ജപ്പാനിലെ ഏറ്റവും മൂല്യമുള്ള കമ്പനിയെന്ന സ്ഥാനം ടൊയോട്ടയെ മറികടന്ന് ടെക് നിക്ഷേപകരായ സോഫ്റ്റ്ബാങ്ക് ഗ്രൂപ്പ് സ്വന്തമാക്കി.

നീണ്ട 20 വർഷങ്ങള്‍ക്ക് ശേഷമാണ് ടൊയോട്ടയ്ക്ക് ജപ്പാനിലെ ഈ ഒന്നാംസ്ഥാനം നഷ്ടമാകുന്നത്. പരമ്പരാഗത വ്യവസായങ്ങളില്‍ നിന്ന് നിർമ്മിത ബുദ്ധി (AI) മേഖലയിലേക്കുള്ള നിക്ഷേപകരുടെ താല്പര്യ മാറ്റമാണ് സോഫ്റ്റ്ബാങ്കിന്റെ ഈ ചരിത്ര മുന്നേറ്റത്തിന് കാരണമായി വിലയിരുത്തപ്പെടുന്നത്.

മസായോഷി സണ്‍ നയിക്കുന്ന സോഫ്റ്റ്ബാങ്ക്, ചാറ്റ്ജിപിടിയുടെ നിർമ്മാതാക്കളായ ഓപ്പണ്‍എഐയില്‍ നടത്തിയ വൻ നിക്ഷേപമാണ് ഈ куതിപ്പിന് പിന്നില്‍. ഈയാഴ്ച സോഫ്റ്റ്ബാങ്കിന്റെ ഓഹരികള്‍ 14 ശതമാനത്തിലധികം ഉയർന്ന് എക്കാലത്തെയും ഉയർന്ന നിരക്കിലെത്തി. ഇതോടെ കമ്പനിയുടെ വിപണി മൂല്യം ഏകദേശം 48.8 ട്രില്യണ്‍ യെന്നായി (30,500 കോടി ഡോളർ) ഉയർന്നപ്പോള്‍, ടൊയോട്ടയുടെ മൂല്യം 4.5 ശതമാനം ഇടിഞ്ഞ് 45.9 ട്രില്യണ്‍ യെന്നിലേക്ക് (28,800 കോടി ഡോളർ) താഴ്ന്നു. 2003-ല്‍ ടെലികോം ഭീമനായ എൻടിടി ഡോക്കോമോയെ മറികടന്നതിന് ശേഷം ജപ്പാനിലെ ഏറ്റവും മൂല്യമുള്ള കമ്പനി ടൊയോട്ടയായിരുന്നു.

ഫ്രാൻസില്‍ എ.ഐ ഡേറ്റാ സെന്ററുകളുടെ വലിയ ശൃംഖല നിർമ്മിക്കാൻ 75 ബില്യണ്‍ യൂറോ വരെ നിക്ഷേപിക്കുമെന്ന് സോഫ്റ്റ്ബാങ്ക് സ്ഥാപകൻ അടുത്തിടെ പ്രഖ്യാപിച്ചിരുന്നു. യൂറോപ്പിലെ ഏറ്റവും വലിയ എ.ഐ അടിസ്ഥാന സൗകര്യ നിക്ഷേപമാണിത്. ഓപ്പണ്‍എഐ സിഇഒ സാം ഓള്‍ട്ട്മാനുമായുള്ള സാമ്പത്തിക ഇടപെടലുകളും സോഫ്റ്റ്ബാങ്കിന്റെ മുന്നേറ്റത്തിന് ആക്കം കൂട്ടി. ഓപ്പണ്‍എഐയില്‍ നിലവില്‍ 13 ശതമാനം ഓഹരിയുള്ള സോഫ്റ്റ്ബാങ്കിന്റെ വാർഷിക അറ്റാദായം നാല് മടങ്ങ് വർധിച്ച്‌ 30 ബില്യണ്‍ ഡോളറിലധികമായിട്ടുണ്ട്. ഇതിനായി എൻവിഡിയയിലെ തങ്ങളുടെ ഓഹരികള്‍ പോലും സോഫ്റ്റ്ബാങ്ക് വിറ്റഴിച്ചിരുന്നു.