മുംബൈ: കഴിഞ്ഞ രണ്ട് കളികളിലും തോല്വികളുടെ പരമ്പര അവസാനിപ്പിച്ച് വിജയവഴിയിലേക്ക് തിരികെയെത്താന് ഒരുങ്ങി ശ്രേയസ് അയ്യരുടെ ക്യാപ്റ്റന്സിക്ക് കീഴില് ടീം ഇന്ത്യ.
സിംബാബ്വെക്കെതിരായ മൂന്ന് മത്സരങ്ങളുടെ ട്വന്റി20 പരമ്പരയിലെ ആദ്യ പോരാട്ടം നാളെ ഹരാരെ സ്പോര്ട്സ് ക്ലബ്ബില് നടക്കും.
സൂര്യകുമാര് യാദവില് നിന്ന് ടി20 നായകസ്ഥാനം ഏറ്റെടുത്ത ശ്രേയസ് അയ്യര്ക്ക് നായകനായുള്ള തുടക്കം കഠിനമായിരുന്നു. അയ്യരുടെ കീഴില് ഇറങ്ങിയ ആദ്യ രണ്ട് പരമ്പരകളിലും ഇന്ത്യ പരാജയപ്പെട്ടു. അയര്ലന്ഡിനെതിരെ 2-0 ത്തിന്റെ തോല്വിയും തുടര്ന്ന് ഇംഗ്ലണ്ടിനെതിരെ 4-0ത്തിന്റെ കനത്ത പ്രഹരവും.
2026 ടി20 ലോകകപ്പിലെ പ്ലെയര് ഓഫ് ദി ടൂര്ണമെന്റും സ്ഥിരം ഓപ്പണറുമായ സഞ്ജു സാംസണിന് ഈ പരമ്പരയില് വിശ്രമം അനുവദിച്ചിട്ടുണ്ട്. സഞ്ജുവിന്റെ അഭാവത്തില് 15കാരനായ ബാറ്റിംഗ് സെന്സേഷന് വൈഭവ് സൂര്യവന്ഷിക്ക് ഇന്ത്യന് ജേഴ്സിയില് കൂടുതല് അവസരങ്ങള് ലഭിച്ചേക്കും. ഇംഗ്ലണ്ട് പരമ്പരയിലൂടെ ദേശീയ ടീമില് അരങ്ങേറ്റം കുറിച്ചപ്പോള് വലിയ പ്രതീക്ഷകളാണ് ഈ യുവതാരത്തിന് മേലുണ്ടായിരുന്നത്. എന്നാല് ആദ്യ മത്സരങ്ങളിലെ കുറഞ്ഞ സ്കോറുകള് (13, 14, 15) കാരണം അഞ്ചാമത്തെയും അവസാനത്തെയും മത്സരത്തില് താരത്തെ ടീമില് നിന്ന് ഒഴിവാക്കിയിരുന്നു.
സീനിയര് തലത്തില് തന്റെ മികവ് തെളിയിക്കാന് സൂര്യവന്ഷി ആഗ്രഹിക്കുമ്പോള്, ലോകത്തിലെ മുന്നിര ടി20 ബാറ്റര്മാരായ അഭിഷേക് ശര്മ്മ, ഇഷാന് കിഷന് എന്നിവരിലേക്കും ശ്രദ്ധ എത്തും. കഴിഞ്ഞ പരമ്പരയില് ബാറ്റ് കൊണ്ട് മികച്ച പ്രകടനമാണ് അഭിഷേക് കാഴ്ചവെച്ചത്. എന്നാല് വെല്ലുവിളി നിറഞ്ഞ സാഹചര്യങ്ങളില് ഇഷാന് കിഷന് ഫോം കണ്ടെത്താനായിരുന്നില്ല. പ്രിന്സ് യാദവ്, മയങ്ക് യാദവ്, യഷ് ഠാക്കൂര്, അശോക് ശര്മ്മ, ഹര്ഷ് ദുബെ എന്നിവരടങ്ങുന്ന പരിചയസമ്പത്ത് കുറഞ്ഞ ബൗളിംഗ് നിരയ്ക്ക്, സ്വന്തം മണ്ണില് അപകടകാരികളാകാന് ശേഷിയുള്ള സിംബാബ്വെക്കെതിരെ കടുത്ത പരീക്ഷണം നേരിടേണ്ടി വരും.