പഞ്ചസാരയുടെ ഉപയോഗം കുറയ്ക്കാൻ ശ്രമിച്ചിട്ടുള്ളവർക്കറിയാം, ആദ്യത്തെകുറച്ചു ദിവസങ്ങള് ഏറെ പ്രയാസകരമായിരിക്കും.
പഞ്ചസാര വേണ്ട എന്ന് എത്രത്തോളം ചിന്തിക്കുന്നുവോ, അത്രത്തോളം തീവ്രമായിരിക്കും അത് കഴിക്കാനുള്ള ആഗ്രഹവും. എന്നാല് വിഷമിക്കേണ്ട, ഈ ഘട്ടം താല്ക്കാലികം മാത്രമാണ്. നിങ്ങളുടെ ശരീരത്തില് എന്താണ് സംഭവിക്കുന്നതെന്ന് കൃത്യമായി മനസ്സിലാക്കിയാല് നോ-ഷുഗർ എന്ന ലക്ഷ്യം വളരെ എളുപ്പത്തില് കൈവരിക്കാൻ സാധിക്കും.
ജസ്ലോക ഹോസ്പിറ്റല് ആൻഡ് റിസർച്ച് സെന്ററിലെ കണ്സള്ട്ടന്റ് ന്യൂട്രീഷ്യനിസ്റ്റ് സോണല് ചന്ദാലിയയുടെ അഭിപ്രായത്തില്, ശരീരം പുതിയ മാറ്റങ്ങളുമായി പൊരുത്തപ്പെട്ടു വരുന്നതുകൊണ്ടാണ് തുടക്കത്തില് ഇത്തരം ആസക്തികള് ഉണ്ടാകുന്നത്. "ശരീരം നിരന്തരം ഷുഗർ ഷോട്ടുകള് സ്വീകരിക്കുന്നതിനും ഊർജ്ജത്തിനായി അല്പം പഞ്ചസാര ഉപയോഗിക്കുന്നതിനും ശീലിച്ചുപോയിരിക്കുന്നു."
പഞ്ചസാരയുടെ അളവ് കുറയുമ്പോള് ശരീരം പ്രതികരിക്കുന്നു. "ശരീരം ഒരുതരം അടിമത്തത്തിലായിരുന്നു, അതിനാല് സ്വാഭാവികമായും അത് പിൻവാങ്ങല് പ്രക്രിയയിലൂടെ കടന്നുപോകുന്നു." ഇതിനാലാണ് തുടക്കത്തില് ആസക്തി വർദ്ധിക്കുന്നത്. എന്നാല് ശരീരം മെറ്റബോളിസം പുനഃക്രമീകരിക്കുന്നതോടെ ഇത് കുറയുന്നു.
കർശനമായ നിയന്ത്രണത്തിന് പകരം പകരക്കാരെ കണ്ടെത്താം
മധുരം പൂർണ്ണമായും ഒഴിവാക്കുന്നതിന് പകരം മികച്ച ബദലുകളില് ശ്രദ്ധ കേന്ദ്രീകരിക്കുക. "ശരിയായ ബദല് മാർഗങ്ങള് തിരഞ്ഞെടുക്കുന്നതിലൂടെ പഞ്ചസാരയോടുള്ള ആസക്തി ബുദ്ധിപൂർവ്വം കുറയ്ക്കാൻ കഴിയും," എന്നാണ് സോണല് പറയുന്നത്.
ഉദാഹരണത്തിന് പഴങ്ങള് അല്ലെങ്കില് വീട്ടില് തയ്യാറാക്കിയ വിഭവങ്ങള്. "പഴങ്ങള് കഴിക്കുന്നതോ അല്ലെങ്കില് വീട്ടില് ഉണ്ടാക്കിയ കൊഴുപ്പ് കുറഞ്ഞ പാല് ഉപയോഗിച്ചുള്ള മധുരം ചേർക്കാത്ത ഡെസേർട്ടുകളോ ഉപയോഗിക്കുന്നത് ഈ ആസക്തി കുറയ്ക്കാൻ സഹായിക്കും," എന്ന് സോണാല് നിർദ്ദേശിക്കുന്നു. ചെറിയൊരു കഷ്ണം ഡാർക്ക് ചോക്ലേറ്റ് കഴിക്കുന്നതും ആസക്തിയെ തൃപ്തിപ്പെടുത്താൻ സഹായിക്കും.
