തിരുവനന്തപുരം: രണ്ട് മാസത്തെ വേനലവധിക്ക് ശേഷം സംസ്ഥാനത്തെ സ്‌കൂളുകള്‍ ഇന്ന് തുറന്നു. ഇക്കുറി ആര്‍ഭാടങ്ങള്‍ പൂര്‍ണ്ണമായും ഒഴിവാക്കിയാണ് പ്രവേശനോത്സവം സംഘടിപ്പിച്ചത്.
' പാഠം 1: പുതുയുഗ വിദ്യാലയം ' എന്ന ആശയത്തിലൂന്നിയാണ് ഈ വര്‍ഷം അധ്യായന വര്‍ഷം ആരംഭിക്കുന്നത്. സംസ്ഥാനതല സ്‌കൂള്‍ പ്രവേശനോത്സവം രാവിലെ 10 ന് തിരുവനന്തപുരം പട്ടം ഗവ. മോഡല്‍ ഗേള്‍സ് എച്ച്‌എസ്‌എസ്സില്‍ മുഖ്യമന്ത്രി വി.ഡി. സതീശന്‍ ഉദ്ഘാടനം ചെയ്തു.
കേരളത്തിലെ വിദ്യാഭ്യാസ പുരോഗതിയില്‍ അമ്മമാര്‍ വളരെ വലിയ പങ്ക് വഹിച്ചിട്ടുണ്ടെന്ന് അദ്ദേഹം ഉദ്ഘാടന പ്രസംഗത്തില്‍ എടുത്തുപറഞ്ഞു. വിദ്യാലയങ്ങളിലെ പി.ടി.എ. യോഗങ്ങളില്‍ പങ്കെടുക്കുന്നവരില്‍ 80 ശതമാനവും സ്ത്രീകളാണെന്നത് കുട്ടികളുടെ പഠനകാര്യത്തില്‍ അവര്‍ക്കുള്ള കനത്ത താല്പര്യത്തെയാണ് കാണിക്കുന്നതെന്നും അദ്ദേഹം ചൂണ്ടിക്കാട്ടി.
അധ്യാപകരും രക്ഷിതാക്കളും തമ്മില്‍ എപ്പോഴും നല്ലൊരു സൗഹൃദം ഉണ്ടായിരിക്കണം. കുട്ടികളിലെ പ്രത്യേക കഴിവുകള്‍ കൃത്യമായി തിരിച്ചറിയാന്‍ ഇത്തരത്തിലുള്ള നല്ല സൗഹൃദങ്ങള്‍ സഹായിക്കുമെന്നും മുഖ്യമന്ത്രി പറഞ്ഞു. പ്രശസ്ത ചരിത്രകാരന്‍ എം.ജി.എസ്. നാരായണന്റെ മകന്‍ ലണ്ടനിലെ സ്‌കൂളില്‍ പഠിക്കുന്ന സമയത്ത്, അവിടുത്തെ അധ്യാപകര്‍ ആ കുട്ടിയുടെ ഗണിതത്തിലുള്ള പ്രത്യേക കഴിവ് തിരിച്ചറിഞ്ഞ സംഭവം അദ്ദേഹം തന്റെ പ്രസംഗത്തില്‍ ഉദാഹരണമായി ചൂണ്ടിക്കാട്ടി. സമാനമായ രീതിയില്‍ നമ്മുടെ നാട്ടിലെ ഓരോ കുട്ടിക്കുമുള്ള വ്യത്യസ്തമായ താല്പര്യങ്ങളും കഴിവുകളും ചെറുപ്പത്തില്‍ തന്നെ കണ്ടെത്താന്‍ നമുക്ക് സാധിക്കണമെന്നും അദ്ദേഹം ഓര്‍മ്മിപ്പിച്ചു.
പെണ്‍കുട്ടികളുടെ ആര്‍ത്തവ അവധി ഉള്‍പ്പെടെയുള്ള സര്‍ക്കാര്‍ പ്രഖ്യാപനവും അതിന്റെ തുടര്‍ നടപടികളും വലിയ രീതിയില്‍ ചര്‍ച്ചയാവുന്ന സാഹചര്യത്തിലാണ് ഇത്തവണ പ്രവേശനോല്‍സവം നടന്നത്.
