കൊച്ചി: ട്രാൻസ്ജെൻഡർ വിഭാഗത്തില്പ്പെട്ട ഭക്തയ്ക്ക് ശബരിമല ദർശനത്തിന് അധികൃതർ തടസ്സം നിന്നതായി പരാതി. തുടർന്ന് തീർത്ഥാടനത്തിനും ക്ഷേത്രദർശനത്തിനും അനുമതി തേടി ഭക്ത കേരള ഹൈക്കോടതിയെ സമീപിച്ചു.
ജസ്റ്റിസ് ഗോപിനാഥ് പി., ജസ്റ്റിസ് എസ്. മനു എന്നിവരടങ്ങിയ വേനലവധിക്കാല ബെഞ്ചാണ് ഹർജി പരിഗണിച്ചത്. ഹർജിയില് പ്രാഥമിക വാദം കേട്ട കോടതി, സംസ്ഥാന സർക്കാരിനും മറ്റ് ബന്ധപ്പെട്ട അധികൃതർക്കും നോട്ടീസ് അയക്കാൻ ഉത്തരവിട്ടു. സർക്കാരിനും ജില്ലാ കളക്ടർക്കും വേണ്ടി ഗവണ്മെന്റ് പ്ലീഡറും, തിരുവിതാംകൂർ ദേവസ്വം ബോർഡിനായി സ്റ്റാൻഡിംഗ് കൗണ്സിലും നോട്ടീസ് ഏറ്റുവാങ്ങി.
വിശ്വാസങ്ങള് പിന്തുടരാനും, വിവേചനമില്ലാതെ ആരാധനാലയങ്ങളില് പ്രവേശിക്കാനും, തീർത്ഥാടനം നടത്താനുമുള്ള ട്രാൻസ്ജെൻഡർ വ്യക്തികളുടെ ഭരണഘടനാപരമായ അവകാശത്തെക്കുറിച്ച് പ്രധാനപ്പെട്ട ചോദ്യങ്ങളാണ് ഈ ഹർജി ഉയർത്തുന്നത്. അധികൃതരില് നിന്ന് വ്യക്തമായ വിശദീകരണം ലഭിച്ച ശേഷം വിഷയം കോടതി വീണ്ടും പരിഗണിക്കും.