ആർട്ടിഫിഷ്യല്‍ ഇന്റലിജൻസ് സാങ്കേതികവിദ്യയുടെ സഹായത്തോടെ ഇനി ഇത് സാധ്യമാകും. ഗൂഗ്ളിന്റെ ഏറ്റവും പുതിയ എ.ഐ അധിഷ്ഠിത എഡിറ്റിങ്ങ് ടൂളായ 'ജെമിനി ഓംനി' (Gemini Omni) വഴിയാണ് ഈ ഉഗ്രൻ ഫീച്ചർ അവതരിപ്പിച്ചിരിക്കുന്നത്. ഉപയോക്താക്കള്‍ക്ക് ലളിതമായ ഭാഷാ നിർദ്ദേശങ്ങളിലൂടെ വിഡിയോകള്‍ എഡിറ്റ് ചെയ്യാനും വലിയ മാറ്റങ്ങള്‍ വരുത്താനും സഹായിക്കുന്ന അത്യാധുനിക മള്‍ട്ടിമോഡല്‍ എ.ഐ മോഡലായ ജെമിനി ഓംനി ഇനി മുതല്‍ ഇന്ത്യയിലും ലഭ്യമായിത്തുടങ്ങും.

ഗൂഗ്ളിന്റെ വാർഷിക ഡെവലപ്പർ കോണ്‍ഫറൻസായ 'ഗൂഗ്ള്‍ ഐ.ഓ 2026'-ല്‍ (Google I/O 2026) ജെമിനി 3.5 മോഡലുകള്‍ക്കൊപ്പം അവതരിപ്പിച്ച ഓംനി, പരമ്പരാഗത എഡിറ്റിംഗ് സോഫ്റ്റ്‌വെയറുകളുടെ സങ്കീർണ്ണതകളില്ലാതെ തന്നെ മികച്ച രീതിയില്‍ വിഡിയോകള്‍ റീമേയ്ക്ക് ചെയ്യാൻ ഉപയോക്താക്കളെ സഹായിക്കും.

ടെക്സ്റ്റ്, ചിത്രങ്ങള്‍, ഓഡിയോ, വീഡിയോ എന്നിവയ്ക്ക് പുറമെ യഥാർത്ഥ ലോകത്തിലെ ഭൗതികശാസ്ത്ര നിയമങ്ങളും കൃത്യമായി മനസ്സിലാക്കാൻ ശേഷിയുള്ള ഒരു സിനിമാറ്റിക് വിഡിയോ ജനറേഷൻ മോഡലായാണ് ഗൂഗ്ള്‍ ഓംനിയെ വിശേഷിപ്പിക്കുന്നത്. ജെമിനി ആപ്പ് വഴിയും വെബ് പതിപ്പിലൂടെയും ഉപയോക്താക്കള്‍ക്ക് ഈ ഫീച്ചർ ഇപ്പോള്‍ ഉപയോഗിക്കാനാകും.

ജെമിനി ഓംനിയുടെ പ്രധാന സവിശേഷതകള്‍

• സംഭാഷണ രൂപത്തിലുള്ള എഡിറ്റിംഗ്: സാധാരണയായി മറ്റൊരാളോട് സംസാരിക്കുന്നതുപോലെ നിർദ്ദേശങ്ങള്‍ നല്‍കി വിഡിയോയിലെ രംഗങ്ങള്‍, കഥാപാത്രങ്ങള്‍, പശ്ചാത്തലം എന്നിവ മാറ്റാൻ സാധിക്കും.
• പശ്ചാത്തലവും ശൈലിയും മാറ്റാം: വിഡിയോയിലെ ഒരു പ്രത്യേക ഭാഗം മാത്രമായോ അല്ലെങ്കില്‍ പൂർണ്ണമായോ ബാക്ക്ഗ്രൗണ്ടും സ്റ്റൈലും മാറ്റിയെടുക്കാം.
• ആക്ഷനുകളില്‍ മാറ്റം വരുത്താം: വിഡിയോയില്‍ നടക്കുന്ന കാര്യങ്ങള്‍ മാറ്റാനും പുതിയ കഥാപാത്രങ്ങളെയോ വസ്തുക്കളെയോ എളുപ്പത്തില്‍ കൂട്ടിച്ചേർക്കാനും സാധിക്കും.
• തുടർച്ച നിലനിർത്താം (Consistency): മുൻപ് നല്‍കിയ നിർദ്ദേശങ്ങള്‍ ഓർമ്മിച്ചുവെക്കാൻ ഈ എ.ഐ മോഡലിന് സാധിക്കും. അതുകൊണ്ട് തന്നെ, പല തവണ മാറ്റങ്ങള്‍ വരുത്തിയാലും വിഡിയോയുടെ സ്വാഭാവികതയും കഥാപാത്രങ്ങളുടെ ഘടനയും നഷ്ടപ്പെടില്ല.
• യഥാർത്ഥ ലോക ഭൗതികശാസ്ത്രം: ഭൂഗുരുദ്ധാകർഷണം, ചലനം, ദ്രാവകങ്ങളുടെ ചലനാത്മകത തുടങ്ങിയ ഭൗതികശാസ്ത്ര നിയമങ്ങള്‍ മനസ്സിലാക്കി ദൃശ്യങ്ങള്‍ നിർമ്മിക്കുന്നതിനാല്‍ ഓംനി തയ്യാറാക്കുന്ന വിഡിയോകള്‍ കൂടുതല്‍ റിയലിസ്റ്റിക് ആയിരിക്കും.
• ഡിജിറ്റല്‍ അവതാർ: ഉപയോക്താക്കള്‍ക്ക് സ്വന്തം ശബ്ദവും രൂപവും ഉപയോഗിച്ച്‌ തങ്ങളുടെ തന്നെ ഒരു ഡിജിറ്റല്‍ പതിപ്പ് സൃഷ്ടിക്കാനുള്ള സൗകര്യവും ഇതിലുണ്ട്. തുടക്കത്തില്‍ ഓഡിയോ ഇൻപുട്ടുകള്‍ക്കായി വോയ്‌സ് റെഫറൻസുകള്‍ മാത്രമാണ് ഇത് പിന്തുണയ്ക്കുക.

