ഇടുക്കി: കൊക്കയാറിലെ ഉരുള്പൊട്ടലില് കാണാതായവരില് മൂന്ന് കുട്ടികളുടെ മൃതദേഹങ്ങള് കണ്ടെത്തി. അഫ്ന ഫൈസല് (8), അഫിയാന് ഫൈസല് (4), അംന (7) എന്നിവരുടെ മൃതദേഹങ്ങളാണ് കണ്ടെത്തിയത്.
മൃതദേഹങ്ങള് പൂര്ണ്ണമായി മണ്ണില് പൊതിഞ്ഞ് കിടക്കുന്ന നിലയിലായിരുന്നു.
ജെസിബി ഉപയോഗിച്ച് മണ്ണ് നീക്കം ചെയ്ത് പരിശോധിക്കുന്നതിന് ഇടയിലാണ് മൃതദേഹങ്ങള് കണ്ടെത്തിയത്. രാവിലെ ഏഴുമണി മുതല് എന്ഡിആര്എഫും പൊലീസും പ്രദേശത്ത് തിരച്ചില് നടത്തുകയാണ്. ഇനി അഞ്ചുപേരെയാണ് ഇവിടെ കണ്ടെത്താനുള്ളത്. കൊക്കയാര് പഞ്ചായത്തിന് സമീപം ഒഴിക്കില്പ്പെട്ട് കാണാതായ ആന്സി എന്ന വീട്ടമ്മയെയും കണ്ടെത്താന് കഴിഞ്ഞിട്ടില്ല.
കനത്ത മഴയിലും ഉരുള്പൊട്ടലിലും കോട്ടയം ജില്ലയിലാണ് ഏറ്റവും കൂടുതല് നാശനഷ്ടങ്ങളുണ്ടായത്. ജില്ലയില് മാത്രം ഇതുവരെ കണ്ടെത്തിയ മൃതദേഹങ്ങളുടെ എണ്ണം 11 ആയി. കാവലിയില് നിന്ന് അഞ്ചുമൃതദേഹം കണ്ടെത്തി. സോണിയ, റോഷ്നി, സരസമ്മ മോഹന്, അലന് എന്നിവരുടെ മൃതദേഹവും ഇന്ന് കണ്ടെത്തി. പട്ടിമറ്റത്തുനിന്നും രാജമ്മ, വെട്ടിക്കാനത്തുനിന്നും ഷാലറ്റ് എന്നിവരും മരിച്ചു.
മഴയുടെ ശക്തി കുറഞ്ഞെങ്കിലും തിരുവനന്തപുരം മുതല് കോഴിക്കോട് വരെയുള്ള 11 ജില്ലകളില് യെല്ലോ അലര്ട്ട് പ്രഖ്യാപിച്ചിട്ടുണ്ട്. ചുരുങ്ങിയ സമയത്തില് തോരാതെ പെയ്ത് വലിയ നാശനഷ്ടങ്ങള് ഉണ്ടാക്കുന്ന പെരുമഴയ്ക്ക് കാരണം ലഘുമേഘ വിസ്ഫോടനമാണെന്നാണ് വിലയിരുത്തല്. അസാധാരണമായി രൂപംകൊള്ളുന്ന മേഘകൂമ്ബാരങ്ങളാണ് പലയിടത്തും രണ്ട് മണിക്കൂറില് അഞ്ച് സെന്റിമീറ്ററിലധികം തീവ്രമഴയായി പെയ്തിറങ്ങിയത്.