പാലക്കാട് മതേതര മണ്ണാണെന്നും പണം കൊടുത്ത് വാങ്ങാൻ പറ്റുന്നത് അല്ല പാലക്കാടിന്റെ ജനാധിപത്യ ബോധവും മൂല്യവുമെന്നും എംഎല്എ രാഹുല് മാങ്കൂട്ടത്തില്.
വോട്ടിന് വേണ്ടി ബിജെപി പാലക്കാട് മണ്ഡലത്തില് വ്യാപകമായി പണം വിതരണം ചെയ്യുന്നുവെന്ന ആരോപണത്തിന്റെ സാഹചര്യത്തിലാണ് രാഹുലിന്റെ ഫെയ്സ്ബുക്ക് പോസ്റ്റ്. കയ്യില് കുറെ പണം ഉണ്ടെങ്കില് അത് ആളുകള്ക്ക് കൊടുത്തോളൂ, പക്ഷേ അത് കൊണ്ട് അവരുടെ വോട്ട് വാങ്ങാം എന്ന് വിചാരിക്കണ്ട…ഈ പണത്തിന് മേലെ പാലക്കാട് പറക്കും, പിഷാരടി ജയിക്കുമെന്നും രാഹുല് കുറിച്ചു.
രാഹുല് മാങ്കൂട്ടത്തിലിന്റെ ഫെയ്സ്ബുക്ക് പോസ്റ്റ്
ശ്രീമതി ശോഭ സുരേന്ദ്രനോടാണ്.
കഴിഞ്ഞ കുറച്ച് ദിവസങ്ങളായി നിങ്ങളുടെ സഹപ്രവർത്തകർ പാലക്കാടിന്റെ വിവിധ ഭാഗങ്ങളില് വോട്ടിനായി പണം ഒഴുക്കുന്നു എന്ന് കേട്ടിരുന്നു. ഇന്ന് നിങ്ങളുടെ ഒപ്പം വാഹനത്തില് വന്ന നിങ്ങളുടെ വിശ്വസ്ത പോലും നിങ്ങള് പോകുന്ന വീടുകളില് പണം കൊടുക്കാൻ ശ്രമിക്കുന്ന ദൃശ്യങ്ങളാണ്.
ദൃശ്യങ്ങള് പകർത്തിയ താങ്കളുടെ മകന്റെ പ്രായമുള്ള കുട്ടിയോട് താങ്കള് പറഞ്ഞത് "മുഖം അടിച്ച് പൊളിക്കും" എന്ന് ആണ് ശ്രീമതി ശോഭ താങ്കള് പറഞ്ഞത്.
പാലക്കാട് മതേതര മണ്ണാണ്, പണം കൊടുത്ത് വാങ്ങാൻ പറ്റുന്നത് അല്ല പാലക്കാടിന്റെ ജനാധിപത്യ ബോധവും മൂല്യവും. കയ്യില് കുറെ പണം ഉണ്ടെങ്കില് അത് ആളുകള്ക്ക് കൊടുത്തോളൂ, പക്ഷേ അത് കൊണ്ട് അവരുടെ വോട്ട് വാങ്ങാം എന്ന് വിചാരിക്കണ്ട…
ഈ പണത്തിന് മേലെ പാലക്കാട് പറക്കും,
പിഷാരടി ജയിക്കും….