സി.പി.എമ്മിന്റെ ഏറ്റവും കരുത്തുറ്റ രാഷ്ട്രീയ മണ്ണായ കണ്ണൂരില്‍ പാർട്ടി സ്വന്തം വിചാരണയ്ക്ക് ഒരുങ്ങുന്നു. പയ്യന്നൂരും തളിപ്പറമ്പും ഉള്‍പ്പെടെയുള്ള സിറ്റിങ് സീറ്റുകള്‍ കൈവിട്ടുപോയതിന്റെയും, വിമത ശബ്ദങ്ങള്‍ കോട്ടയ്ക്കുള്ളില്‍ വിജയം കൊയ്തതിന്റെയും ആഘാതത്തില്‍ നിന്ന് കരകയറാൻ ശ്രമിക്കുന്ന സി.പി.എം ജില്ലാക്കമ്മിറ്റി യോഗം രാഷ്ട്രീയ കേരളത്തിന്റെ ശ്രദ്ധാകേന്ദ്രമായി മാറുകയാണ്.
രണ്ട് ദിവസങ്ങളിലായി നടക്കുന്ന വിപുലീകൃത കണ്ണൂർ ജില്ലാക്കമ്മിറ്റി യോഗത്തില്‍ പാർട്ടിയുടെ രാഷ്ട്രീയ ഭാവിയെത്തന്നെ നിർണ്ണയിക്കുന്ന നിർണ്ണായക ചർച്ചകളാണ് നടക്കുന്നത്.
കോട്ടകള്‍ വീണ അങ്കലാപ്പില്‍ പാർട്ടി
നിയമസഭാ തിരഞ്ഞെടുപ്പില്‍ പാർട്ടിക്ക് ഏറ്റ വൻ തിരിച്ചടി ഏറ്റവും കൂടുതല്‍ ഞെട്ടലുണ്ടാക്കിയത് കണ്ണൂരിലാണ്. പയ്യന്നൂരില്‍ സിറ്റിങ് എം.എല്‍.എ ടി.ഐ. മധുസൂദനനെതിരെ വിമതനായി മത്സരിച്ച വി. കുഞ്ഞികൃഷ്ണൻ വൻ ഭൂരിപക്ഷത്തില്‍ വിജയിച്ചു കയറിയത് പാർട്ടിക്ക് ഏല്‍പ്പിച്ച പ്രഹരം ചെറുതല്ല. രക്തസാക്ഷി ഫണ്ടുമായി ബന്ധപ്പെട്ട സാമ്പത്തിക ആരോപണങ്ങളും സ്വജനപക്ഷപാതത്തിനെതിരെ ഉയർന്ന ശബ്ദങ്ങളും വ്യക്തികളുടെ മാത്രം പ്രശ്നങ്ങളല്ലെന്നും, മറിച്ച്‌ ജനങ്ങള്‍ ഗൗരവത്തോടെ കണ്ട വിഷയങ്ങളാണെന്നുമാണ് തിരഞ്ഞെടുപ്പ് ഫലം നല്‍കുന്ന സൂചന. തളിപ്പറമ്പിലും സമാനമായ രീതിയില്‍ പാർട്ടി പുറത്താക്കിയ ടി.കെ. ഗോവിന്ദൻ വിജയം കണ്ടത് നേതൃത്വത്തിന് വലിയ നാണക്കേടാണ് ഉണ്ടാക്കിയിരിക്കുന്നത്.
ചോദ്യങ്ങള്‍ മുകളിലേക്ക്; പ്രതിരോധത്തിലായി നേതൃത്വം
ഈ തോല്‍വികളുടെ ഉത്തരവാദിത്വം ആർക്കെന്ന ചോദ്യം ഇപ്പോള്‍ താഴേത്തട്ടില്‍ നിന്ന് സംസ്ഥാന നേതൃത്വത്തിലേക്ക് വരെ നീളുകയാണ്. തിരഞ്ഞെടുപ്പ് പ്രചാരണം ഒരാളെ മാത്രം കേന്ദ്രീകരിച്ചായിരുന്നുവെന്ന വിമർശനം അണികള്‍ക്കിടയില്‍ ശക്തമാണ്. മുൻ മുഖ്യമന്ത്രിയുടെ ശൈലിയും, കഴിഞ്ഞ സർക്കാരിന്റെ വീഴ്ചകളും, സംസ്ഥാന നേതൃത്വത്തിന്റെ നയങ്ങളും യോഗത്തില്‍ ചൂടേറിയ ചർച്ചയാകുമെന്നുറപ്പാണ്. കോഴിക്കോട്ട് ചേർന്ന വിപുലീകൃത സംസ്ഥാന സമിതിയില്‍ കണ്ണൂരില്‍ നിന്നുള്ള അംഗങ്ങള്‍ തെറ്റുതിരുത്തല്‍ കരടിനെതിരെ ശക്തമായി പ്രതികരിച്ചിരുന്നു. ആ അമർഷത്തിന്റെ ബാക്കിപത്രം ജില്ലാതല യോഗത്തില്‍ കൂടുതല്‍ തുറന്ന രൂപത്തില്‍ പുറത്തുവരാനാണ് സാധ്യത.
കസേരകളിയില്‍ കണ്ണുകള്‍ നട്ട് രാഷ്ട്രീയ കേരളം
തോല്‍വിയുടെ ഉത്തരവാദിത്വത്തിന്റെ പേരില്‍ ജില്ലാ സെക്രട്ടറി കെ.കെ. രാഗേഷിന്റെ സ്ഥാനം തെറിക്കുമോ എന്ന ചർച്ചയാണ് പാർട്ടിക്കകത്ത് സജീവമായിട്ടുള്ളത്. ജില്ലാ സെക്രട്ടേറിയറ്റിലും ജില്ലാക്കമ്മിറ്റിയിലും വരാനിരിക്കുന്ന പുനഃസംഘടനയെക്കുറിച്ചുള്ള അഭ്യൂഹങ്ങള്‍ പാർട്ടി ക്യാമ്പുകളില്‍ ചൂടേറിയ ചർച്ചകള്‍ക്ക് വഴിതുറന്നിട്ടുണ്ട്. പാലക്കാട്ട് സുരേഷ് ബാബുവിനെതിരെ സ്വീകരിച്ച നടപടി കണ്ണൂരിലും ആവർത്തിക്കുമോയെന്നാണ് ഏവരും ഉറ്റുനോക്കുന്നത്.
രാഷ്ട്രീയ ചരിത്രത്തില്‍ പലപ്പോഴും സി.പി.എമ്മിന്റെ ദിശ നിർണയിച്ചിട്ടുള്ള കണ്ണൂരിലെ ഈ വിചാരണ യോഗം പാർട്ടിയുടെ തിരുത്തല്‍ പ്രക്രിയയുടെ വിശ്വാസ്യതയാണ് അളക്കുന്നത്. അടച്ചിട്ട മുറികളിലെ ചർച്ചകള്‍ക്ക് ശേഷം സമാപന സമ്മേളനത്തില്‍ പാർട്ടി നല്‍കുന്ന പ്രഖ്യാപനങ്ങള്‍ എന്തായിരിക്കുമെന്ന ആകാംക്ഷയിലാണ് രാഷ്ട്രീയ നിരീക്ഷകരും എതിരാളികളും.