വൈദ്യശാസ്ത്രപരമായി 'എക്‌റ്റോപിക് ടൂത്ത്' (Ectopic Tooth) എന്ന് വിളിക്കുന്ന ഈ അവസ്ഥ പലപ്പോഴും ആശങ്കയ്ക്ക് കാരണമാകാറുണ്ട്. വായ്ക്കുള്ളില്‍ പല്ലുകള്‍ മുളക്കേണ്ട നിശ്ചിത സ്ഥാനത്തിന് പകരം, മോണയുടെ വശങ്ങളിലോ, അണ്ണാക്കിലോ, മൂക്കിനോടനുബന്ധമായ ഭാഗങ്ങളിലോ പല്ലുകള്‍ വളരുന്ന അവസ്ഥയാണിത്.

സാധാരണയായി സ്ഥിരമായ പല്ലുകള്‍ മുളച്ചു വരുമ്പോഴാണ് ഈ പ്രശ്നം കണ്ടുവരുന്നത്. താടിയെല്ലില്‍ വേണ്ടത്ര സ്ഥലമില്ലാതെ വരുമ്പോഴോ, പല്ല് മുളക്കുന്ന ദിശ തെറ്റമ്പോഴോ ആണ് എക്‌റ്റോപിക് പല്ലുകള്‍ രൂപപ്പെടുന്നത്. കുട്ടികളിലും കൗമാരക്കാരിലുമാണ് ഇത് കൂടുതലായി കണ്ടുവരുന്നത്.

എക്‌റ്റോപിക് ടൂത്തിന്റെ പ്രധാന ലക്ഷണങ്ങളും പ്രശ്നങ്ങളും:

• വായ്ക്കുള്ളില്‍ സാധാരണ സ്ഥാനത്തിന് പുറമെ പുതിയ പല്ല് തള്ളിനില്‍ക്കുക.

• മോണയില്‍ അവിചാരിതമായി വേദനയോ നീരോ അനുഭവപ്പെടുക.

• മറ്റ് പല്ലുകളുടെ വളർച്ച തടസ്സപ്പെടുകയും വായുടെ സൗന്ദര്യം നഷ്ടപ്പെടുകയും ചെയ്യുക.

• വായ് വൃത്തിയാക്കാൻ ബുദ്ധിമുട്ട് നേരിടുന്നതിനാല്‍ അണുബാധയ്ക്കുള്ള സാധ്യത വർധിക്കുക.

പരിഹാരമാർഗ്ഗങ്ങള്‍: ഈ അവസ്ഥയ്ക്ക് വിദഗ്ദ്ധരായ ദന്തല്‍ സർജൻമാരുടെ സേവനമാണ് തേടേണ്ടത്. എക്സ്-റേ (X-ray) പരിശോധനയിലൂടെ പല്ലിന്റെ കൃത്യമായ സ്ഥാനം മനസിലാക്കി ചികിത്സ നിശ്ചയിക്കാം. ആവശ്യമെങ്കില്‍ ബ്രേസുകള്‍ (Braces) ഉപയോഗിച്ച്‌ പല്ലിനെ ശരിയായ സ്ഥാനത്തേക്ക് മാറ്റുകയോ, മറ്റ് പല്ലുകള്‍ക്ക് തടസ്സമാകുന്നുവെങ്കില്‍ ശസ്ത്രക്രിയയിലൂടെ നീക്കം ചെയ്യുകയോ ആണ് സാധാരണയായി ചെയ്യാറുള്ളത്. വായുടെ ആരോഗ്യം കൃത്യമായി പാലിക്കുന്നതിലൂടെ ഇത്തരം ദന്തപ്രശ്നങ്ങള്‍ തുടക്കത്തില്‍ തന്നെ കണ്ടെത്താനും പരിഹരിക്കാനും സാധിക്കും.