ബാലരാമപുരം: ഓണം വാരാഘോഷത്തില് കാഴ്ച്ചക്കാരുടെ ശ്രദ്ധാകേന്ദ്രമാവാന് ജിനന് ബിനു ഹരിദാസ് കൂട്ടുകെട്ടില് ഓണ ഫ്ളോട്ടുകളില് അവസാന മിനുക്കുപണികള്.
നിരവധി സര്ക്കാര് കേന്ദ്രസര്ക്കാര് പുരസ്കാരങ്ങളും അംഗീകാരങ്ങളും ലഭിച്ച ജിനന് ബിനു ഹരിദാസ് ജോഡികള് വിവിധ സര്ക്കാര് വകുപ്പിന്റെ വ്യത്യസ്തമാര്ന്ന നാല് ഫ്ളോട്ടുകളാണ് ഒരുക്കുന്നത്. ആശയവും കലയും ഇണചേര്ത്ത് ഫ്ളോട്ടുകളുടെ ദൃശ്യാവിഷ്ക്കാരം കാണികള്ക്ക് മനസില് ചിന്തയുണര്ത്താന് ജിനന്റെ ഫ്ളോട്ടുകള് മുന്നിലാണ്. കൗതുകകരമായ ദൃശ്യവിരുന്നാണ് ഓരോ ഫ്ളോട്ടിലും തീര്ത്തിരിക്കുന്നത്. ഓണം വാരാഘോഷത്തില് എല്ലാവര്ഷവും ജിനന് ബിനു ഹരിദാസ് ഒരുക്കുന്ന ഫ്ളോട്ടുകള്ക്കാണ് അംഗീകാരം ലഭിക്കുന്നത്. വിഴിഞ്ഞം അന്താരാഷ്ട്ര തുറമുഖത്തിന്റെ വികസന ഫ്ളോട്ടും ഇക്കുറി ശ്രദ്ധനേടും. ഫ്ളോട്ടുകള് ഒരുക്കാന് ഇരുപതോളം കലാകാരന്മാരും ജിനന് ബിനു ഹരിദാസ് ജോഡികളോടൊപ്പം പ്രവര്ത്തിക്കുന്നുണ്ട്.
ഇക്കുറി വിവിധ സര്ക്കാര് വകുപ്പുകളുടെ നാല് ഫ്ളോട്ടുകളാണ് ജിനന്ബിനു ഹരിദാസ് ടീം ഒരുക്കുന്നത്. ടൂറിസം വകുപ്പിന്റെ കേരള ടൂറിസം പുതുയുഗത്തിലൂടെ സ്ത്രീകളുടെ കരുത്തും ശുചിത്വത്തിന്റെ കരുതലും പ്രകൃതിയുടെ സംരക്ഷണവും, കെടിഡിസിയുടെ കായല്പരപ്പിലെ ഹരിത സങ്കേതം (കുമരകം പക്ഷി സങ്കേതം), മ്യൂസിയം മൃഗശാല വകുപ്പിന്റെ പുതുയുഗ കേരളത്തില് പുത്തന് പ്രതീക്ഷയോടെ പുതുപ്പിറവികള്, വിഴിഞ്ഞം അന്താരാഷ്ട്ര തുറമുഖത്തിന്റെ പശ്ചാത്തലത്തില് തുറമുഖ കേരളം പുതുയുഗ ജീവിതം എന്നിങ്ങനെ സര്ക്കാര് വകുപ്പിന്റെ വൈവിദ്ധ്യമാര്ന്ന ഫ്ളോട്ടുകളാണ് ഒരുക്കുന്നത്. തേമ്പാമുട്ടം ഷാഡോ സ്റ്റുഡിയോയില് പ്രത്യേകം സജ്ജീകരിച്ച പവലിയനിലാണ് ഫ്ളോട്ടുകള് ഒരുക്കിയിരിക്കുന്നത്. രാത്രി 11 മണിയോടെ ഓണാഘോഷത്തിന്റെ സമാപനം സമ്മേളനം നടക്കുന്ന കവടിയാറിലേക്ക് ഫ്ളോട്ടുകളടങ്ങിയ വാഹനവ്യൂഹം യാത്രയാകും.