ഫോണ് ഉപയോഗിക്കുന്നതിനിടെ ചെറിയ തോതില് ചൂട് അനുഭവപ്പെടുന്നത് സാധാരണമാണ്. ഗെയിമിംഗ്, വീഡിയോ എഡിറ്റിംഗ്, ചാർജിംഗ് തുടങ്ങിയ കൂടുതല് പ്രോസസ്സിംഗ് ആവശ്യമായ പ്രവർത്തനങ്ങള്ക്കൊപ്പം മൊബൈല് ഡാറ്റ, ജിപിഎസ് തുടങ്ങിയവ ഒരേസമയം പ്രവർത്തിക്കുമ്പോള് ചൂട് കൂടാം.
എന്നാല് ഫോണ് അസാധാരണമായി ചൂടാകുകയും ബാറ്ററി വേഗത്തില് തീരുക, പ്രവർത്തനം മന്ദഗതിയിലാകുക തുടങ്ങിയ ലക്ഷണങ്ങള്ക്കൊപ്പം ഇത് ആവർത്തിക്കുകയും ചെയ്യുന്നുവെങ്കില് കാരണം പരിശോധിക്കേണ്ടത് പ്രധാനമാണ്.
ഒരേസമയം നിരവധി ആപ്പുകള് പ്രവർത്തിക്കുന്നത്, സ്ക്രീൻ തെളിച്ചം വളരെ കൂടുതലായി വയ്ക്കുന്നത്, നെറ്റ്വർക്ക് സിഗ്നല് ദുർബലമായ സ്ഥലത്ത് ഫോണ് തുടർച്ചയായി പ്രവർത്തിക്കുന്നത് എന്നിവയും ചൂട് കൂടാൻ കാരണമാകാം. ഗുണനിലവാരം കുറഞ്ഞ ചാർജറോ കേടായ ചാർജിങ് കേബിളോ ഉപയോഗിക്കുന്നതും പ്രശ്നമുണ്ടാക്കാം. അതുപോലെ തന്നെ ദീർഘനേരം ഗെയിം കളിക്കുക, വീഡിയോ എഡിറ്റ് ചെയ്യുക തുടങ്ങിയ പ്രവർത്തനങ്ങള് പ്രോസസറിന് കൂടുതല് ജോലി നല്കുന്നതിനാല് ഫോണിന്റെ താപനില ഉയരാം.
എന്നാല് ഫോണ് കൈയില് പിടിക്കാൻ പോലും ബുദ്ധിമുട്ടുന്ന തരത്തില് ചൂടാകുക, ബാറ്ററി അസാധാരണമായി വേഗത്തില് തീരുക, ഫോണ് പതുക്കെയാകുകയോ ഇടയ്ക്കിടെ പ്രവർത്തനം നിലയ്ക്കുകയോ ചെയ്യുക, ബാറ്ററി വീർത്തതായി കാണപ്പെടുക തുടങ്ങിയ ലക്ഷണങ്ങള് ശ്രദ്ധിക്കണം. ഇത്തരം സാഹചര്യങ്ങളില് ഫോണ് ഉപയോഗം കുറയ്ക്കുകയും ചാർജറില് കണക്ട് ചെയ്തിട്ടുണ്ടെങ്കില് മാറ്റിവയ്ക്കുകയും വേണം. പ്രശ്നം തുടരുകയാണെങ്കില് ചാർജറും കേബിളും പരിശോധിക്കുന്നതിനൊപ്പം പ്രശ്നമുണ്ടാക്കുന്ന ആപ്പുകള് കണ്ടെത്തുകയും ആവശ്യമെങ്കില് സർവീസ് സെന്ററിന്റെ സഹായം തേടുകയും ചെയ്യുന്നതാണ് ഉചിതം.
അതുകൊണ്ട് ഫോണ് ചെറുതായി ചൂടാകുന്നത് കണ്ടയുടൻ പേടിക്കേണ്ടതില്ല. ഉപയോഗിക്കുന്ന രീതിയും ചാർജിങ് രീതിയും ചുറ്റുപാടിലെ താപനിലയും ഉള്പ്പെടെ പല കാര്യങ്ങളും ഇതിന് കാരണമാകാം. എന്നാല് അമിതമായ ചൂടിനൊപ്പം ബാറ്ററി വേഗത്തില് തീരുക, ഫോണ് മന്ദഗതിയിലാകുക, ക്രാഷ് ചെയ്യുക, ബാറ്ററി വീർക്കുക തുടങ്ങിയ മാറ്റങ്ങള് കൂടി ഉണ്ടാകുന്നുണ്ടെങ്കില് അത് സാധാരണ ചൂടായി കണക്കാക്കാതെ ശ്രദ്ധിക്കേണ്ടതാണ്.