മലയാളികളുടെ പ്രിയ നടൻ ആണ് ഇന്ദ്രൻസ്. ഹാസ്യകഥാപാത്രങ്ങൾ മാത്രം ചെയ്തിരുന്ന നടൻ ക്യാരക്ടർ റോളുകളിലേക്ക് തിരിഞ്ഞപ്പോൾ മലയാളികൾക്ക് ലഭിച്ചത് ഓർത്തു വയ്ക്കാൻ കഴിയുന്ന ഒരു പിടി കഥാപാത്രങ്ങളാണ്.
ഇപ്പോഴിതാ തന്റെ അഭിനയജീവിതത്തിലെ അനുഭവങ്ങളെക്കുറിച്ചും സിനിമയോടുള്ള നിലപാടുകളെക്കുറിച്ചും മനസ്സ് തുറക്കുകയാണ് താരം. തയ്യൽക്കാരനിൽ നിന്നും നാടകവേദിയിലൂടെ മലയാള സിനിമയുടെ മുൻനിരയിലേക്ക് എത്തിയ തന്റെ സുദീർഘമായ യാത്രയെക്കുറിച്ച് അദ്ദേഹം സംസാരിച്ചു. കൈരളി ന്യൂസിന് നൽകിയ പ്രത്യേക അഭിമുഖത്തിലാണ് താരം ഇക്കാര്യങ്ങൾ പങ്കുവെച്ചത്.
താനൊരു സ്റ്റാർ ആണെന്ന് സ്വയം വിചാരിച്ച് ഒന്നും ചെയ്യാൻ കഴിയില്ലെന്ന് ഇന്ദ്രൻസ് വ്യക്തമാക്കുന്നു. സിനിമകൾ പ്രേക്ഷകരുടെ മനസ്സിൽ പ്രതിഷ്ഠിക്കാൻ കഴിഞ്ഞാൽ മാത്രമേ ഏതൊരു നടനും സിനിമയിൽ നിലനിൽക്കാൻ സാധിക്കുകയുള്ളൂ. പ്രശസ്തിക്കായി എത്രയൊക്കെ ശ്രമിച്ചാലും ഒന്നുരണ്ട് സിനിമകൾ തുടർച്ചയായി പരാജയപ്പെട്ടാൽ ആ സ്റ്റാർഡം ഇല്ലാതാകും. ജനങ്ങളുടെ മുന്നിൽ കള്ളത്തരം കാണിക്കാൻ സാധിക്കില്ലെന്നും അദ്ദേഹം വിശ്വസിക്കുന്നു.
വലിയ സിനിമകളിൽ അഭിനയിക്കാനാണോ അതോ നായകകഥാപാത്രങ്ങൾ ചെയ്യാനാണോ താല്പര്യം എന്ന ചോദ്യത്തിന്, തന്നെക്കൊണ്ട് താങ്ങാൻ കഴിയാത്തതും തനിക്ക് യോജിക്കില്ലെന്ന് തോന്നുന്നതുമായ കഥാപാത്രങ്ങൾ താൻ ഒഴിവാക്കാറുണ്ടെന്ന് അദ്ദേഹം മറുപടി നൽകി. കൂടുതൽ അപകടങ്ങളില്ലാതെ പതുക്കെ മുന്നോട്ട് പോകാനാണ് തനിക്കിഷ്ടമെന്നും അദ്ദേഹം കൂട്ടിച്ചേർത്തു.
സിനിമയിൽ സജീവമാകുന്നതിന് മുൻപ് താൻ നാടകങ്ങളിൽ അഭിനയിക്കുകയും സിനിമകളിൽ കോസ്റ്റ്യൂം ചെയ്യുകയുമായിരുന്നു എന്ന് ഇന്ദ്രൻസ് ഓർക്കുന്നു. അക്കാലത്ത് സിനിമയിൽ അഭിനയിച്ചതിന് പണം ലഭിച്ചിരുന്നില്ല. ഒരു കാലത്ത് കൂടെ ജോലി ചെയ്ത നന്ദുവിന് നൽകാൻ പണമില്ലാതെ വന്നപ്പോൾ സ്വന്തം അമ്മയുടെ അടുത്ത് പോയി വഴക്ക് കേട്ടതും ഒടുവിൽ പുറത്തുപോയി പണം ഒപ്പിച്ചു നൽകിയതും അദ്ദേഹം ഓർക്കുന്നു. തയ്യൽക്കാരനായിരുന്ന പഴയ കാലത്ത് മറ്റുള്ളവർക്കെല്ലാം ഓണക്കോടി തയ്ച്ചു നൽകുമായിരുന്നെങ്കിലും തനിക്ക് സ്വന്തമായി പുതിയ വസ്ത്രങ്ങൾ ഉണ്ടാകാറില്ലായിരുന്നു. പഴയ കൂട്ടുകുടുംബ രീതിയിലുള്ള ആഘോഷങ്ങൾ ഇന്ന് പൊളിഞ്ഞുപോയെങ്കിലും, ചെറിയ കുടുംബങ്ങളായി ഇന്നും ഓണക്കാലത്ത് എല്ലാവരും ഒത്തുകൂടാറുണ്ട്.
ഹാസ്യ കഥാപാത്രങ്ങളിൽ നിന്നും ഗൗരവമുള്ള വേഷങ്ങളിലേക്കുള്ള മാറ്റം താൻ ബോധപൂർവ്വം ഉണ്ടാക്കിയതല്ലെന്ന് ഇന്ദ്രൻസ് പറയുന്നു. കാലക്രമേണ ശരീരത്തിലും ശബ്ദത്തിലും വന്ന മാറ്റങ്ങൾ താനറിയാതെ സംഭവിച്ചതാണ്. ‘രാമാനം’, ‘കഥാവശേഷൻ’ തുടങ്ങിയ സിനിമകളാണ് കോമഡിയിലെ അമിത ചലനങ്ങളും ഭാവങ്ങളും എല്ലാ കഥാപാത്രങ്ങൾക്കും യോജിക്കില്ലെന്ന് തനിക്ക് മനസ്സിലാക്കിത്തന്നത്. സീരിയസ് വേഷങ്ങൾ ചെയ്താലും പ്രേക്ഷകർ സ്വീകരിക്കുമെന്ന ധൈര്യം നൽകിയത് ‘കഥാവശേഷൻ’ എന്ന ചിത്രമാണ്. കോമഡി ഇപ്പോഴും തനിക്ക് ഏറെ ഇഷ്ടമാണെങ്കിലും ഇന്നത്തെ സിനിമകളുടെ നിർമ്മാണ രീതി വളരെ മാറിയിരിക്കുന്നു. പുതിയ രീതിയിലുള്ള ചിത്രങ്ങളിൽ സംവിധായകർക്ക് ഒരു ഷോട്ടിനായി പഴയതുപോലെ ക്ഷമയോടെ കാത്തിരിക്കാൻ സാധിക്കാറില്ലെന്നും, എഡിറ്റിങ്ങിലൂടെ അവ മുറിച്ചുമാറ്റപ്പെടുമ്പോൾ കോമഡിയുടെ സ്വാഭാവികത നഷ്ടപ്പെടുന്നുവെന്നും അദ്ദേഹം അഭിപ്രായപ്പെടുന്നു.