കുമളി: നിയന്ത്രണംവിട്ട വാഹനം വീടിനു മുകളിലേക്ക് വീണ് വീട്ടമ്മക്ക് തലക്ക് പരിക്കേറ്റു. തലനാരിഴക്ക് വൻ അപകടം ഒഴിവായതിന്റെ ആശ്വാസത്തിലാണ് വീട്ടുകാരും നാട്ടുകാരും.
കുമളി ഒന്നാം മൈലില് ഞായറാഴ്ച വൈകീട്ട് ആറോടെയാണ് സംഭവം. കുമളി ചെല്ലാർകോവില് സ്വദേശി സിജോ കാർ തിരിക്കുന്നതിനിടെ അബദ്ധത്തില് ബ്രേക്കിന് പകരം ആക്സിലേറ്ററില് കാല് പതിച്ചാണ് അപകടം.
മുന്നോട്ടുനീങ്ങിയ കാർ റോഡിന് താഴെയുള്ള വീടിനു മുകളിലേക്ക് പതിച്ചു. വീടിനു പിന്നിലെ ഷീറ്റിട്ട ചായ്പ്പിലേക്കാണ് കാർ വീണത്. അപകടത്തില്, വീട്ടമ്മയായ കിഴക്കേ ഞാറാട്ട് മോളി (62)ക്കാണ് തലക്ക് പരിക്കേറ്റത്. ഇവരെ സ്വകാര്യ ആശുപത്രിയില് പ്രവേശിപ്പിച്ചു. ഇവരുടെ പരിക്ക് ഗുരുതരമല്ലെന്നാണ് വിവരം.
വീട്ടിലുണ്ടായിരുന്ന കുട്ടികള് ഉള്പ്പെടെ മറ്റുള്ളവർ അപകടത്തില്നിന്നും അത്ഭുതകരമായി രക്ഷപ്പെട്ടു. വാഹനം ഓടിച്ചിരുന്ന സിജോക്ക് സീറ്റ് ബെല്റ്റ് ധരിച്ചിരുന്നതിനാല് പരിക്കേറ്റില്ല. അപകടത്തില്പ്പെട്ട വാഹനം ഉയർത്തുന്നതിനായി അഗ്നിരക്ഷസേനയുടെ സഹായം തേടിയിട്ടുണ്ട്. കുമളി പോലീസ് സ്ഥലത്തെത്തി മേല്നടപടികള് സ്വീകരിച്ചു.