂക്ഷിക്കാനുള്ള ഓട്ടോമേറ്റഡ് സ്റ്റോറേജ് സൗകര്യവും പദ്ധതികളില്‍ ഉള്‍പ്പെടുന്നു. കാർഷികോല്‍പ്പന്നങ്ങളുടെ സംസ്കരണവും ക്ഷീരമേഖലയിലെ സംഭരണ സൗകര്യങ്ങളും മെച്ചപ്പെടുത്താൻ ഇവ സഹായിക്കുമെന്നാണ് പ്രതീക്ഷ.
ഗതാഗത മേഖലയില്‍ അഹമ്മദാബാദ് മെട്രോ ശൃംഖലയുടെ വിപുലീകരണത്തിനും തുടക്കമായി. വിമാനത്താവളത്തെ ബന്ധിപ്പിക്കുന്ന ഫേസ് 2എയും ഗിഫ്റ്റ് സിറ്റിയിലേക്ക് നീളുന്ന ഫേസ് 2ബിയും ഇതില്‍ ഉള്‍പ്പെടുന്നു. ഇവയ്‌ക്ക് യഥാക്രമം ആറു കിലോമീറ്ററിലധികവും 3.3 കിലോമീറ്ററിലധികവും ദൈർഘ്യമുണ്ട്. അഹമ്മദാബാദിനെയും മെഹ്സാനയെയും ബന്ധിപ്പിക്കുന്ന സ്റ്റേറ്റ് ഹൈവേ 41 നാല് വരിയില്‍നിന്ന് എട്ട് വരിയായി വികസിപ്പിച്ചതും പ്രധാന റോഡ് പദ്ധതികളിലൊന്നാണ്.
കുട്ടികള്‍ക്ക് അനുയോജ്യമായ 4,030 പുതിയ അങ്കണവാടികള്‍, അഗ്രികള്‍ച്ചർ ഇൻഫ്രാസ്ട്രക്ചർ ഫണ്ടിന് കീഴിലുള്ള പദ്ധതികള്‍, ഹോർട്ടികള്‍ച്ചർ ക്ലസ്റ്ററുകളുടെ വികസനം എന്നിവയ്‌ക്കും തുടക്കമായി. ഗ്രാമീണ അടിസ്ഥാന സൗകര്യങ്ങള്‍ മെച്ചപ്പെടുത്തുന്നതിനും കർഷകർക്ക് കൂടുതല്‍ സൗകര്യങ്ങള്‍ ഒരുക്കുന്നതിനും ലക്ഷ്യമിട്ടുള്ളതാണ് ഈ പദ്ധതികള്‍.
റെയില്‍ ഗതാഗത വികസനത്തിന്റെ ഭാഗമായി അഹമ്മദാബാദ് (സബർമതി)-വാരണാസി എക്സ്പ്രസ്, മെഹ്സാന-ബെച്ചാരാജി-സബർമതി മെമു സർവീസ് എന്നിവയ്‌ക്കും പ്രധാനമന്ത്രി പച്ചക്കൊടി വീശി.