Tuesday, 22 Oct, 12.36 am കേരളകൗമുദി

ലേറ്റസ്റ്റ് ന്യൂസ്
കനത്ത മഴയില്‍ കൊച്ചി മുങ്ങി

കൊച്ചി: ഞായറാഴ്ച രാത്രി തുടങ്ങി ഇന്നലെ രാവിലെ വരെ നീണ്ട അതിതീവ്ര മഴയില്‍ കൊച്ചി നഗരം മുങ്ങി. വെള്ളക്കെട്ട് റോ‌ഡ് - ട്രെയിന്‍ ഗതാഗതം മുടക്കി. വൈദ്യുതി ബന്ധം താറുമാറാക്കി. അപ്രതീക്ഷിതമായി വീടുകളിലേക്ക് വെള്ളം ഇരച്ചുകയറിയതോടെ ആളുകള്‍ ഭയചകിതരായി. ഉച്ചയോടെ ഭാഗികമായി ഗതാഗതം പുനഃസ്ഥാപിച്ചു. താണപ്രദേശങ്ങള്‍ ഇപ്പോഴും വെള്ളക്കെട്ടിലാണ്. കനത്ത മഴ എറണാകുളം നിയമസഭാ മണ്ഡലത്തിലെ വോട്ടിംഗ് ശതമാനത്തെയും ഏറെ താഴ്ത്തി.

പ്രളയസമയത്ത് സുരക്ഷിതമായിരുന്ന വീടുകളിലും വെള്ളം കയറി. നഗരത്തിലെ പ്രധാന റോഡുകളായ എം.ജി റോഡും ബാനര്‍ജി റോഡും പുഴയായി മാറി. റോഡുകളുടെ വശങ്ങളിലും മാളുകളിലും ഹോട്ടലുകളുടെ ഏരിയകളിലും പാര്‍ക്ക് ചെയ്‌തിരുന്ന വാഹനങ്ങള്‍ മുങ്ങി. എം.ജി റോഡിന്റെ ഇരുവശങ്ങളിലുമുള്ള ഭൂരിഭാഗം കടകളിലും വെള്ളം കയറി. ഇന്നലെ വ്യാപാരസ്ഥാപനങ്ങള്‍ അടഞ്ഞുകിടന്നു.
എറണാകുളം നോര്‍ത്ത്, ജംഗ്ഷന്‍ റെയില്‍വേ സ്‌റ്റേഷനുകളിലെ ട്രാക്കില്‍ വെള്ളം കയറിയതോടെ ട്രെയിന്‍ ഗതാഗതം തടസപ്പെട്ടു. വൈകിട്ടോടെ പുനഃസ്ഥാപിച്ചെങ്കിലും ആട്ടാേമാറ്റിക് സിഗ്നല്‍ സംവിധാനം തകരാറിലായതിനാല്‍ ട്രെയിനുകള്‍ വൈകിയാണ് ഓടുന്നത്. കലൂര്‍ കെ.എസ്.ഇ.ബി സബ്സ്റ്റേഷനില്‍ വെള്ളം കയറിയതോടെ നഗരത്തിലെ വൈദ്യുതി നിലച്ചു. ഇന്ന് വൈകിട്ടോടെയേ വൈദ്യുതിബന്ധം നേരെയാകൂ. മറ്റിടങ്ങളില്‍ നിന്ന് നഗരത്തിന്റെ ചില ഭാഗങ്ങളില്‍ ഇന്നലെ രാത്രി കെ.എസ്.ഇ.ബി വൈദ്യുതി എത്തിച്ചു.

സ്വകാര്യ ബസുകളും കെ.എസ്.ആര്‍.ടി.സിയും സര്‍വീസ് നിറുത്തിയതോടെ ഇന്നലെ രാവിലെ മെട്രോ മാത്രമായിരുന്നു ഗതാഗത സംവിധാനം. ചെറിയ വാഹനങ്ങളൊന്നും നിരത്തിലിറങ്ങിയില്ല. വൈകിട്ടോടെ ബസുകള്‍ ഭാഗികമായി ഓടിത്തുടങ്ങി.

Dailyhunt
Disclaimer: This story is auto-aggregated by a computer program and has not been created or edited by Dailyhunt. Publisher: Kerala Kaumudi
Top