ഒഡീഷയിലെ ചിലിക്ക തടാകം ശൈത്യകാല ദേശാടനപ്പക്ഷികളുടെ വരവോടെ വീണ്ടും സജീവമാകുകയാണ്. ഇന്ത്യയിലെ ഏറ്റവും വലിയ ഉപ്പുരസമുള്ള കായല്‍ പ്രദേശമായ ചിലിക്ക ശൈത്യകാലത്ത് നിരവധി ദേശാടനപ്പക്ഷികളുടെ പ്രധാന താവളമായി മാറുന്നു.
തണുപ്പുകാലം ആരംഭിക്കുന്നതോടെ വിവിധ രാജ്യങ്ങളില്‍നിന്ന് പക്ഷികള്‍ ഇവിടെ എത്തിത്തുടങ്ങും.
മംഗളജോഡി മേഖലയാണ് പക്ഷിനിരീക്ഷണത്തിന് ഏറെ അനുയോജ്യം. തദ്ദേശീയ സമൂഹങ്ങള്‍ നടത്തുന്ന ബോട്ട് യാത്രകളിലൂടെ തടാകത്തിലെ പക്ഷികളെ അടുത്തുനിന്ന് നിരീക്ഷിക്കാം. യൂറേഷ്യൻ വിഗണ്‍, റഡ്ഡി ഷെല്‍ഡക്ക്, പെലിക്കൻ, ഫ്ലമിംഗോ തുടങ്ങിയ പക്ഷികളെ കാണാനുള്ള സാധ്യതയുണ്ട്. സത്പാദ പ്രദേശത്ത് ഇറാവഡി ഡോള്‍ഫിനുകളെയും നിരീക്ഷിക്കാം.
പ്രകൃതിയെയും പക്ഷികളെയും ഇഷ്ടപ്പെടുന്നവർക്ക് കുടുംബത്തോടൊപ്പം സന്ദർശിക്കാവുന്ന വ്യത്യസ്തമായ യാത്രാകേന്ദ്രമാണിത്. പക്ഷികളുടെ സ്വാഭാവിക ആവാസവ്യവസ്ഥയ്ക്ക് ബുദ്ധിമുട്ടുണ്ടാക്കാത്ത രീതിയില്‍ യാത്ര നടത്തണം. പക്ഷികളെ ശല്യപ്പെടുത്താതിരിക്കുകയും പ്ലാസ്റ്റിക് ഉള്‍പ്പെടെയുള്ള മാലിന്യങ്ങള്‍ തടാകത്തില്‍ ഉപേക്ഷിക്കാതിരിക്കുകയും ചെയ്യുന്നത് സന്ദർശകരുടെ ഉത്തരവാദിത്തമാണ്.