"ഇത്തരം സാഹചര്യങ്ങളില് നമുക്ക് മധുരം നിഷേധിക്കപ്പെടുന്നു എന്ന തോന്നല് ഉണ്ടാവില്ല. ക്രമേണ ഈ ആരോഗ്യകരമായ ഓപ്ഷനുകള് നമ്മുടെ ദൈനംദിന ഭക്ഷണക്രമത്തിന്റെ ഭാഗമായി മാറും," എന്ന് ഡോ. സോണല് വ്യക്തമാക്കുന്നു.
അമിതമായി കഴിക്കുന്നത് തടയാം
ആസക്തികളെ നിയന്ത്രിക്കുന്നത് ഭക്ഷണത്തില് മാത്രം ഒതുങ്ങുന്ന ഒന്നല്ല, അത് ദിനചര്യയുമായും ബന്ധപ്പെട്ടിരിക്കുന്നു. "ആദ്യമായി, ആരോഗ്യകരമായ സ്രോതസ്സുകളില് നിന്നുള്ള ചെറിയ അളവിലുള്ള മധുരം കഴിക്കുന്നതില് നിന്ന് സ്വയം വിലക്കേണ്ടതില്ല," എന്ന് സോണല് പറയുന്നു. കാരണം ഇത് നിയന്ത്രണങ്ങള് മൂലമുണ്ടാകുന്ന മാനസിക വിഷമം കുറയ്ക്കാൻ സഹായിക്കും.
ഭക്ഷണം കൃത്യമായി പ്ലാൻ ചെയ്യുന്നതും സഹായിക്കും. "പ്രധാന ഭക്ഷണത്തിന് മുമ്പായി സാലഡും സൂപ്പും കഴിക്കുന്ന ശീലം വിശപ്പ് കുറയ്ക്കാനും കൂടുതല് സമയം വയർ നിറഞ്ഞതായി തോന്നിക്കാനും സഹായിക്കും," എന്നാണ് സോണലിന്റെ അഭിപ്രായം.
മറ്റൊരു ഉപയോഗപ്രദമായ തന്ത്രം സമയക്രമമാണ്. എപ്പോഴാണ് സാധാരണയായി മധുരം കഴിക്കാൻ തോന്നുന്നത് എന്ന് തിരിച്ചറിയുകയും, ആ സമയത്തിന് തൊട്ടുമുമ്പ് ലഘുഭക്ഷണം കഴിക്കുകയും ചെയ്യുന്നത് അമിതമായി കഴിക്കുന്നത് തടയാൻ സഹായിക്കും.
ശരിയായ ലഘുഭക്ഷണങ്ങള് തിരഞ്ഞെടുക്കുക
ഇരുന്ന് ജോലി ചെയ്യുന്നവർക്ക് സ്മാർട്ട് സ്നാക്കിംഗ് വളരെ പ്രധാനമാണ്. കുറഞ്ഞ പഞ്ചസാരയുള്ളതും കോംപ്ലക്സ് കാർബോഹൈഡ്രേറ്റ് അടങ്ങിയതുമായ ലഘുഭക്ഷണങ്ങള് ഇത്തരക്കാർക്ക് ഭക്ഷണക്രമത്തില് ഉള്പ്പെടുത്താം.
വറുത്ത കടല, മഖാന, ഹോള് വീറ്റ് ഖാക്ര, പഴങ്ങള്, മുളപ്പിച്ച ധാന്യങ്ങള്, അല്ലെങ്കില് ചെറിയ അളവില് നട്ട്സ് എന്നിവ രക്തത്തിലെ പഞ്ചസാരയുടെ അളവ് വർദ്ധിപ്പിക്കാതെ തന്നെ വിശപ്പ് മാറ്റാൻ സഹായിക്കും.
അതേസമയം, പാക്കറ്റ് ഭക്ഷണങ്ങളെക്കുറിച്ച് ജാഗ്രത പാലിക്കുക. "പഞ്ചസാരയില്ലാത്ത റെഡി പാക്കേജ്ഡ് ഭക്ഷണങ്ങള് ശരിയായ ബദലുകളല്ല. കാരണം അവയില് ആരോഗ്യകരമല്ലാത്ത മറ്റ് ഘടകങ്ങള് അടങ്ങിയിട്ടുണ്ടാകാം, ഇത് നിങ്ങളെ തെറ്റിദ്ധരിപ്പിക്കാൻ സാധ്യതയുണ്ട്."