കൃഷിചെയ്യാൻ ഇഷ്ട്ടമാണ്, എന്നാല് സ്ഥലം ഇല്ലെന്ന വിഷമത്താല് ഇരിക്കുന്നവരാണോ നിങ്ങള് ? എങ്കില് അത്തരത്തില് ഉള്ളവർക്ക് ചെയ്യാൻ കഴിയുന്ന കൃഷിയെക്കുറിച്ച് അറിയാം.
മുറ്റവും വലിയ സ്ഥലവും ഇല്ലെങ്കിലും നമുക്ക് ടെറസിലോ ബാല്ക്കണിയിലോ എളുപ്പത്തില് വളർത്താനും വേഗത്തില് നന്നായി വളരുന്നതുമായ ചില പച്ചക്കറികള് ഉണ്ട്. തുടക്കക്കാർക്കോ സമയക്കുറവുളളവർക്കോ ചെയ്യാവുന്ന കൃഷിയാണിത്. ബാല്ക്കണിയിലും ടെറസിലും എളുപ്പത്തിലും കുറഞ്ഞ പരിപാലനത്തില് കൂടുതല് വിളവ് തരുന്നതുമായ ചില പച്ചക്കറികള് പരിചയപ്പെടാം...
ചെറി തക്കാളി
ഒതുക്കമുള്ളതും നല്ല വിളവ് ലഭിക്കുന്നതുമായ പച്ചക്കറി. നല്ല നീർവാർച്ചയും മണ്ണിൻറെ ഉപരിതലം വരണ്ടതായി തോന്നുമ്പോള് പതിവായുള്ള നനയും മാത്രം മതി. ചെറു പാത്രങ്ങളില് വളർത്താൻ അനുയോജ്യം. ദിവസേന 5-6 മണിക്കൂർ സൂര്യപ്രകാശം ലഭിച്ചാല് മതി. ധാരാളം ഫലങ്ങള് ലഭിക്കും.
ചീര
കുറച്ച് വെള്ളവും സൂര്യപ്രകാശവും മാത്രം മതി. താപനിലയിലെ മാറ്റങ്ങളെ ചെറുക്കാൻ കഴിയുന്ന പ്രതിരോധ ശേഷിയുള്ള പച്ചക്കറിയാണിത്. അല്പം ആഴമുള്ള പാത്രങ്ങളില് പോലും നന്നായി വളരും. പുറത്തെ ഇലകള് മുറിച്ച് ഇടയ്ക്കിടെ വിളവെടുക്കാൻ കഴിയും.
ബീറ്റ്റൂട്ട്
നല്ല നീർവാർച്ചയുള്ള മണ്ണും ധാരാളം വെള്ളവും അത്യാവശ്യം. കിഴങ്ങും ഇലകളും ഭക്ഷ്യയോഗ്യമാണ്. ആഴത്തിലുള്ള പാത്രങ്ങളിലാണ് ബീറ്റ്റൂട്ട് വളരാൻ അനുയോജ്യം.
പച്ചമുളക്
ധാരാളം സൂര്യപ്രകാശം ലഭിക്കുന്ന ബാല്ക്കണികളില് വളർത്തുന്നത് അനുയോജ്യം. നനവ്, പരിചരണം എന്നിവ കുറവാണ്. കീടബാധ സാധ്യത കുറവാണ്.
ബീൻസ്
വേഗത്തില് വളരുന്ന പച്ചക്കറിയാണിത്. പാത്രങ്ങളില് എളുപ്പത്തില് വളരും. ഹ്രസ്വകാല വിളയായതിനാല് ബാല്ക്കണി വിളകള്ക്ക് അനുയോജ്യം. കുറഞ്ഞ പരിചരണം മാത്രമേ ആവശ്യം വരുന്നുളളൂ. മണ്ണിന്റെ പോഷകമൂല്യം വർധിപ്പിക്കാനും സഹായിക്കും.
ടെറസ് പച്ചക്കറി തോട്ടത്തിനായി ശ്രദ്ധിക്കേണ്ടവ
വെള്ളം ഒഴുകിപ്പോകാൻ സൗകര്യമുള്ള പാത്രങ്ങള് ഉപയോഗിക്കുക.
ഗുണമേന്മയുള്ള പോട്ടിംഗ് മിക്സ് തെരഞ്ഞെടുക്കുക.
ദിവസേന കുറച്ച് മണിക്കൂർ സൂര്യപ്രകാശം ലഭിക്കുന്ന സ്ഥലം ഉറപ്പാക്കുക.
മണ്ണ് അമിതമായി നനയാതിരിക്കാൻ ശ്രദ്ധിക്കുക.