ചവറ എംഎല്എ ഡോക്ടർ സുജിത്ത് വിജയൻപിള്ളക്കെതിരെ തിരഞ്ഞെടുപ്പ് കാലത്ത് ഗുരുതര ആരോപണങ്ങള് ഉയരുന്നു. എംഎല്എയുടെ വിനയപ്രകടനങ്ങള് വെറും കച്ചവട തന്ത്രമാണെന്നും, ഇതിന് പിന്നില് പാവപ്പെട്ട തൊഴിലാളികളുടെ കണ്ണീരിന്റെ കഥയുണ്ടെന്നുമാണ് പുറത്തുവരുന്ന വിവരങ്ങള്.
സർക്കാർ ചെലവില് കുടുംബത്തിന് വാടക വരുമാനം
എംഎല്എയുടെ കുടുംബത്തിന്റെ ഉടമസ്ഥതയിലുള്ള, ലാഭമില്ലാതെ പൂട്ടിപ്പോയ സ്കൂള് കെട്ടിടം സർക്കാർ ഉടമസ്ഥതയിലുള്ള നഴ്സിംഗ് കോളേജിനായി വാടകയ്ക്ക് നല്കിയിരിക്കുകയാണ്. അധികാരം ദുരുപയോഗം ചെയ്തുകൊണ്ടുള്ള ഈ ഡീലില് മാസം ഒന്നര ലക്ഷം രൂപയിലധികം വാടകയിനത്തില് സർക്കാർ ഖജനാവില് നിന്ന് എംഎല്എയുടെ കുടുംബത്തിലേക്ക് എത്തുന്നതായി ആരോപണമുയർന്നിട്ടുണ്ട്. വരുമാനം നിലച്ചുപോകുമായിരുന്ന ഒരു കെട്ടിടത്തെ സർക്കാർ സംവിധാനം ഉപയോഗിച്ച് ലാഭകരമായ വരുമാന മാർഗ്ഗമാക്കി മാറ്റുകയാണ് ഇവിടെ ചെയ്തിരിക്കുന്നതെന്നാണ് ഉയരുന്ന ആക്ഷേപം.
തൊഴിലാളി വഞ്ചനയും ലേബർ കോടതിയിലെ കേസുകളും
സ്കൂള് പൂട്ടിയതോടെ വർഷങ്ങളോളം അവിടെ സേവനം അനുഷ്ഠിച്ച തൊഴിലാളികള് പെരുവഴിയിലായി. അവർക്ക് ലഭിക്കേണ്ട നിയമപരമായ ആനുകൂല്യങ്ങളോ ഗ്രാറ്റിവിറ്റിയോ നല്കാതെയാണ് മാനേജ്മെന്റ് അവരെ പുറത്താക്കിയതെന്ന് അവർ പരാതിപ്പെടുന്നു. നീതിക്കായി മൂന്ന് ബസ് ഡ്രൈവർമാർ ലേബർ കോടതിയെ സമീപിച്ചു. GC 155/2022, GC 156/2022, GC 157/2022 എന്നീ നമ്പറുകളില് ലേബർ കോടതിയില് നിലനില്ക്കുന്ന കേസുകള് എംഎല്എയുടെ തൊഴിലാളി വിരുദ്ധ നിലപാടിന്റെ തെളിവായി ചൂണ്ടിക്കാണിക്കപ്പെടുന്നു.
അശോകന്റെ മരണം: നീതി ലഭിക്കാത്ത വിലാപം
ഈ വഞ്ചനയുടെ ഏറ്റവും ദാരുണമായ ഇരയാണ് പരേതനായ അശോകൻ. ജോലി നഷ്ടപ്പെട്ടതിന് പിന്നാലെ ക്യാൻസർ ബാധിതനായ അദ്ദേഹം, തന്റെ ചികിത്സാ ചിലവുകള്ക്കായി അർഹതപ്പെട്ട ആനുകൂല്യം ലഭിക്കാനായി എംഎല്എയുടെ പടിവാതില്ക്കല് പലവട്ടം കയറിയിറങ്ങി. എന്നാല് കാരുണ്യത്തിന് പകരം അവഗണനയും അപമാനവുമാണ് അദ്ദേഹത്തിന് നേരിടേണ്ടി വന്നത്. ഒടുവില് അർഹമായ ആനുകൂല്യം ലഭിക്കാതെ അശോകൻ ഈ ലോകത്തോട് വിടപറഞ്ഞു. ഇന്നും ലേബർ കോടതിയിലെ ഫയലുകള്ക്കുള്ളില് അശോകന്റെ അവകാശങ്ങള്ക്കായുള്ള പോരാട്ടം ഒരു കേസ് നമ്പറായി അവശേഷിക്കുന്നു.
ഒരു ഡോക്ടർ കൂടിയായ ജനപ്രതിനിധി സ്വന്തം തൊഴിലാളിയുടെ വേദനയ്ക്ക് നേരെ കണ്ണടയ്ക്കുന്നത് ജനങ്ങള്ക്കിടയില് വലിയ പ്രതിഷേധത്തിന് കാരണമായിട്ടുണ്ട്. വിനയത്തിന്റെ മുഖംമൂടി അണിഞ്ഞുള്ള ഈ 'നന്മമരം' ഇമേജ് ചവറയിലെ ബോധമുള്ള ജനങ്ങള് തിരിച്ചറിയുമെന്നുമെന്നാണ് ഉയരുന്ന വിമർശനം.