കൊച്ചി : കേരളത്തിലെ പ്രമുഖ സ്വകാര്യ ബാങ്കുകളിലൊന്നായ സൗത്ത് ഇന്ത്യൻ ബാങ്ക്, ഹോം ലോണ്‍ സേവനങ്ങള്‍ ശക്തിപ്പെടുത്തുന്നതിനായി അസറ്റ് ഹോംസ് പ്രൈവറ്റ് ലിമിറ്റഡുമായി ധാരണാപത്രത്തില്‍ ഒപ്പുവച്ചു.

അസറ്റ് ഹോംസ് സ്ഥാപകനും മാനേജിംഗ് ഡയറക്ടറുമായ വി. സുനില്‍ കുമാർ, സൗത്ത് ഇന്ത്യൻ ബാങ്ക് എക്സിക്യൂട്ടീവ് വൈസ് പ്രസിഡന്റും ചീഫ് ഓപ്പറേറ്റിംഗ് ഓഫീസറുമായ ആന്റോ ജോർജ് ടി എന്നിവർ ചേർന്നാണ് കരാർ ഒപ്പുവെച്ചത്. ഇരു സ്ഥാപനങ്ങളിലെയും മുതിർന്ന ഉദ്യോഗസ്ഥർ ചടങ്ങില്‍ പങ്കെടുത്തു.

ഉപഭോക്താക്കള്‍ക്ക് കൂടുതല്‍ മെച്ചപ്പെട്ട ഹോം ലോണ്‍ സൗകര്യം നല്‍കുക എന്ന ലക്ഷ്യത്തോടെയാണ് ഈ സഹകരണത്തിന് തുടക്കമിട്ടത്. പ്രത്യേക ആനുകൂല്യങ്ങള്‍, വേഗത്തിലുള്ള ലോണ്‍ പ്രോസസ്സിംഗ്, ഏകോപിത വില്‍പ്പന പ്രവർത്തനങ്ങള്‍ എന്നിവയിലൂടെ ഉപഭോക്താക്കള്‍ക്ക് മികച്ച അനുഭവം നല്‍കുകയാണ് ഈ സഹകരണത്തിന്റെ ലക്ഷ്യം.

സൗത്ത് ഇന്ത്യൻ ബാങ്കിന്റെ ധനകാര്യ വൈദഗ്ധ്യവും അസറ്റ് ഹോംസിന്റെ റിയല്‍ എസ്റ്റേറ്റ് രംഗത്തെ ശക്തമായ സാന്നിധ്യവും ഒത്തുചേരുന്നതോടെ ഉപഭോക്താക്കള്‍ക്ക് സുഗമവും കാര്യക്ഷമവുമായ ഭവന വായ്പാ സേവനങ്ങള്‍ ലഭ്യമാകും.

വീട് സ്വന്തമാക്കാൻ ആഗ്രഹിക്കുന്നവർക്ക് കൂടുതല്‍ മൂല്യവും ആവശ്യാനുസൃത ഓഫറുകളും നല്‍കുകയും ഹൗസിംഗ് ഫിനാൻസിലേക്കുള്ള പ്രവേശനം എളുപ്പമാക്കുകയും ചെയ്യുക എന്നതാണ് ഈ സഹകരണത്തിന്റെ ലക്ഷ്യം.