ജെമിനി ഓംനി വഴി വിഡിയോ എഡിറ്റ് ചെയ്യുന്നത് എങ്ങനെ?

1. അപ്‌ലോഡ് ചെയ്യുക: നിങ്ങളുടെ ഫോണില്‍ നിന്നോ കമ്പ്യൂട്ടറില്‍ നിന്നോ എഡിറ്റ് ചെയ്യേണ്ട വിഡിയോ അല്ലെങ്കില്‍ റഫറൻസ് ചിത്രങ്ങള്‍/ഡ്രോയിംഗുകള്‍ ജെമിനിയിലേക്ക് അപ്‌ലോഡ് ചെയ്യുക.
2. നിർദ്ദേശം നല്‍കുക: വിഡിയോയില്‍ എന്തൊക്കെ മാറ്റങ്ങളാണ് വരുത്തേണ്ടതെന്ന് സാധാരണ ഭാഷയില്‍ ടൈപ്പ് ചെയ്ത് ജെമിനിയോട് പറയുക.
3. പ്രൊസസിംഗ്: നിങ്ങളുടെ നിർദ്ദേശങ്ങള്‍ അനുസരിച്ച്‌ ജെമിനി ഓംനി വിഡിയോ എഡിറ്റ് ചെയ്യുകയും രൂപമാറ്റം വരുത്തുകയും ചെയ്യും. ഇതിനായി അല്പം സമയം നല്‍കുക.
4. സേവ് ചെയ്യുക: എഡിറ്റിംഗ് പൂർത്തിയായ പുതിയ വിഡിയോ നിങ്ങളുടെ ഡിവൈസിലേക്ക് നേരിട്ട് സേവ് ചെയ്യാം.

ദുരുപയോഗം തടയാൻ കടുത്ത സുരക്ഷാ മാനദണ്ഡങ്ങള്‍

എ.ഐ സാങ്കേതികവിദ്യ ദുരുപയോഗം ചെയ്യുന്നത് തടയാനും സുതാര്യത ഉറപ്പാക്കാനുമുള്ള ശ്രമങ്ങള്‍ ഗൂഗ്ള്‍ ശക്തമാക്കിയിട്ടുണ്ട്. ജെമിനി ഓംനി വഴി നിർമ്മിക്കുന്ന എല്ലാ വിഡിയോകളിലും നഗ്നനേത്രങ്ങള്‍ കൊണ്ട് കാണാനാകാത്ത വിധത്തിലുള്ള 'ഡിജിറ്റല്‍ വാട്ടർമാർക്ക്' ഉണ്ടായിരിക്കും. ഒരു വിഡിയോ ജെമിനി ഓംനി ഉപയോഗിച്ചാണോ നിർമ്മിച്ചതെന്ന് ജെമിനി ആപ്പ്, ഗൂഗ്ള്‍ ക്രോം (Google Chrome), ഗൂഗ്ള്‍ സെർച്ച്‌ (Google Search) എന്നിവയിലൂടെ ഉപയോക്താക്കള്‍ക്ക് എളുപ്പത്തില്‍ പരിശോധിച്ച്‌ മനസിലാക്കാൻ കഴിയും. അതുകൊണ്ട് തന്നെ എ.ഐ സംവിധാനങ്ങള്‍ ദുരുപയോഗം ചെയ്ത് വ്യാജ വിഡിയോകള്‍ നിർമ്മിക്കുന്നത് ഒരു പരിധി വരെ തടയാൻ സാധിക്കുമെന്നാണ് വിലയിരുത്തല്‍.