Friday, 27 Nov, 4.25 pm Kairali News

പ്രധാന വാര്‍ത്തകള്‍
'നിങ്ങളുടെ അചഞ്ചലമായ സമര്‍പ്പണത്തിന് നന്ദി ശൈലജ ടീച്ചര്‍'; വോഗ് മാഗസിന്‍ ലീഡര്‍ ഓഫ് ദി ഇയര്‍ അവാര്‍ഡ് പ്രഖ്യാപിച്ച്‌ ദുല്‍ഖര്‍ സല്‍മാന്‍

വോഗ് മാഗസിന്റെ വൂമണ്‍ ഓഫ് ദി ഇയര്‍ അവാര്‍ഡ് പ്രഖ്യാപിച്ച്‌ നടന്‍ ദുല്‍ഖര്‍ സല്‍മാന്‍. കേരളത്തിന്റെ ആരോഗ്യ മന്ത്രി ശൈലജ ടീച്ചര്‍ക്കുള്ള ഈ അവാര്‍ഡ് പ്രഖ്യാപിക്കാന്‍ കഴിഞ്ഞതില്‍ ഏറെ അഭിമാനമുണ്ടെന്ന് പറഞ്ഞുകൊണ്ടാണ് ദുല്‍ഖര്‍ അവാര്‍ഡ് പ്രഖ്യാപിച്ചത്.

സംസ്ഥാനത്തിന് മാത്രമല്ല ഇന്ത്യക്ക് തന്നെ അഭിമാനമാണ് ശൈലജ ടീച്ചര്‍. കൊവിഡ് മഹാമാരിയെ അതിജീവിക്കുന്നതില്‍ മുന്നില്‍ നിന്ന് പോരാടിയ നേതാവാണ് ടീച്ചര്‍. രണ്ടു വര്‍ഷം മുമ്ബ് നിപ വൈറസ് പടര്‍ന്നപ്പോഴും അതിജീവനത്തിന്റെ മാതൃക കാണിച്ചതും ശൈലജ ടീച്ചര്‍ ആയിരുന്നു.

അത്തരമൊരു മാന്യ വ്യക്തിത്വത്തിന് ഈ അവാര്‍ഡ് പ്രഖ്യാപിക്കാനുള്ള അവസരത്തില്‍ ഏറെ സന്തോഷവും ബഹുമാനവുമുണ്ട്. നിങ്ങളുടെ അചഞ്ചലമായ സമര്‍പ്പണത്തിന് കെ കെ ശൈലജ ടീച്ചറിന് നന്ദി. ഈ അവസരത്തിന് വോഗ് ഇന്ത്യയ്ക്കും നന്ദിയെന്ന് ദുല്‍ഖര്‍ പറഞ്ഞു.

ഭുമി പെഡ്നേകര്‍ ആയിരുന്നു വോഗ് വാരിയര്‍ ഓഫ് ദ ഇയര്‍ പുരസ്കാരങ്ങള്‍ പ്രഖ്യാപിച്ചത്. നഴ്സ് ആയ രേഷ്മ മോഹന്‍ദാസ്, ഡോ കമല റാം മോഹന്‍, പൈലറ്റ് സ്വാതി റാവല്‍, കോവിഡ് കാലത്ത് ഫേസ് ഷീല്‍ഡും മാസ്കും ഡോക്ടര്‍മാര്‍ ഉള്‍പ്പെടെയുള്ളവര്‍ക്ക് എത്തിച്ച റിച്ച ശ്രീവാസ്തവ ചബ്ര എന്നിവരാണ് വോഗ് വാരിയര്‍ ഓഫ് ദ ഇയര്‍ ആയി തിരഞ്ഞെടുക്കപ്പെട്ടത്.

Dailyhunt
Disclaimer: This story is auto-aggregated by a computer program and has not been created or edited by Dailyhunt. Publisher: Kairali News
Top