തമിഴ് സിനിമയ്ക്ക് ഒരു സംഗീത പ്രതിഭയുണ്ടെങ്കില് അത് ഇളയരാജയാണ്. അദ്ദേഹം സംഗീതം നല്കിയ ഗാനങ്ങളില് മയങ്ങാത്തവരായി ആരുമില്ല.
ഇന്നും അദ്ദേഹത്തിന്റെ പഴയ ഗാനങ്ങള് പുതിയ സിനിമകളില് ഉപയോഗിക്കുന്നുണ്ട് .
രജനിയുടെയും കമലിന്റെയും സിനിമകള്ക്കാണ് അദ്ദേഹം ഏറ്റവും കൂടുതല് സംഗീതം നല്കിയിരിക്കുന്നത്. സൂപ്പർസ്റ്റാർ രജനിക്കുവേണ്ടി ഇളയരാജ സൃഷ്ടിച്ച മാസ്റ്റർപീസ് ഗാനമാണ് ' കാതലിൻ ദീപം ഒണ്ട്ര് ' എന്ന് തുടങ്ങുന്നത് .
1984-ല് രാജശേഖർ സംവിധാനം ചെയ്ത ' തമ്പിക്കു എന്ത ഊര് ' എന്ന ചിത്രത്തില് രജനികാന്തിനായി ഒരുക്കിയ ഗാനമാണിത് . പഞ്ചു അരുണാചലമാണ് ചിത്രം നിർമ്മിച്ചത്. ചിത്രത്തില് എല്ലാ രംഗങ്ങളും ചിത്രീകരിച്ചുവെങ്കിലും, ഒരു ഗാനരംഗം മാത്രം ചിത്രീകരിക്കാൻ ബാക്കിയുള്ളപ്പോഴാണ് സംഗീതസംവിധാനം ചെയ്യാനിരുന്ന ഇളയരാജ ആശുപത്രിയിലാകുന്നത് . ഗാനം തയ്യാറാകാത്തതിനാല് രജനീകാന്ത് ഉള്പ്പെടെയുള്ള സിനിമാസംഘം അതിനായി കാത്തിരിക്കുകയായിരുന്നു.
ആശുപത്രിയില് പ്രവേശിപ്പിക്കപ്പെട്ട ഇളയരാജയെ അടിയന്തിര ശസ്ത്രക്രിയയ്ക്ക് വിധേയനാക്കി. ശസ്ത്രക്രിയയ്ക്ക് ശേഷം ഡോക്ടർമാർ അദ്ദേഹത്തോട് വിശ്രമിക്കാൻ ഉപദേശിക്കുകയും പാട്ട് പാടരുതെന്ന് പറയുകയും ചെയ്തു. ആ സമയത്ത്, ഇളയരാജയെ കാണാൻ വന്ന പഞ്ചു അരുണാചലം അദ്ദേഹത്തിന്റെ സുഖവിവരങ്ങള് അന്വേഷിക്കുകയും രജനീകാന്ത് ഉള്പ്പെടെയുള്ള സിനിമാസംഘം പാട്ടിനായി കാത്തിരിക്കുകയാണെന്ന് പറയുകയും ചെയ്തു. ഇത് കേട്ടപ്പോള്, പെട്ടെന്ന് ഇളയരാജയ്ക്ക് ഒരു ആശയം തോന്നി. അത് നിർമ്മാതാവിനോട് പറയുകയും ചെയ്തു.
മറ്റൊന്നുമല്ല ' എനിക്ക് പാടാൻ പറ്റില്ല, അതുകൊണ്ട് ഞാൻ വിസില് അടിക്കുകയും ട്യൂണ് ചെയ്യുകയും ചെയ്യാം, നിങ്ങള് ഇതിന്റെ വരികള് എഴുതുമോ എന്നാണ് ഇളയരാജ ചോദിച്ചത് . പഞ്ചു അരുണാചലവും ഇതിന് ഓക്കേ പറഞ്ഞു. ഇളയരാജ വിസില് അടിച്ച് ട്യൂണ് ചെയ്തു. അങ്ങനെ പുറത്തിറങ്ങിയ 1980 കളിലെ ഒരു പ്രണയഗാനമായിരുന്നു ‘കാതലിൻ ദീപം ഒണ്ട്രു’ എന്ന ഗാനം. . ഇളയരാജയുടെ സംഗീതവും പഞ്ചു അരുണാചലത്തിന്റെ വരികളും മാത്രമല്ല, എസ്.പി. ബാലസുബ്രഹ്മണ്യത്തിന്റെ ശബ്ദവും ഈ ഗാനത്തിന് ജീവൻ നല്കി. കാലം മാറിയിട്ടും ഈ മൂന്ന് ഇതിഹാസങ്ങളും ഒരുമിച്ച് സൃഷ്ടിച്ച ഗാനം ഇന്നും ആഘോഷിക്കപ്പെടുന്നു.