Friday, 24 Sep, 11.31 am ജന്മഭൂമി

ലേറ്റസ്റ്റ് ന്യൂസ്
വീട്ടില്‍ നിന്ന് എഴര കിലോ കഞ്ചാവ് പിടികൂടി; പരിശോധനയില്‍ 22 ഡിറ്റനേറ്ററും ഉണക്ക ഇറച്ചിയും വാറ്റുപകരണങ്ങളും, പ്രതി രക്ഷപ്പെട്ടു

തൊടുപുഴ: അഞ്ചിരി കുട്ടപ്പന്‍ കവലയിലെ വീട്ടില്‍ നിന്ന് എഴര കിലോ കഞ്ചാവ് പിടികൂടി. 22 ഡിറ്റനേറ്ററും ഉണക്ക ഇറച്ചിയും വാറ്റുപകരണങ്ങളും കണ്ടെത്തി, പോലീസ് എത്തുന്നതറിഞ്ഞ പ്രതി രക്ഷപ്പെട്ടു. തെക്കുംഭാഗം പറയാനാനിക്കല്‍ വീട്ടില്‍ അനൂപ് കേശവന്‍(37) വാടകയ്ക്ക് താമസിക്കുന്ന വീട്ടില്‍ നിന്നാണ് ഇന്നലെ വൈകിട്ട് ആറോടെ കഞ്ചാവ് കണ്ടെത്തിയത്. കഞ്ചാവ് മൊത്തക്കച്ചവടക്കാരനായ ഇയാളെ തൊടുപുഴ പോലീസ് തെരയുന്നു.

ചൊവ്വാഴ്ച മലങ്കര ഗേറ്റിന് സമീപത്ത് നിന്ന് രണ്ട് കിലോ കഞ്ചാവുമായി പാലാ സ്വദേശിയായ ജോമോന്‍ പിടിയിലായിരുന്നു. തുടര്‍ന്ന് നടത്തിയ അന്വേഷണത്തില്‍ കഞ്ചാവിന്റെ മൊത്ത വിതരണക്കാരന്‍ അനൂപാണെന്ന് മനസിലായത്. വൈകിട്ട് പോലീസെത്തുമ്ബോഴേക്കും അനൂപ് വാടക വീട്ടില്‍ നിന്ന് മുങ്ങിയിരുന്നു. തുടര്‍ന്ന് വീടിന്റെ ഉടമസ്ഥനെ വിളിച്ചുവരുത്തി വാതില്‍ തുറന്ന് അകത്ത് കയറുകയായിരുന്നു.

വര്‍ക്ക് ഏരിയയില്‍ നിന്നാണ് കഞ്ചാവും മറ്റ് വസ്തുക്കളും കണ്ടെത്തിയത്. കഞ്ചാവ് രണ്ട് കിലോയുടെ നാല് പാക്കറ്റുകളാക്കി ചാക്കില്‍ കെട്ടിയ നിലയിലായിരുന്നു. ഇവിടെയുണ്ടായിരുന്ന ഒഴിഞ്ഞ ചാക്കുകളിലും കഞ്ചാവിന്റെ ഗന്ധമുണ്ട്. ഇതിനാല്‍ തന്നെ ഇയാള്‍ തൊടുപുഴ നഗരത്തില്‍ വ്യാപകമായി ഏജന്റുമാര്‍ വഴി കഞ്ചാവ് വില്‍പ്പന നടത്തിയിരുന്നതായാണ് വിവരം.

എന്‍ഡിപിഎസ്, അബ്കാരി നിയമപ്രകാരവും ലൈസന്‍സില്ലാതെ സ്ഫോടക വസ്തുക്കള്‍ സൂക്ഷിച്ചതിനും അനൂപ് കേശവനെതിരെ കേസെടുത്തു. കണ്ടെത്തിയ ഉണക്ക ഇറച്ചി കാട്ടുമൃഗത്തിന്റെയാണോ എന്ന് പരിശോധിക്കും. ആണെങ്കില്‍ വന്യജീവി സംരക്ഷണ നിയമ പ്രകാരവും കേസെടുക്കും.

തൊടുപുഴ സിഐ വി.സി. വിഷ്ണുകുമാറിന്റെ നേതൃത്വത്തില്‍ ലോ ആന്റ് ഓര്‍ഡര്‍ എസ്‌ഐ ബൈജു പി. ബാബു, എസ്‌ഐ കൃഷ്ണന്‍ നായര്‍, ഉദ്യോഗസ്ഥരായ ഷംസുദ്ദീന്‍, ഹരീഷ്, ഉണ്ണികൃഷ്ണന്‍, നീതു, രാജേഷ്, ജിന്ന, ഡാന്‍സെഫ് സ്‌ക്വാഡ് അംഗങ്ങള്‍ തുടങ്ങിയവരാണ് പരിശോധന നടത്തിയത്. തൊടുപുഴ മേഖലയില്‍ അടുത്തിടെ പിടികൂടുന്ന ഏറ്റവും വലിയ കഞ്ചാവ് കേസ് കൂടിയാണിത്.

Dailyhunt
Disclaimer: This story is auto-aggregated by a computer program and has not been created or edited by Dailyhunt. Publisher: Janmabhumi Daily
Top