സംസ്ഥാനതല പ്രവേശനോത്സവ ചടങ്ങില്‍ പൊതുവിദ്യാഭ്യാസ വകുപ്പ് മന്ത്രി എന്‍. ഷംസുദ്ദീന്‍ അധ്യക്ഷത വഹിച്ചു. ആരോഗ്യ-ദേവസ്വം വകുപ്പ് മന്ത്രി കെ. മുരളീധരന്‍, ഗതാഗത വകുപ്പ് മന്ത്രി സി.പി. ജോണ്‍, മറ്റ് ജനപ്രതിനിധികള്‍, കലാ-സാംസ്‌കാരിക-വിദ്യാഭ്യാസ പ്രവര്‍ത്തകര്‍ തുടങ്ങിയവര്‍ പങ്കെടുത്തു. കനത്ത മഴയുണ്ടാകുമെന്ന കാലാവസ്ഥാ മുന്നറിയിപ്പ് നിലനില്‍ക്കുന്നത് കുട്ടികളെയും രക്ഷിതാക്കളെയും നേരിയ ആശങ്കയിലാഴ്ത്തിയിരുന്നെങ്കിലും ചടങ്ങുകള്‍ നടന്നപ്പോള്‍ മഴ മാറി നിന്നിരുന്നത് ആശ്വാസമായി.
സംസ്ഥാനത്തെ എല്ലാ വിദ്യാലയങ്ങളിലും ജില്ലാ, ബ്ലോക്ക് തലങ്ങളിലും വിപുലമായ രീതിയില്‍ പ്രവേശനോത്സവം നടന്നു.
സംസ്ഥാനത്തുടനീളമുള്ള സ്‌കൂള്‍ വിദ്യാര്‍ത്ഥികള്‍ ഒരു സൈബര്‍ സുരക്ഷാ പ്രതിജ്ഞയെടുത്തു. ഓണ്‍ലൈന്‍ ഭീഷണികളെക്കുറിച്ചും ഉത്തരവാദിത്തമുള്ള ഡിജിറ്റല്‍ പെരുമാറ്റത്തെക്കുറിച്ചും കുട്ടികളില്‍ അവബോധം വളര്‍ത്തുന്നതിനായി നടത്തുന്ന സംസ്ഥാനവ്യാപക കാമ്പെയ്‌ന്റെ ഭാഗമായാണ് ഈ തീരുമാനം. ഡിജിറ്റല്‍ ലോകത്ത് കുട്ടികള്‍ക്ക് സുരക്ഷിതമായി സഞ്ചരിക്കാന്‍ സഹായിക്കുക എന്ന ലക്ഷ്യത്തോടെ കേരള പോലീസിന്റെ സൈബര്‍ വിംഗ് നടപ്പിലാക്കുന്ന 'കിഡ് ഗ്ലൗ' പദ്ധതിയുടെ കീഴിലാണ് ഈ സംരംഭം ആരംഭിക്കുന്നത്.
ഓണ്‍ലൈന്‍ ലോകത്ത് നിലനില്‍ക്കുന്ന കെണികളെയും അപകടങ്ങളെയും കുറിച്ച്‌ വിദ്യാര്‍ത്ഥികളെ ബോധവത്കരിക്കുന്നതിനും ചെറുപ്രായം മുതല്‍ തന്നെ സുരക്ഷിതമായ ഇന്റര്‍നെറ്റ് ശീലങ്ങള്‍ പ്രോത്സാഹിപ്പിക്കുന്നതിനുമായാണ് ഈ പ്രോഗ്രാം രൂപകല്‍പ്പന ചെയ്തിരിക്കുന്നതെന്ന് സംസ്ഥാന പോലീസ് ആസ്ഥാനം ഞായറാഴ്ച പുറത്തിറക്കിയ പ്രസ്താവനയില്‍ വ്യക്തമാക്കിയിരുന്നു. ഡിജിറ്റല്‍ പ്ലാറ്റ്ഫോമുകളുടെ സുരക്ഷിതവും ഉത്തരവാദിത്തമുള്ളതുമായ ഉപയോഗം, സൈബര്‍ ഭീഷണികളില്‍ നിന്നുള്ള സംരക്ഷണം, ഓണ്‍ലൈന്‍ ഗെയിമിംഗ് അപകടങ്ങള്‍, വ്യാജ വാര്‍ത്തകളെക്കുറിച്ചുള്ള അവബോധം, സ്വകാര്യതാ സംരക്ഷണം, ഡിജിറ്റല്‍ അഡിക്ഷന്‍, സൈബര്‍ ഹൈജീന്‍, സോഷ്യല്‍ മീഡിയ സുരക്ഷ, ഉത്തരവാദിത്തമുള്ള ഡിജിറ്റല്‍ പെരുമാറ്റം എന്നിവയുള്‍പ്പെടെയുള്ള വിപുലമായ വിഷയങ്ങള്‍ ഈ പദ്ധതി ഉള്‍ക്കൊള്ളുന്നു.