വിഷ്ണു വിജയധരൻ എന്ന യുവാവാണ് ലണ്ടനിലെ സെൻട്രല്‍ ഏരിയയില്‍ ആളുകളുടെ ചിത്രങ്ങള്‍ പകർത്തി വില്‍ക്കാൻ ശ്രമിച്ചത്. ഒരു ചിത്രത്തിന് അഞ്ച് പൗണ്ട് ( 540 രൂപ) എന്ന നിരക്കിലായിരുന്നു കച്ചവടം.

ലണ്ടനില്‍ പോളറോയ്‌ഡ് ചിത്രങ്ങള്‍ വിറ്റാല്‍ എത്ര രൂപയുണ്ടാക്കാൻ സാധിക്കുമെന്ന ചലഞ്ചോടെയാണ് വിഷ്ണു വീഡിയോ പങ്കുവച്ചത്. 'വിസ നാളെ തീരുന്നവർ മാത്രം ശ്രമിക്കുക. 10 മിനിട്ടില്‍ നമ്മള്‍ എത്രയുണ്ടാക്കി?' എന്ന അടിക്കുറിപ്പോടെയാണ് വിഷ്ണു ഇൻസ്റ്റഗ്രാമില്‍ വീഡിയോ പോസ്റ്റ് ചെയ്തത്. വിസ നാളെ അവസാനിക്കുകയാണെങ്കില്‍ മാത്രം ഇത് ട്രൈ ചെയ്യുക എന്ന് തമാശരൂപേണയുള്ള ഒരു മുന്നറിയിപ്പും യുവാവ് നല്‍കുന്നുണ്ട്.

തുടർച്ചയായി 38 ചിത്രങ്ങള്‍ വരെ എടുക്കാൻ കഴിയുന്ന കൊഡാക്കിന്റെ ഒരു ക്യാമറ വിഷ്ണു ഇതിനായി വാങ്ങിയിരുന്നു. ലണ്ടനിലെത്തിയ വിനോദസഞ്ചാരികള്‍ വളരെ താല്പര്യത്തോടെ വിഷ്ണുവിനെക്കൊണ്ട് ഫോട്ടോ എടുപ്പിക്കാൻ മുന്നോട്ട് വരുന്നതും വീഡിയോയില്‍ കാണാം. 'ആദ്യത്തെ കുറച്ചു ബിസിനസ് കഴിഞ്ഞപ്പോള്‍ നമ്മള്‍ ലക്ഷപ്രഭുക്കള്‍ ആകുമെന്നാണ് താൻ ശരിക്കും വിചാരിച്ചത്.

എന്നാല്‍ അടുത്ത കസ്റ്റമർ ആയി എത്തിയത് പൊലീസായിരുന്നുവെന്ന് വിഷ്ണു വീഡിയോയില്‍ പറയുന്നു. ലണ്ടനിലെ നിയമമനുസരിച്ച്‌ ലൈസൻസില്ലാതെ തെരുവുകളില്‍ കച്ചവടം നടത്തുന്നതും ആളുകളെ സമീപിച്ച്‌ ബിസിനസ് നടത്തുന്നതും നിരോധിച്ചിട്ടുള്ളതാണ്. വെറും 10 മിനിട്ടില്‍ 11 പൗണ്ട് ( 1,200 രൂപ) സമ്പാദിച്ചപ്പോഴേക്കും പൊലീസും സിറ്റി എൻഫോഴ്സ്‌മെന്റ് ഉദ്യോഗസ്ഥരും ഇടപെട്ട് വിഷ്ണുവിന്റെ കച്ചവടം തടയുകയായിരുന്നു.

ഇങ്ങനെയൊരു കാര്യം ചെയ്യാൻ മുനിസിപ്പാലിറ്റിയില്‍ നിന്നും പ്രത്യേക അനുമതി വേണമായിരുന്നു എന്ന് തനിക്ക് അറിയില്ലായിരുന്നുവെന്ന് വിഷ്ണു പറഞ്ഞു. പക്ഷേ കൃത്യമായ അനുമതിയോടെയാണ് ചെയ്യുന്നതെങ്കില്‍ ഇവിടെ സുഖമായി മണിക്കൂറില്‍ 100 പൗണ്ട് (പതിനായിരം) വരെ ഉണ്ടാക്കാൻ സാധിക്കുമെന്നും യുവാവ് കൂട്ടിച്ചേർത്തു.