മുരളീധരൻ. രോഗികള്‍ക്ക് ഭക്ഷണം നല്‍കുന്നതിന് സർക്കാർ എതിരല്ലെന്നും, ആലപ്പുഴ മെഡിക്കല്‍ കോളജിലെ പ്രത്യേക സാഹചര്യത്തെ മുൻനിർത്തിയാണ് കഴിഞ്ഞ ദിവസം നടത്തിയ പരാമർശമെന്നും മന്ത്രി വ്യക്തമാക്കി.

ആഹാരത്തിന് രാഷ്ട്രീയമോ മതമോ ജാതിയോ ഇല്ലെന്നും, അർഹരായ രോഗികള്‍ക്കും കൂട്ടിരിപ്പുകാർക്കും ഭക്ഷണം ലഭ്യമാക്കുക എന്നതാണ് സർക്കാരിന്റെ ലക്ഷ്യമെന്നും അദ്ദേഹം മാധ്യമങ്ങളോട് പറഞ്ഞു. ആരാണ് ഭക്ഷണം നല്‍കുന്നതെന്നതല്ല, അത് ക്രമബദ്ധമായും തടസ്സങ്ങളില്ലാതെയും വിതരണം ചെയ്യപ്പെടുന്നതാണ് പ്രധാനമെന്നും മന്ത്രി കൂട്ടിച്ചേർത്തു.

ആലപ്പുഴ മെഡിക്കല്‍ കോളജ് ആശുപത്രിയില്‍ ഭക്ഷണവിതരണത്തിന്റെ പേരില്‍ ചിലർ പൊതുസ്ഥലം കൈയേറിയ സാഹചര്യമുണ്ടായിരുന്നുവെന്നും അതാണ് തന്റെ പരാമർശത്തിന് ആധാരമായതെന്നും മന്ത്രി വിശദീകരിച്ചു. സർക്കാർ മേല്‍നോട്ടത്തില്‍ ആശുപത്രികളില്‍ കമ്മ്യൂണിറ്റി കിച്ചൻ പദ്ധതി നടപ്പാക്കുമെന്നും, താല്‍പര്യമുള്ള വ്യക്തികള്‍ക്കും സംഘടനകള്‍ക്കും അതിലേക്ക് സംഭാവന നല്‍കാമെന്നും അദ്ദേഹം അറിയിച്ചു.

ആശുപത്രി പരിസരങ്ങളില്‍ രാഷ്ട്രീയ കൊടികളും ബാനറുകളും സ്ഥാപിച്ച്‌ ഭക്ഷണവിതരണം അനുവദിക്കില്ലെന്ന മന്ത്രിയുടെ മുൻപ്രസ്താവന വിവാദമായിരുന്നു. എന്നാല്‍ ആശുപത്രിക്ക് പുറത്തുനിന്ന് ഭക്ഷണം വിതരണം ചെയ്യുന്നതിന് സർക്കാരിന് എതിർപ്പില്ലെന്നും ആശുപത്രിക്കുള്ളില്‍ രാഷ്ട്രീയം അനുവദിക്കില്ലെന്ന നിലപാടാണ് സർക്കാർ സ്വീകരിക്കുന്നതെന്നും മന്ത്രി ആവർത്തിച്ചു.

മന്ത്രിയുടെ നിലപാടിനെതിരെ ഡി.വൈ.എഫ്.ഐ ശക്തമായി രംഗത്തെത്തി. പൊതിച്ചോർ പദ്ധതി മന്ത്രിയുടെ അനുമതിയോടെയല്ല ആരംഭിച്ചതെന്നും ജനങ്ങളുടെ പിന്തുണയുള്ളിടത്തോളം പദ്ധതി തുടരുമെന്നും സംഘടനാ നേതാക്കള്‍ വ്യക്തമാക്കി.

സി.പി.എം നേതാക്കളായ പി.എ. മുഹമ്മദ് റിയാസും എം. സ്വരാജും വിഷയത്തില്‍ പ്രതികരിച്ച്‌ പൊതിച്ചോർ വിതരണം തടസ്സപ്പെടുത്തരുതെന്നും, ഡി.വൈ.എഫ്.ഐയുമായി ആരോഗ്യമന്ത്രി ചർച്ച നടത്തണമെന്നും ആവശ്യപ്പെട്ടു.

ഇതിനിടെ, ബി.ജെ.പി സംസ്ഥാന പ്രസിഡന്റ് കെ. സുരേന്ദ്രനും മന്ത്രിയുടെ നിലപാടിനെ വിമർശിച്ചു. വിവിധ സന്നദ്ധ സംഘടനകള്‍ നടത്തുന്ന ഭക്ഷണവിതരണം തുടരാൻ അനുവദിക്കണമെന്നും സർക്കാർ നിർദേശിച്ച കമ്മ്യൂണിറ്റി കിച്ചൻ പദ്ധതി പ്രായോഗികമല്ലെന്നും അദ്ദേഹം അഭിപ്രായപ്പെട്ടു.

പൊതിച്ചോർ വിതരണത്തെ ചൊല്ലിയുള്ള വിവാദം ഭരണപക്ഷത്തിനുള്ളിലും പ്രതിപക്ഷത്തും രാഷ്ട്രീയ ചർച്ചകള്‍ക്ക് വഴിവെച്ചിരിക്കുകയാണ്. റിപ്പോർട്ട്: കെ. ആർ. സുകുമാരൻ