ബ്രിട്ടീഷുകാരുടെ കിരാത ഭരണത്തിനും അടിച്ചമ‍ർത്തലുകള്‍ക്കുമെതിരെ പട നയിച്ച സാന്താള്‍ പോരാളികളുടെ രക്ഷസാക്ഷിത്വത്തിന്റെ ഓർമ്മ പുതുക്കല്‍.
തങ്ങളുടെ മണ്ണും അവകാശങ്ങളും സംര‌ക്ഷിക്കാൻ ഒരു ജനത നടത്തിയ ഈ പോരാട്ടം ചരിത്രത്തില്‍ ഹൂല്‍ കലാപമെന്ന പേരില്‍ എഴുതി ചേർക്കപ്പെട്ടു.
കൊളോണിയല്‍ ശക്തികള്‍ക്കെതിരായി മാത്രം നടത്തിയ ഒരു പോരാട്ടം ആയിരുന്നില്ല അത്. ഒറ്റുക്കാശ് വാങ്ങി ഒരു ജനതയെ ഇല്ലാതാക്കാൻ ശ്രമിച്ച ഹിന്ദുത്വ ശക്തികളും ജമീന്ദ‍ാർമാരും അടങ്ങുന്ന വർഗവഞ്ചകർക്കുമെതിരെ നടത്തിയ പോരാട്ടമായിരുന്നു സാന്താള്‍ കലാപം.
കൊളോണിയലിസത്തിന്റെ ചങ്ങലകളില്‍ നിന്നും നാടുവാഴിത്ത ജന്മിത്വശക്തികളില്‍ നിന്നും ജനങ്ങളെ മോചിപ്പിക്കുക എന്നതായിരുന്നു കലാപത്തിന്റെ അത്യന്തിക ലക്ഷ്യം. അക്കാലത്ത് ബംഗാള്‍ പ്രസിഡൻസിയുടെ ഭാഗമായിരുന്ന പ്രദേശങ്ങളില്‍ നിന്ന് കുടിയിറക്കപ്പെട്ട സാന്താള്‍ ജനതയെ ജാർഖണ്ഡിലെ ചില പ്രദേശങ്ങളില്‍ താമസവും തൊഴിലും നല്‍കി പുനരധിവസിപ്പിച്ചു. എന്നാല്‍, ഇത് ഇവരുടെ മേലുള്ള കൊള്ളയും അക്രമവും വർദ്ധിപ്പിച്ചതേയുള്ളൂ.
ഒടുവില്‍ അടിമത്തത്തിന്റെ ചങ്ങല പൊട്ടിച്ചെറിയാൻ ആ ജനത തീരുമാനിച്ചു. അടിച്ചമർത്തല്‍ ഭരണത്തിനെതിരെ സാന്താള്‍ സഹോദരങ്ങളായ സിദ്ധുവിന്റെയും കൻഹു മുർമുവിന്റെയും നേതൃത്വത്തില്‍ ആയിരക്കണക്കിന് ആദിവാസികള്‍ വിമോചന സമരം ആരംഭിച്ചു. ഈ വിപ്ലവത്തിന്റെ ചരിത്രത്തിലെ വഴിത്തിരിവാണ് ജൂലൈ 7.
അമ്പും വില്ലുമേന്തി വന്ന വിപ്ലവകാരികളെ തോക്കുമേന്തി നേരിടുകയായിരുന്നു ബ്രിട്ടീഷുകാർ ചെയ്തത്. ഈ സമരത്തില്‍ 15000ലധികം സാന്താള്‍ ജനതയാണ് രക്തസാക്ഷിത്വം വരിച്ചത്. ഈ പോരാട്ടത്തെ നേരിടാൻ ബ്രിട്ടീഷ് ഭരണകൂടത്തിന്റെ ഒത്താശയോടെ ദിഘി പൊലീസ് സ്റ്റേഷനിലെ പൊലീസ് ഉദ്യോഗസ്ഥൻ ഇവർക്കടുത്തേക്ക് പാഞ്ഞടുത്തു. എന്നാല്‍, സന്താള്‍ ജനത ഈ ആക്രമണത്തെ ധീരമായി നേരിട്ടു. ദിവസങ്ങള്‍ക്കകം കലാപം പ്രദേശമാകെ വ്യാപിച്ചു.
നാടോടി ഗോറില്ലാ യുദ്ധമുറകളിലൂടെ അവർ ബ്രിട്ടീഷുകാരെ തങ്ങളുടെ ജനതയില്‍ നിന്ന് ആട്ടിയോടിച്ചു. പക്ഷേ സാന്താളുകളുടെ പോരാട്ടത്തെ അവർ ആധുനിക ആയുധങ്ങളുമായി നേരിട്ടു. ഒടുവില്‍ അവസാന സാന്താള്‍ പോരാളിയേയും ബ്രിട്ടീഷുകാർ വെടിവച്ചു വീഴ്ത്തി.
സന്താള്‍ കലാപം രക്തപങ്കിലമായിരുന്നെങ്കിലും അവർ ജീവൻ നല്‍കിയ വിപ്ലവം ആളിക്കത്തി. ആ പോരാട്ടത്തിന്റെ ഫലമായാണ് 1876ല്‍ സന്താള്‍ പർഗാന ടെനൻസ് ആക്‌ട് നടപ്പിലാക്കാൻ ബ്രിട്ടീഷുകാർ നിർബന്ധിതരായത്. ആദിവാസികള്‍ അല്ലാത്തവർക്ക് ആദിവാസി കൈമാറുന്നത് ഈ നിയമം വിലക്കി. ഇന്നും ജാർഖണ്ഡിലെ വിപുലമായ വനമേഖലയില്‍ കൊള്ളയടിക്കാൻ തക്കം പാർത്തിരിക്കുന്ന കോർപ്പറേറ്റുകള്‍ക്ക് ഈ നിയമം ഇപ്പോഴും ഒരു പേടിസ്വപ്നമാണ്.
കോർപ്പറേറ്റുകള്‍ക്ക് വേണ്ടി ആദിവാസി നിയമം മാറ്റിയെഴുതാൻ ശ്രമിക്കുന്ന ഭരണകൂടത്തിനെ മുഷ്ടി ചുരുട്ടി നേരിട്ട സാന്താള്‍ ജനതയുടെ രക്ഷസാക്ഷിത്വത്തിന്റെ കരുത്തില്‍ ഇന്നും ജാർഖണ്ഡിലെ ഈ വിപ്ലവ പ്രസ്ഥാനം സമരമുഖത്തുണ്ട്.